१ पत्रुस.
2.
अय्‌जूगुलिं आवंनिसें छिपिं मभिंपिं मनूत जुइ मते। सुयातं थगय्‌ याये मते, निपाः ख्‍वाःपाः दुपिं जुइ मते, कर्पिन्‍त डाहा याये मते, अले मेपिन्‍त मभिंकाः खँ ल्‍हाये मते। 
नकतिनि बूम्‍ह मचां दुरु त्‍वनेगु इच्‍छा याःथें छिमिसं नं परमेश्वरयागु वचन ब्‍वनेगु इच्‍छा या। अले तिनि छिपिं ब्‍वलनाः मुक्तिया निंतिं न्‍ह्यज्‍याये फइ। 
प्रभु भिं धकाः ला छिमिसं सी हे धुंकल। 
वय्‌कः मनूतय्‌सं ज्‍यालगय्‌ मजू धकाः चीकूगु, अय्‌नं परमेश्वरं ल्‍ययादीगु, म्‍वाःगु व तःजिगु ल्‍वहं खः। उकिं प्रभुयाथाय्‌ वा। 
अले छिपिं नं म्‍वाःगु ल्‍वहं जुयाः आत्‍मायागु छेँ दनेत ज्‍यालगय्‌ जूपिं जुया च्‍वँ। छिपिं परमेश्वरयात यःकथं येशू ख्रीष्‍टपाखें पवित्र आत्‍मां धाःथेंज्‍याःगु बलिदान बीपिं पुजाहारीत नं खः। 
थ्‍व हे खँ धर्मशास्‍त्रय्‌ थथे च्‍वया तःगु दु -- “स्‍व, जिं ल्‍यया तयागु छगः तसकं हे थिकेगु मूल्‍वहं सियोनय्‌ तये, अले उकियात विश्वास याःपिन्‍सं लज्‍या चाये माली मखु।” 
उकिं छिपिं विश्वास याःपिनिगु निंतिं थ्‍व तसकं तःजिगु खः। तर विश्वास मयाःपिनिगु निंतिं ला -- “दकःमितय्‌सं ज्‍यालगय्‌ मजूगु धकाः धाःगु ल्‍वहं हे कुंयागु मूल्‍वहं जुल।” 
हानं मेथाय्‌ थथे च्‍वया तःगु दु -- “थ्‍व हे ल्‍वहँतय्‌ मनूत लुफिं हानाः क्‍वदइ।” परमेश्वरयागु वचनय्‌ विश्वास मयाःगुलिं इपिं थथे लुफिं हानाः क्‍वदइ। अले परमेश्वरं क्‍वःछिना तयादीगु सजाँय फयेमाली। 
छिपिं ला ल्‍यया तःपिं, जुजुया पुजाहारी, पवित्रपिं व परमेश्वरया थः हे मनूत खः। वय्‌कःयात तःधंका जुइत हे छिमित खिउँथासं वय्‌कःया अजूचायापुगु जलय्‌ हयादीगु खः। 
न्‍हापा छिपिं परमेश्वरया मनूत मखु, आः जुइ धुंकल। न्‍हापा छिमिसं वय्‌कःयागु दया माया काये मखं, आः काये खंगु दु। 
यःपिं दाजुकिजापिं, थ्‍व संसारय्‌ छिपिं कर्पिं व परदेशीत थें खः। अय्‌जूगुलिं आत्‍मा नापं न्ह्याबलें ल्‍वाना च्‍वनिगु शरीरया इच्‍छा पाखें तापाक च्‍वँ धकाः जिं छिमित बिन्‍ति यानाच्‍वनागु दु। झीत यःगु जक ज्‍याखँ यात धाःसा झीगु आत्‍मा पापय्‌ लाइ। 
परमेश्वरयात म्‍हमस्‍यूपिं मनूतय्‌गु न्‍ह्यःने छिमिसं थःगु चालचलन बांलाका जु। छिमित आः मभिंका जूसां ख्रीष्‍ट येशू झायाः न्‍याय यानादीबलय्‌ छिमिसं याःगु भिंगु ज्‍याखँ इमिसं सीकी, अले परमेश्वरयात तःधंकी। 
प्रभुयात तःधंकेत तःधंपिं मनूतय्‌सं धाःगु मानय्‌ या। व दक्‍वसिबय्‌ तःधंम्‍ह जुजु हे थजुइमा, 
तःधंम्‍ह हाकिम हे थजुइमा। मभिंगु ज्‍या याना जुइपिन्‍त सजाँय बीत व भिंगु ज्‍या याना जुइपिन्‍त हनेत परमेश्वरं हे इमित छ्वया हयादीगु खः। 
छिमिसं थथे भिंगु ज्‍या याना हे छुं मस्‍यूपिं मूर्खतय्‌गु म्‍हुतुप्‍वाः तिके फयेमा धयागु परमेश्वरयागु इच्‍छा खः। 
स्‍वतन्‍त्र जुया च्‍वँ। अथे धकाः मभिंगु ज्‍या याना जुइ मते, बरु परमेश्वरया दासत थें जुया च्‍वँ। 
फुक्‍कसित हनाबना तयेगु या। दाजुकिजापिन्‍त माया या। परमेश्वरयागु ग्‍याःभय का। जुजुयात हनेगु या। 
च्‍यः भ्‍वातिंतय्‌सं थः मालिकं धाःगु खँ न्‍यने माः। भिंम्‍ह मालिकयागु जक मखु, मभिंम्‍ह मालिकं धाःगु खँ नं न्‍यने माः। 
थथे छिमिसं परमेश्वरयागु निंतिं भिंगु ज्‍याखँ याना नं दुःखकष्‍ट फये माल धाःसा परमेश्वरं छिमित आशिष बियादी। 
मभिंगु ज्‍या यानाः सजाँय फये मालिगु ला जु हे जुल। भिंगु ज्‍या यानाः नं दुःखकष्‍ट फये माल धाःसा परमेश्वरं आशिष बियादी। 
थथे यायेत हे छिमित परमेश्वरं ल्‍ययादीगु खः। अय्‌जूगुलिं ख्रीष्‍ट थः हे नमुना जुयाः छिमिगु निंतिं दुःखकष्‍ट फयादिल। उकिं छिमिसं नं वय्‌कलं थें याये माल। -- 
“वय्‌कलं गुब्‍सं नं पाप याना मदी। वय्‌कलं मखुगु खँ गुब्‍सं ल्‍हाना मदी।” 
थःत ब्‍वः ब्‍यूपिन्‍त वय्‌कलं ब्‍वः बिया मदी। अय्‌च्‍वंक दुःखकष्‍ट बिलं नं वय्‌कलं ख्‍याच्‍वः बिया मदी, बरु ननिमवासे वय्‌कलं बांलाक न्‍याय यानादीम्‍ह परमेश्वरयाके भरोसा तयादिल। 
वय्‌कः थःम्‍हय्‌सिनं हे झीगु पाप कुबियाः क्रूसय्‌ सिनादिल। अय्‌जूगुलिं झीसं पाप यायेगु मतिइ तकं मतसे परमेश्वरयात यय्‌क भिंगु बांलाःगु जक यानाच्‍वने माः। छिमित मुक्ति बीत ख्रीष्‍ट सिनादीगु खः। 
न्‍हापा छिपिं तंपिं फैचात थें जुयाच्‍वंगु खः। आः छिपिं थः जवाः व सुसाःकुसाः याइम्‍हय्‌सिथाय्‌ वय्‌कः नाप जुइत लिहां वये धुंकल।