१ पत्रुस.
1.
पोन्‍टस, गलातिया, कापाडोकिया, एशिया व बिथिनियाय्‌ वनाः परदेशी जुया च्‍वंपिं परमेश्वरं ल्‍यया तःपिं मनूतय्‌त येशू ख्रीष्‍टया प्रेरित पत्रुसयागु ज्‍वजलपा। 
न्‍हापांनिसें ताःतुनादी थें वय्‌कलं धाःथें याइपिं यायेत पवित्र आत्‍मापाखें छिमित परमेश्वर बाःनं ल्‍ययादीगु खः। अले येशू ख्रीष्‍टयागु हिं शुद्ध यानाः छिमित वय्‌कःयात मानय्‌ याइपिं यानादीगु खः। परमेश्वरयागु दया माया व शान्‍ति छिमित यक्‍व दये मा। 
झी प्रभु येशू ख्रीष्‍टया बाः परमेश्वर न्‍ह्याबलें तःधने मा। वय्‌कलं झीत दया माया यानाः सी धुंकूम्‍ह येशू ख्रीष्‍टयात म्‍वाकाः झीत तसकं तःधंगु व म्‍वानाच्‍वंगु आशाया निंतिं न्‍हूगु जीवन बियादिल। 
परमेश्वरं वय्‌कःया मनूतय्‌त स्‍वर्गय्‌ गुबलें आशां मद्याइगु, न्‍हना मवनिगु, फुना मवनिगु सम्‍पत्ति तयादीगु दु। 
परमेश्वरयात छिमिसं क्‍वात्तुक विश्वास यानाच्‍वंगुलिं वय्‌कःयागु शक्तिं छिमित मुक्ति बियादी। दकलय्‌ लिपा थ्‍व मुक्ति छिमिगु न्‍ह्यःने खने दः वइ। 
अय्‌जूगुलिं छिमिसं आः न्‍ह्याक्‍व दुःखकष्‍ट फये माःसां दिक्‍क चाये मते। लिपा ला छिपिं तसकं लय्‌ताय्‌ खनी। 
थुकिं ला झन जक छिमिगु विश्वास शुद्ध व भिं धकाः क्‍यनी। स्‍यना वनिगु लुँ ला मिइ तयाः जाँचय्‌ याना स्‍वइ। छिमिगु विश्वास ला लुँ स्‍वयाः यक्‍वं भिं। अय्‌जूगुलिं येशू ख्रीष्‍ट झायादीबलय्‌ छिमित नं तःधंकी, च्‍वय्‌ तइ, अले धन्‍यपिं धकाः धाइ। 
वय्‌कःयात छिमिसं मखंनिसां माया यानाच्‍वंगु दु। आः नं वय्‌कःयात छिमिसं मखंनि, अय्‌नं छिमिसं विश्वास यानाच्‍वंगु दु। अले धयां मब्‍याक छिपिं लय्‌तायाच्‍वंगु दु। 
वय्‌कःयात विश्वास यानाच्‍वंगुलिं छिमिगु आत्‍मां मुक्ति काये खंगु दु। 
छिमित दइगु थ्‍व हे मुक्तियागु खँ, न्‍हापायापिं अगमवक्तातय्‌सं मथुयाः थुइकेत यक्‍व हे कुतः यात। 
ख्रीष्‍टयागु आत्‍मां इमित ख्रीष्‍टं दुःखकष्‍ट फये माली, अले हानं तसकं तःधनी धकाः धाःगु खँ अगमवक्तातय्‌सं गुबलय्‌ व गुकथं जुइ धकाः सीकेत स्‍वःगु खः। 
अले परमेश्वरं व अगमवक्तातय्‌त थ्‍व खँ इमिगु निंतिं जुइ मखु, लिपा छिमिगु निंतिं जुइ धकाः धयादिल। स्‍वर्गं छ्वया हःगु पवित्र आत्‍मापाखें भिंगु खँ न्‍यंकीपिन्‍सं छिमित आः न्‍यंकाच्‍वंगु खँयात स्‍वर्गदूततय्‌सं आः तकं थुइकेत स्‍वयाच्‍वंगु दु। 
