प्रकाश.
15.
जिं हानं स्‍वर्गय्‌ तसकं हे तःधंगु अजूचायापुगु छगू चिं खना। न्‍हय्‌म्‍ह स्‍वर्गदूततय्‌सं दकलय्‌ लिपायागु न्‍हय्‌गू महामारी कयातल। परमेश्वरयागु तं थुमिगु पाखें हे क्‍वचाइ। 
अले जिं मि ल्‍वाकज्‍याःगु न्‍हाय्‌कंयागु समुद्र थें खना। पशु, वयागु मूर्ति व वयागु नांयागु ल्‍याःयात त्‍याकाः परमेश्वरं बियादीगु वीणा कयातःपिन्‍त जिं न्‍हाय्‌कंयागु समुद्रय्‌ दनाच्‍वंगु खना। 
परमेश्वरया दास मोशां च्‍वयातःगु म्‍ये व भ्‍याःचायागु छपु म्‍ये इमिसं थुकथं हाल -- “दक्‍वसिबय्‌ तःधंम्‍ह व शक्ति दुम्‍ह प्ररमप्रभु परमेश्वर, छिं यानादीगु ज्‍या तसकं तःधं व अजूचायापु। जाति जातिया जुजु, छिगु लँपु सत्‍य व पाय्‌छि जु। 
हे परमप्रभु, सु जक छि खनाः मग्‍याइ? सुनां जक छिगु नांयात तःधं धकाः मानय्‌ मयाइ? छि हे जक पवित्रम्‍ह खः। छिगु पाय्‌छिगु बिचाः व न्याय फुक्‍कसिनं सी धुंकूगुलिं फुक्‍क जातित छिथाय्‌ छितः आराधना यायेत वइ।” 
अनंलि जिं स्‍वर्गय्‌ परमेश्वरया देगः चालाः अन दुने च्‍वंगु महापवित्र थाय्‌ खन। 
यचुसे व थीगु तुयुगु वसः फिना तःपिं अले छातिइ लुँयागु बालां हिनातःपिं न्‍हय्‌म्‍ह स्‍वर्गदूतत देगलं न्‍हय्‌गू महामारी ज्‍वनाः पिहां वःगु जिं खना। 
अले व प्‍यम्‍ह मध्‍ये छम्‍ह जीवात्‍मां न्‍ह्याबलें म्‍वाना च्‍वनिम्‍ह परमेश्वरयागु तं जाय्‌क दुगु न्‍हय्‌गः लुँयागु ख्‍वल्‍चा न्‍हय्‌म्‍ह स्‍वर्गदूततय्‌त बिल। 
परमेश्वरयागु महिमा, हनाबना व शक्तिं पिहां वयाच्‍वंगु कुं देगः छगलं जाल। न्‍हय्‌म्‍ह स्‍वर्गदूततय्‌सं छ्वया हःगु न्‍हय्‌गू महामारी सिमधतले अन सुं नं दुहां वने मफु।