Injil tan Luqa.
1.
Eɲa Teofiles, eggeten wi eǧmeynén éd ekteben isǎlan n awa iǧen ǧérénɣ, 
hund awa hasn tn eǧen imašhaden wi tn eneynén s téṭṭawén nsn émér héndɣ d eǧen s tizaret. Wiɣ entenéḍ a yǎmosen imawayen n Awal n Yaḷḷah. 
Fol awén, aked nk, édét eknéɣ ǎgemay i isǎlan win tizaret, teǧǧeh ahi enniyet n éd tn ektebeɣ s emmek was tn elmedeɣ baš éd hak tn amleɣ s iyyen iyyen, eɲa Teofiles, 
baš éd tsellekened tidet n tifér ti telmeded. 
Dɣ ezzeman wa dɣ yǎmos Hérodes ǎmǎnokal n ǎkal n Yehudiya, illé amɣar n imerubay iyyen iǧan isem Zakariya, elant kél Abya. Hennis isem ennét Elizabét telét tawsit iyyet n dg Harun. 
Essin éssen olaɣen dat Yaḷḷah, eknan ǎlekam i elḥaq d elwaṣiya tin Émeli. 
Beššan wr elén arrawen, édét Elizabét tǎmeǧǧaǧrut, essin éssen weššaren daɣ. 
Ahel iyyen, itag Zakariya eššeɣel ennét dat Yaḷḷah édét tewaḍ tn-d meléla nsn enta d winnét. 
Hund awa tenna elɣada tan imerubay, eǧen iseɣéren, yeqqel folas émér n éd yeǧǧeh dɣ Éhen wa Heddigen n Émeli, éd ds yeǧ ikrora. 
A yekka Zakariya isikrurut, ǎddunet emdan timihuden dɣ ténéré. 
Émér héndɣ yos-d ǎngelos iyyen n Émeli dat Zakariya, yebded aɣil wan aɣil n elmejmer wan ikrora. 
As-t yeney Zakariya, yeǧa tǎremméq mǎqqeret ezzar yeksoḍ hullan. 
Beššan yenna has ǎngelos : « Wr teksoḍed, Zakariya, Yaḷḷah yesla i awa tettered : hennik, Elizabét, éd tekreh arraw, eǧ as isem Eḥya. 
Éd key-d tas tǎdǎwit mǎqqeret, ǎddunet aggotnén éd eddewén fol tiwit ennét. 
Edét éd yumas imaqqeren dat Émeli. Wr éd isas elboẓa ula a yǎmosen tésesé texmaret wl iyyet. Déndɣ d éd yeǧǧeh tesa n mas, éd yeṭker Unfas Heddigen. 
Éd yer Israyiliten ǎǧǧotnén dɣ ǎbǎreqqa n Émeli, Messineɣ nsn. 
Éd yeglâ dat Émeli s eṣṣahet d unfas win ennebi Eliya, baš éd iẓuheẓ ulawen n abbaten d meddansn ; baš éd-d isuɣel wi efelnén ǎbǎreqqa, éd tn-d yer s tayetté ta karrehen ǎddunet wi elenén udem dat Yaḷḷah ; hund awéndɣ éd isebded ǎddunet ojadnén i Émeli. » 
Yenna Zakariya i ǎngelos : « Menék awa hé eǧeɣ éd elmedeɣ as tidet a tgannéd ? Édét nk amɣar a ǎmoseɣ, henni aked enta weššar. » 
Yenna has ǎngelos : « Nk Jibril wa ibaddeden dat Yaḷḷah, ǎméheleɣ-d ɣork, éd hak siwleɣ, éd hak elleɣuɣ isǎlan wiɣ n elxér. 
Awah tidet a hak ennéɣ, tidet hé tetbetet dɣ émér ennét ; beššan wr hi teflésed, fol awén éd yeṭṭef émi ennek, ǎbas teddobéd awal ar émér héndɣ. » 
Émér héndɣ, ǎddunet eqqalen i Zakariya, ǎkunen folin yeqqim-in a yeǧǧén dɣ Éhen wa Heddigen. 
