Ŋwàk nə̀ Wo à Còm Fa Bʉ̀ʉ HIBRÙ wèŋ.
1.
Nwì ànə cep to mantombì fa'a bohòtàcicii avès bə nsàap mandzə̀ zok zok. Yi à cèp bohòwo vɛ'nə kɛ̀' ŋkʉ̀ʉŋntɛ̀ŋ. Yi à sə tsə̀' bwì ncèp ye nə cùhu ŋgàa tsòhòbum Nwì wèŋ. 
Nə ye də bə nùumbu sə̀ yà' sə lə̀sə lòyè'e yi a cèp bohòvès mok cùhu mo ye nə̀ yi a tum və̀ nə. Yi gʉ mo ye nə ŋgòtse' ŋàŋ bə bum ye pwe'fo'. Yi à gʉ̀ bum pwe' sə̀' ndzə bohònà'. 
Bə̀bo nə̀ Nwì nə sə rɛɛŋ yəəŋ mʉ lisə̀ bwì bohòyi nə. Bwì yə yi, fana wo rìŋtse' nsàp ŋwə̀ nə̀ Nwì cu nə vɛ'ɛ pwe' nə̀ pwe'. Nzeŋgònə cu malì fo' yè'sə sə̀' bʉ̀ʉ ncèp mo ye nə, nə̀ nà' tse' ŋàŋ nə. Ghà nə̀ yi à gʉ̀ rɛŋsə fis wes fa bwì bʉp awo fana yi lo kə cum yuye mʉbu bo ma mà'a Nwì nə̀ yi maŋgəŋgèŋ, nə sə sak tsoŋ gaŋ ye mbwa. 
Mvə̀'nə̀ yi cu bo ma mà'a Nwì yà'sə fana yi yam càsə masinjàa Nwì pwe' yi. Vès rì vɛ'nə bʉ̀ʉsə̀ liŋ sə̀ Nwì a fa yi sə yà' yam ghak liŋ masinjàa Nwì sə wèŋ pwe'fo'. 
Nwì bə tu ye à ka bohòmasinjà ye mòk nùmbu mòk dʉk yuk fa də, <<Wu yè'e mo àm. Ye jəŋ ntinə, nə lo mantombì, mʉ yè'e tɛ̀' yo. Mvə̀'nə̀ yi à dʉk də, Mʉ nə ye tɛ̀' ye, yi ye bwi mo àm>> nə, yi ka bohòmasinjà mòk vɛ'nə dʉk. Mègù Jisòs yiìyi nə̀ yi a cèp yuk fa nà' nsàp ncèp ènə. 
Yumok ye fe'lə sə̀' də, ghà nə̀ Nwì à də yi nə tum vesə motu ye nə sə nzeŋgòŋ fana yi cep də, <<Masinjàa Nwì pwe' kuksə mo ye nə.>> 
Yusə̀ ghaŋ sə̀ yi à cèp yuk bə liŋ masinjàa Nwìi də, <<Yi gʉ̀ masinjàa ye co fə̀fə̀, nə gʉ bwe fàak ye yè'sə wèŋ co lʉm-mis.>> 
Nə ye də ma nə̀ mo ye nə fana Nwì à to nà' bə liŋ sə̀ ye mvə̀'nə̀ yi à cèp də, <<Nwì, wu nə cum mam mʉnə kapràak ŋkum mvèsə̀ nə̀ mvèsə̀. Wu nə sə sak gaŋ yo sə bə mandzə̀ nə̀ nà'a zìnə. 
Wù dzəm mègù bum sə̀ yà'a kə̀kʉrə̀ mandzə̀ nə̀ Nwì, Nə bɛŋ yusə̀ aco yà' gʉ bʉpsə lʉ̀k nə̀ Nwì nə pwe'fo'. Nà'a njo nə̀ Nwì nə̀ yi Nwì yònə a gʉ̀ wu də wu yam, Nə tse' kwəkwa nə̀ nà' càsə sə̀ ŋge' yo mok sə wèŋ pwe'fo'.>> 
Yumok sə̀ yi à cèp fe'lə bə liŋ mo ye sə də, <<Tà, a wù nə̀ wù ànə gʉ nzeŋgòŋ, ntòbu sə̀' bo fàha yo. 
Wo nə̀ bisə ŋgwàŋ, wù cum mali yòfo'. Wo nə vəp co cə̀k nə̀ nà' rèŋ laŋ. 
Wu nə lim benə wo co cə̀k. Wo nə kupsə, wù mam yòmvə̀'nə̀ wù cu. Lùumŋgòoŋ yo nə kà ye kə̀ mè yuk.>> 
Ncèp mòk nə̀ Nwì ka nà' bohòmasinjà ye mòk cep yuk fa sə̀' də, <<Cum bo ma mà'a mʉ̀ fɛɛŋ Tə̀tè mʉ nə gʉ bʉ̀ʉ sə̀ wo sə bɛ̀ŋ wu, Wù nəŋ tes kù mʉ tuhù wo.>> 
A ye-a vɛ'nə fana ye də masinjàa Nwìi yè'sə ndà wèŋ? Wo mègù yòŋsə̀ə sə̀ wo gʉ̀gə̀ fàak Nwì. Wo tɛsəgə̀ bʉ̀ʉ sə̀ wo nə̀ tse' lùŋ.