अथेजूगुलिं छिमिसं थःगु मन थातय्‌ लाकाः होश याना च्‍वँ। येशू ख्रीष्‍ट झायादीबलय्‌ बी तिनिगु परमेश्वरयागु आशिषय्‌ पूरा भरोसा तया च्‍वँ। 
वय्‌कलं धयादी थें च्‍वना च्‍वँ। न्‍हापा मस्‍यूनिबलय्‌ याना जूथें छिमिसं आः नं अज्‍याःगु मभिंगु ज्‍या याना जुइ मते। 
छिमित सःतादीम्‍ह पवित्रम्‍ह खः। अय्‌जूगुलिं न्‍ह्यागु हे ज्‍याखँ याःसां छिमिसं भिंगु मनं याना च्‍वँ। 
थ्‍व हे खँ थथे च्‍वया तःगु दु -- “जि पवित्रम्‍ह जूगुलिं छिपिं नं पवित्रपिं जुया च्‍वँ।” 
प्रार्थना याइबलय्‌ छिमिसं परमेश्वरयात बाः धकाः धया जुल। अय्‌नं वय्‌कः ख्‍वाः स्‍वयाः मखु, बरु मनूतय्‌सं याःगु ज्‍याकथं न्‍याय यानादीम्‍ह खः। उकिं छिमिसं थ्‍व संसारय्‌ परदेशी जुया च्‍वँतले वय्‌कःयात मानय्‌ याना च्‍वँ। 
छिमि तापाःबाज्‍यापिनिगु पालंनिसें याना वयाच्‍वंगु ज्‍यालगय्‌ मजूगु थितिकुतिं छिमित छुतय्‌ यायेत गुलि मू पुले माल, छिमिसं सि हे स्‍यू। थ्‍व लुँ वहः थें नाश जुया वनिगु मखु, 
बरु छुं हे खुन मदुम्‍ह भ्‍याःचा जुयादीम्‍ह ख्रीष्‍टयागु तसकं मू वंगु हिं न्‍यानादीगु खः। 
थथे यायेत परमेश्वरं ख्रीष्‍टयात संसार सृष्‍टि याये न्‍ह्यः हे ल्‍ययादीगु खः। अय्‌जूगुलिं छिमिगु निंतिं वय्‌कः आः फुक्‍कसिया न्‍ह्यःने खंक झाःगु दु। 
वय्‌कलं यानाः हे छिमिसं परमेश्वरयाके भरोसा तये फत। स्‍याये धुंकूम्‍हय्‌सित परमेश्वरं म्‍वाकाः तःधंकादिल। थथे यानादीगुलिं हे छिमिगु विश्वास व आशा परमेश्वरयाके दयाच्‍वंगु खः। 
सत्‍ययात मानय्‌ याःगुलिं छिपिं आः शुद्ध जूगु दु। अय्‌जूगुलिं छिमिसं दाजुकिजापिन्‍त माया याना च्‍वँ। अज्‍जं थःथवय्‌ दुनुगलंनिसें माया याना च्‍वँ। 
छिपिं आः नाश जुया वनिपिं मांबौनं बुइकूपिं मखु, बरु परमेश्वरयागु गुबलें नाश जुया मवनिगु वचनं बूपिं खः। 
धर्मशास्‍त्रय्‌ थथे च्‍वया तःगु दु -- “फुक्‍क मनूत घाँय्‌ थें खः। न्‍ह्याक्‍व बांलाकूसां इपिं स्‍वां थें खः। घाँय्‌ सिना वनी, स्‍वां हाया वनी। 
परमेश्वरयागु वचन धाःसा न्‍ह्याबलें दयाच्‍वनी।” छिमित न्‍यंकूगु भिंगु खँ थ्‍व हे खः।