As zernah yeǧmeḍ-d, wr yeddobet éd hasn isiwel, elmeden as yemun as-d heret iyyen dɣ éhen wanǧam. Yeǧa sn tǎloǧamt beššan yendar as awal. 
Adih as yesmenda Zakariya iheḍan ennét n ǎƹebad, yeqqel tǎɣǎhamt ennét. 
Okeyen iheḍan, tessimrew Elizabét. Teffer awén semmoset tlil. Tenna dɣ iman ennét : 
« Awah ahi yeǧa Émeli : as foli yesres ǎsewaḍ ennét, yekkes ahi teɣaššimt ta eléɣ ǧér ǎddunet. » 
As okeynet seḍiset tlil, yesséwey Yaḷḷah ǎngelos ennét Jibril s taɣremt iyyet dɣ ǎkal n Jalila, teǧat isem Ennaṣira, 
ɣor tǎmawaṭ iyyet teǧat isem Meryem, teggibbel i Yusef. Yusef wah, aheya n ǎmǎnokal Dawud. 
Yeǧǧeh-in ds ǎngelos, yenna has : « Esselam folm ! Km ta telet tǎhanint mǎqqeret n Émeli wa dm yeddéwen, teboreked ǧer téḍéḍén emdanet. » 
Tǎkun Meryem hullan fol awa has yenna, wr tessén elmeƹna n ǎseslam wah. 
Yenna has ǎngelos : « Wr teksoḍed, Meryem, édét Yaḷḷah yesres folm tǎhanint ennét. 
Adih éd tsimrewed, éd tekrehed arraw, éd has teǧed isem Ƹisa. 
Éd yeqqel imaqqaren, éd has itahawal Ag Ǎmaṭkal. Éd-t yekf Émeli Yaḷḷah eṭṭebel wan tis Dawud, 
éd imnukel ar abedǎh fol iheyawen n Yaƹqub, temenukela ennét wr éd temmendu. » 
Tenna has Meryem : « Man emmek n awén ? Edét nk wr ezzéyeɣ médden ?” 
Yenna has ǎngelos : « Unfas Heddigen éd-d yeres folm d eṣṣahet tan Ǎmaṭkal éd km yewer hund télé. Fol awéndɣ arraw wa yeqquddesen hé yiwin, éd i has itahawal Ag Yaḷḷah. 
Ekid, aked wlt mam Elizabét, dɣ tewehré ennét tessimrew, enta tas itahawal tǎmeǧǧaǧrut, teǧǧeh tallit ennét tan seḍiset. 
Edét ula indaren i Yaḷḷah. » 
Tenna has Meryem : « Taklit n Émeli a ǎmoseɣ, yeǧét awas i tennéd. » Ifel tt ǎngelos émér héndɣ. 
Adih tenker Meryem dɣ iheḍan windɣ, tegla terored, tekka aɣrem iyyen dɣ tidreɣén n ǎkal wan Yehudiya. 
Teǧǧeh tǎɣǎhamt tan Zakariya, tesseslem Elizabét. 
Adih déndɣ d tesla Elizabét awal wan Meryem, tofrey i arraw ennét yeggad s tǎdǎwit dɣ tesa ennét. Émér héndɣ yeṭker tt Unfas Heddigen has yeswennen awah, 
teṭkel Elizabét emesli ennét, tenna : « Yekfim Émeli elbaraka ennét ǧer téḍéḍén emdanet, elbaraka ennét tella fol arraw wa ihen tesa ennem ! 
Ma ǎmoseɣ as hi-d tas mas n Émeli-hin ? 
Édét, ekid, émér wéndɣ d-esléɣ i ǎseslam ennem, arraw wa ihan tesa hin yegged s tǎdǎwit. 
Tengeḍ-am km ta teflaset édét éd yetbet awas ham yenna Émeli !” 
Dédih tenna Meryem : « S enniyetin, éd simɣereɣ Émeli, 
ulin yeddiwet fol Yaḷḷah, emaɣlasin, 
édét yesres foli akeyad ennét, nk ta wrt tǎmos ar taklit ennét. Edét mn dimaɣ ar abedǎh, ayt Adem, éd hi gannen : tengeḍ am, 
édét Ǎneddabu yeǧa ahi a yeggén n tihusay. Enta was isem ennét yeqquddes, 
yǎmos tamella i wi-t ekṣoḍnén dɣ iwetyan ikét nsn ; 
yessekna terna n ǎfus ennét : yezmezzey ǎddunet wi yeṭker ettekebbor dɣ ulawen nsn. 
