१ यूहन्‍ना.
1.
न्‍हापांनिसें जीवन बीगु वचन दु। थ्‍व हे वचनया बारे जिमिसं च्‍वयाच्‍वनागु दु। थ्‍व हे वचन जिमिसं न्‍यनागु नं दु। जिमिगु हे मिखां खनागु नं दु, बांलाक स्‍वयागु नं दु, ल्‍हातं थियागु नं दु। 
गुबले थ्‍व वचन जीवन जुयाः जिमिथाय्‌ खनेदय्‌कः झाल, उबलय्‌ थ्‍व जीवनयात जिमिसं खना, जिमिसं साक्षी बी, अले छिमित नं धाये। थ्‍व बाःयाके दुगु अनन्‍त जीवन जिमिथाय्‌ खनेदय्‌कः झाल। 
जिमिसं न्‍यनागु व खनागु फुक्‍कं न्‍यंकागु दु। जिमिगु संगति बाः नाप व परमेश्वरया काय्‌ येशू ख्रीष्‍ट नाप दुगुलिं छिमिसं नं जिपिं नाप संगति याये फयेमा धकाः थथे धयाच्‍वनागु खः। 
थथे जिमिसं छिमित च्‍वयाः कना च्‍वने दुगुलिं जिपिं तसकं लय्‌ताः। 
परमेश्वरया काय्‌नं बियादीगु शिक्षा हे जिमिसं छिमित बियाच्‍वना। परमेश्वर जः खः। वय्‌कःयाके खिउँ हे मदु। 
झी वय्‌कःयागु संगतिइ दु धयाः खिउँगुलिइ तुं च्‍वनाच्‍वन धाःसा झीपिं ज्‍याखँ निताय्‌ नं फताहा जुइ। 
वय्‌कः जः जूथें, झीपिं नं जलय्‌ च्‍वनाच्‍वन धाःसा छम्‍ह मेम्‍हनापं संगतिइ जुइ, अले परमेश्वरया काय्‌यागु हिं झीगु दक्‍व पाप पाखें शुद्ध यानादी। 
झीसं “झीके पाप मदु” धकाः धाःसा झीसं थःपिन्‍त हे ध्‍वखा ब्‍यूगु जुइ, अले सत्‍ययात मानय्‌ मयाःगु जुइ। 
अय्‌नं झीसं थःगु पाप मानय्‌ यात धाःसा परमेश्वरं झीगु पाप क्षमा यानादी, अले झीगु मनय्‌ च्‍वंगु फुक्‍क पाप नं च्‍वत्तुक हुयादी, छाय्‌धाःसा वय्‌कः भरोसा याये बहःम्‍ह व धर्मीम्‍ह खः। 
“झीसं गुबलें हे पाप मयाना” धकाः धाल धाःसा झीसं परमेश्वरयात फताहा याःगु जुइ। अले वय्‌कःयागु वचन झीके दइ मखु।