१ यूहन्‍ना.
3.
स्‍व, परमेश्वर बाःनं झीत गुलि माया यानादीगु दु। उकिं हे झीत परमेश्वरया सन्‍तान धकाः धाःगु खः, धात्‍थें खः नं खः। अय्‌जूगुलिं हे थ्‍व संसारयापिं मनूतय्‌सं झीत म्‍हमस्‍यूगु, छाय्‌धाःसा इमिसं वय्‌कःयात म्‍हमस्‍यू। 
आय्‌ जि यःपिं मस्‍त, आः ला झीपिं परमेश्वरया सन्‍तान खः धकाः झीसं स्‍यू। अय्‌नं लिपा झीपिं गज्‍याःपिं जुइ धयागु खँ झीत कना मदीनि। अय्‌सां ख्रीष्‍ट झायादीबलय्‌ झीपिं वय्‌कः थें हे जुइतिनि धकाः झीसं स्‍यू। अले तिनि वय्‌कः गथे च्‍वं धकाः झीसं खनी। 
थथे ख्रीष्‍टयाके आशा याना च्‍वंपिं वय्‌कः थें पवित्र जुयाः च्‍वने माः। 
सुनां पाप याइ वं व्‍यवस्‍था मानय्‌ मयाःगु जुइ, छाय्‌धाःसा व्‍यवस्‍था मानय्‌ मयायेगु हे पाप खः। 
झीगु पाप मदय्‌केत हे ख्रीष्‍ट झायादीगु खः। ख्रीष्‍टयाके पाप द हे मदु। 
ख्रीष्‍टयाके च्‍वना च्‍वंपिन्‍सं पाप याइ मखु। पाप याना च्‍वनिम्‍ह मनुखं ख्रीष्‍टयात गुबलें हे खनी नं मखु, म्‍ह नं सी मखु। 
अय्‌ जि यःपिं मस्‍त, छिमित सुनानं मखुगु लँय्‌ यंके मफयेमा। गथे ख्रीष्‍ट धर्मी खः अथे हे भिंगु ज्‍या याइपिं मनूत नं धर्मी खः। 
शैतानं न्‍हापांनिसें पाप याना वयाच्‍वंगु दु, उकिं पाप यानां तुं च्‍वनिपिं मनूत नं शैतानया मनू खः। अथे जूगुलिं शैतानयागु ज्‍या स्‍यंकेत परमेश्वरया काय्‌ थन झायादी माःगु खः। 
परमेश्वरया पाखें बूम्‍हय्‌सिनं पाप यानां तुं च्‍वनी मखु, छाय्‌धाःसा इपिं वय्‌कः थें जुइ। अले वय्‌कः हे इमि बाः जूगुलिं नं इमिसं पाप यानां तुं च्‍वने फइ मखु। 
परमेश्वरया सन्‍तान व शैतानया सन्‍तान थुकिं हे बांलाक सी दइ। बांलाःगु भिंगु ज्‍या मयाइम्‍ह, अले थः दाजुकिजापिन्‍त माया मयाइम्‍ह मनू परमेश्वरया सन्‍तान मखु। 
थःथवय्‌ माया याना च्‍वने माः धकाः धाःगु खँ ला छिमिसं न्‍हापांनिसें हे न्‍यनातःगु दु। 
झीपिं कयिन थें जुइ मज्‍यू। कयिन शैतानया मनू जूगुलिं वं थः हे किजा हाबिलयात स्‍यात। कयिनं थः हे किजायात छाय्‌ स्‍यात? कयिन शैतानया मनू जूगुलिं वया किजां भिंगु बांलाःगु याना जूगु स्वये मफयाः वं थः किजायात स्‍यात। 
यःपिं दाजुकिजापिं, उकिं थ्‍व संसारयापिं मनूतय्‌सं छिमित हेला यात धकाः छिपिं अजूचाये माःगु मदु। 
झी मृत्‍युं जीवनय्‌ न्‍ह्याये धुन धयागु थुकिं हे सी दु। झीसं थः दाजुकिजापिन्‍त माया याना। थः दाजुकिजापिन्‍त माया मयाइम्‍ह मनू कालयागु ल्‍हातय्‌ हे लानाच्‍वनी। 
दाजुकिजापिन्‍त हेला याइम्‍ह मनू ज्‍यानमारा खः। अले ज्‍यानमारायाके अनन्‍त जीवन दइ मखु। 
थुकथं झीसं माया धयागु छु खः धकाः स्‍यू -- झीगु निंतिं ख्रीष्‍ट सिनादिल, उकिं झीसं नं झी दाजुकिजापिनिगु निंतिं सीत तकं लिफः स्वये मज्‍यू। 
तःमिम्‍ह मनुखं थः दाजुकिजापिनि नये मखं धकाः सियाः नं इमित माःगु ग्‍वाहालि मब्‍यूसा, अज्‍याःम्‍ह मनुखं परमेश्वरयात माया याना धकाः गथे धाये फइ? 
अय्‌ जि यःपिं मस्‍त, झीसं म्‍हुतुं जक माया याना धयां मज्‍यू। ज्‍याखँय्‌ नं धात्‍थेंगु माया याना क्‍यने फये माः। 
थुकिं हे झीपिं सत्‍यपिं खः धकाः सीका काये फु। अले परमेश्वरया न्‍ह्यःने धुक्‍कं च्‍वने फु। 
झीत झीगु हे नुगलं दोषी ठहरय्‌ याइ धाःसा परमेश्वर ला झीगु नुगः स्‍वयाः नं तःधं। वय्‌कलं मस्‍यूगु छुं नं मदु। 
अय्‌जूगुलिं यःपिं दाजुकिजापिं, झीगु मनं झीत दोषी ठहरय्‌ मयाःसा झीपिं परमेश्वरया न्‍ह्यःने ग्‍याये माली मखु। 
वय्‌कलं धयादीगु मानय्‌ जुयाः वय्‌कःयात यःयःगु जक याना जूसा वय्‌कःयाके न्‍ह्यागु फ्‍वंसां झीत बियादी। 
वय्‌कलं झीत आज्ञा यानादीगु थ्‍व हे खः -- वय्‌कःया काय्‌ येशू ख्रीष्‍टयात झीसं विश्वास याये माः। दाजुकिजापिन्‍त माया यानाच्‍वने माः। थथे हे याना च्‍वँ धकाः ख्रीष्‍टं नं झीत धयादीगु दु। 
परमेश्वरयागु आज्ञा मानय्‌ याना च्‍वंम्‍ह मनू वय्‌कः नाप दइ, अले वय्‌कः व नाप दइ। झीगु नुगलय्‌ पवित्र आत्‍मा तयादीगुलिं झीसं थ्‍व स्‍यू।