Yesres imenokalen d temenukela nsn, yeṭkel wi meḍruynén. 
Yeɣmer wi yeŋɣa laẓ, yesɣer wi eɣmernén. 
Yellil i Israyil, wa yǎmosen akli ennét : wr yettuwet tamella tas yenna éd tt yekf i abbaten nnɣ, 
Ibrahim d iheyawen ennét, ar abedǎh. » 
Teqqim Meryem ɣor Elizabét ɣor keraḍet tlil, ezzar teqqel ihenan ennét. 
Yéweḍ émér wan térwa tan Elizabét, tekreh arraw. 
Inaraǧen ennét d ǎddunet ennét, elmeden tamella ta mǎqqeret has iǧa Émeli, oheren ds tǎdewit. 
As okeyen ettam iheḍan ḍeffer tiwit, osen-d éd ezzeyenén arraw, eɣélen éd has eǧin isem n tis, Zakariya. 
Beššan tuǧey asn mas, tenna hasn : « Kela, éd yeǧ isem Eḥya. » 
Ennen as : « Wrt illé ǎwadem wl iyyen dɣ ǎddunet ennem iǧan isem wan Eḥya !” 
Ezzar essestenen s tǎloǧamt tis n arraw, essestenent d isem was yera éd-t yeǧ i rurés. 
Yesseǧmey Zakariya elloḥ wa fol yekteb awah : « Isem ennét Eḥya. » Yeskerebbetten awén. 
Γor déndɣ ǎméren émi d iles win Zakariya, yesnemmer Yaḷḷah yeṭkal awal ennét. 
Inaraǧen emdan eksoḍen, efelen isǎlan édeg wéndɣ eɣleyen tidreɣén emdanet tin ǎkal wan Yehudiya. 
Emdan wi has eslenén, yǎmos asn ettexmima, gannén : « Ma hé yumas arraw waɣ ? » Yemun as yesiwert Émeli ǎfus ennét. 
Zakariya, tis n arraw, yeṭkert Unfas Heddigen, iǧa awal n ennebi, yenna awah : 
« Tebareka Émeli, Messineɣ n Israyil, wa hin yosen, yennejja ellamet ennét. 
Yesséwey anɣ-d Ǎmaɣlas mǎqqeren dɣ iheyawen n akli ennét Dawud. 
Awén awa yeswenna i ennebiten ennét wi eqqudesnén wan éru : 
Yenna haneɣ éd haneɣ yennej fol ihenǧa nnɣ, d imiksenen nnɣ. 
Yessekna tamella i abbaten nnɣ, ikuttu téséq ennét ta teqquddeset. 
Awén, tahoḍé tas yeǧa Messineɣ i abba nnɣ Ibrahim éd hanɣ tt yekf, 
yenna has éd hanɣ yennej fol ihenǧa nnɣ, éd haneɣ yey éd-t neƹbed wr neksoḍ, 
neqquddes, neẓẓal dats dɣ tǎmeddort nnɣ temda. 
Key, arrawin, éd tumased ennebi n Ǎmaṭkal, édét éd tegled dat Émeli, éd has zehhuseyed ǎbǎreqqa ennét 
baš éd iselmed elɣelas i ǎddunet ennét s ǎsaruf n ibekkaḍen nsn, 
s tamella n ul n Messineɣ nnɣ. Hund awéndɣ éd d yas folnɣ yǎmos taffawt n ihokhaken, 
baš éd yeǧ taffawt i wi eqqimen dɣ tihay n éheḍ d dɣ télé n tǎmettant, éd hanɣ isuman ǎbǎreqqa wan esselamet. » 
Idaggel arraw, ikarreh tayetté. Yeqqim dɣ ikalen win tinariwen ar ahel wa-d yosa ǧér ǎddunet win Israyil.