प्रकाश.
7.
अनं लिपा सिमा, समुद्र व पृथ्‍वीइ फय्‌ वने मजीक प्‍यम्‍ह स्‍वर्गदूतत पृथ्‍वीयागु प्‍यंगू कुन्चाय्‌ च्‍वनाः फय्‌ प्‍वाः तिनाच्‍वंगु जिं खना। 
म्‍वाःम्‍ह परमेश्वरयागु छाप ज्‍वनाः सूर्य लुइगु थासं थहां वयाच्‍वंम्‍ह छम्‍ह स्‍वर्गदूतयात जिं खना। अले वं समुद्र व पृथ्‍वीयात स्‍यंकेगु अधिकार बिया तःपिं प्‍यम्‍ह स्‍वर्गदूततय्‌त तसकं हालाः थथे धाल। 
“झी परमेश्वरया दासतय्‌गु कपालय्‌ छाप मततले सिमा, समुद्र, व पृथ्‍वीयात स्‍यंके मते।” 
इस्राएलया फुक्‍क कुलं छगू लाख व पीप्‍यद्वः मनूतय्‌त छाप तःगु जिं ताया। 
यहूदाया कुलं ......... १२,००० म्‍ह, रूबेनया कुलं ........... १२,००० म्‍ह, गादया कुलं ............. १२,००० म्‍ह, 
आशेरया कुलं ........ १२,००० म्‍ह, नप्‍तालीया कुलं ....... १२,००० म्‍ह, मनश्‍शेया कुलं ......... १२,००० म्‍ह, 
शिमियोनया कुलं .... १२,००० म्‍ह, लेवीया कुलं ............ १२,००० म्‍ह, इस्‍साखारया कुलं ..... १२,००० म्‍ह, 
जबूलूनया कुलं ....... १२,००० म्‍ह, योसेफया कुलं .......... १२,००० म्‍ह, बेन्‍यामीनया कुलं ...... १२,००० म्‍ह। 
थुलि जुइ धुंकाः जिं स्‍वयाबलय्‌ जात जातियापिं मनूत, कुल कुलयापिं मनूत व फुक्‍क देश देशयापिं मनूत, थी थी भासं नवाइपिं मनूत तुयुगु वसतं पुनाः ल्‍हातिइ ताय्‌गः सिमायागु कचा ज्‍वनाः सिंहासन व भ्‍याःचाया न्‍ह्यःने दनाच्‍वंगु जिं खना। 
इपिं थुकथं ततसलं हाल -- “सिंहासनय्‌ फ्‍यतुनादीम्‍ह झी परमेश्वरयाके व भ्‍याःचायाके हे जक मनूतय्‌त उद्धार यायेगु अधिकार दु।” 
फुक्‍क स्‍वर्गदूतत सिंहासन, थकालिपिं व प्‍यम्‍ह जीवात्‍मातय्‌गु चाकःछिं दनाच्‍वन। थुपिं फुक्‍कसिनं सिंहासनयागु न्‍ह्यःने भागि यानाः थथे धकाः परमेश्वरयात तःधंकल। 
“आमेन! परमेश्वरयागु प्रशंसा, महिमा, ज्ञान, सुभाय्‌, मान, शक्ति व बल न्‍ह्याबलें दयाच्वनेमा। आमेन!” 
अले छम्‍ह थकालिं जितः थथे धाल -- “थ्‍व तुयुगु वसतं फिना तःपिं सु खः, अले इपिं गनं वःपिं खः धकाः छं स्‍यू ला?” 
“प्रभु, छिं जक स्‍यू” धकाः जिं वयात लिसः बिया। अले वय्‌कलं धयादिल -- “तसकं तःधंगु दुःखकष्‍ट सह याना वःपिं मनूत इपिं हे खः। इमिसं भ्‍याःचायागु हिं थःथःगु वसः हियाः थथे तुयुसे च्‍वंका तःगु खः। 
उकिं हे ला खःनि, आः परमेश्वरया सिंहासनया न्‍ह्यःने च्‍वनाः चच्‍छि न्‍हिच्‍छिं देगलय्‌ हे च्‍वनाः वय्‌कःया सेवा यानाच्‍वनी। सिंहासनय्‌ दीम्‍हय्‌सिनं हे इमिगु दथुइ च्‍वनाः रक्षा यानादी। 
अन इमित गुबलें हे नयेपित्‍याइ मखु, प्‍याःचाइ नं मखु। निभालं व गुगुं क्‍वाः जलं इमित पुइ मखु। 
सिंहासनयागु दथुइ च्‍वंम्‍ह भ्‍याःचा हे इमित जइम्‍ह जुइ। अले इमित वय्‌कलं हे गुबलें मसुइगु बुंगाःचाय्‌ ब्‍वना यंकादी। अले परमेश्वरं हे इमिगु मिखाय्‌ च्‍वंगु ख्‍वबि हुयादी।”