याकूब.
1.
परमेश्वर व प्रभु येशू ख्रीष्‍टया दास याकूबयापाखें सारा संसारय्‌ न्‍यंक वनाच्‍वंपिं इस्राएलीतय्‌गु झिंनिगू कुलयापिं मनूतय्‌त ज्‍वजलपा। 
दाजुकिजापिं, छिमित न्‍ह्यागु कथंया दुःखकष्‍ट जू वसां लय्‌ ताया च्‍वँ। 
छाय्‌धाःसा छिमिगु विश्वास जाँचय्‌ यात धाःसा झन जक छिमिगु विश्वास बल्‍लाइ। 
थुकथं विश्वास बल्‍लाकाः छिमिसं भरोसा तयाच्‍वनेगु त्‍वःते मते। अले जक छिपिं बल्‍लाइ, छुं नं मगाः मजुइक सिद्ध जुइ। 
छिपिं सुयातं बुद्धि माःसा परमेश्वरयाके फ्‍वँ, अले वय्‌कलं वयात माक्‍व बुद्धि बियादी। वय्‌कलं फुक्‍कसित माक्‍व बुद्धि बियादी, छाय्‌धाःसा वय्‌कः सुयातं छुं बीत नुगः मस्‍याः। 
छिमिसं वय्‌कःयाके फ्‍वनेबलय्‌ वय्‌कलं बियादी धकाः विश्वास याये माः। परमेश्वरं बियादी ला बियामदी ला धकाः मनय्‌ संका तये मज्‍यू। मनय्‌ संका तयाः फ्‍वनिपिं मनूत फसं उखे थुखे याःगु समुद्रया लःद्वम्‍बः थें जुइ। 
अथे मनय्‌ संका तया जुइम्‍ह मनूयात परमेश्वरं छुं हे बियादी मखु। 
थथे दोमन जूम्‍ह मनूयागु ज्‍याखँ थातय्‌ लाइ मखु। 
संसारय्‌ चिधंम्‍ह मनुखं परमेश्वरया न्‍ह्यःने तःधं जुइ दुगुलिइ छ्यं धस्‍वाकी। 
अथे हे तःमिम्‍ह मनू नं चीमि जुइ माःगुलिइ लय्‌ता छाय्‌धाःसा व झ्‍वाः जुयावनिगु ख्‍यलय्‌ च्‍वंगु स्वां थें खः। 
निभालं यानाः घाँय्‌ फुक्‍कं गना वनी, स्‍वां झ्‍वाः जुयाः हाया वनी। अले छतिं बांलाइ मखु। उकथं हे तःमिम्‍ह मनू नं छन्‍हु सिना वनी। 
दुःखकष्‍ट जुयाच्‍वंबलय्‌ नं परमेश्वरयाके भरोसा तया च्वंम्ह मनू धन्‍यम्‍ह खः। अथे दुःखकष्‍ट सी धुंकाः वयात परमेश्वरं वय्‌कःयात माया याःपिन्‍त बी धकाः धयादीगु जीवनयागु श्रीपेच बियादी। 
छुं गथे जुयाः सुं मनू जाँचय्‌ लात धाःसा व मनुखं “परमेश्वरं जितः जाँचय्‌ यात” धकाः धाये मते। छाय्‌धाःसा मभिंगु खं परमेश्वरयात जाँचय्‌ याये फइ मखु, अले परमेश्वरं नं सुयातं स्‍यंकेत जाँचय्‌ लाकादी मखु। 
तर मनूयागु दुनुगलंनिसें हे मभिंगु बिचाः बुया वइ, अले मभिंगु ज्‍या याये मास्‍ति वयाः जाँचय्‌ लाइ। 
उकिं वयागु मतिइ बुया वःगु मभिंगु बिचाः बल्‍लाना वयाः वं पाप याइ। थथे वं पाप याना हे च्‍वन धाःसा व मनू सी धुंकाः नरकय्‌ वनी। 
यःपिं दाजुकिजापिं, थःम्‍हं थःत धोखा बी मते। 
फुक्‍क भिंगु भिंगु व सिद्धगु वरदान च्‍वं, आकाशय्‌ च्‍वंगु फुक्‍क जः सृष्‍टि यानादीम्‍ह परमेश्वरपाखें वःगु खः। परमेश्वर गुबलें हिली मखु, वय्‌कः हिलिगु किचः थें नं मखु। 
वय्‌कलं सृष्‍टि यानादीगु मध्य न्हापांगु फल झीपिं जुइ फयेमा धकाः सत्‍य वचनपाखें झीत थःम्हं ल्ययादीगु खः। 
यःपिं दाजुकिजापिं, थ्‍व खँ ल्‍वःमंके मते -- न्‍यनेगुलिइ चंख जु। बिचाः यानाः जक नवा, अप्‍वः तं पिकाये मते। 
परमेश्वरया न्‍ह्यःने धर्मी जुया च्‍वनेत तं पिकया जुइ मज्‍यू। 
मभिंगु बांमलाःगु ज्‍याखँ त्‍वःता छ्व। छिमित स्‍यना तःगु परमेश्वरयागु वचनयात दुनुगलय्‌ तया ति। थ्‍व हे वचनं छिमित पाप याके मब्‍युसे पापं बचय्‌ याना तये फु। 
वचनयात न्‍यनेगु जक मखु, मानय्‌ नं यायेगु या। थःम्‍हं थःत धोखा बी मते। 
वचन न्‍यं थें मयाइम्‍ह मनू न्‍हाय्‌कनय्‌ थःगु ख्‍वाः स्‍वइम्‍ह थें जुइ। 
थज्‍याःम्‍ह मनुखं थःगु ख्‍वाः न्‍हाय्‌कनय्‌ स्‍वतले खनी। अले हानं थःगु ख्‍वाः गय्‌ च्‍वं धयागु खँ ल्‍वःमंका तुं छ्वइ। 
सुनां मुक्ति बीगु सिद्धगु परमेश्वरयागु व्‍यवस्‍था ब्‍वनाः थुइकाः अथे हे याइ, अले ल्‍वःमंकी मखु, व हे धन्‍यम्‍ह खः। वं याःगु फुक्‍क ज्‍याय्‌ परमेश्वरं आशिष बियादी। 
धर्मीम्‍ह धकाः धया जुइम्‍ह मनुखं न्‍ह्यःने लाःथें नवाना जुइ मज्‍यू। न्‍ह्यःने लाःथें नवाना जुइम्‍ह मनुखं परमेश्वरयात मानय्‌ याना जूगु सितिं वनी। अले हानं थुकथं याना जूम्‍ह मनुखं थःम्‍हं थःत थगय्‌ याइ। 
परमेश्वर बाःयात यःगु भिंगु बांलाःगु धर्म ला मांबौ मदुपिं मस्‍तय्‌त व भाःत मदुपिं मिसातय्‌त दुःख जुइबलय्‌ ग्‍वाहालि यायेगु, अले थ्‍व संसारय्‌ मभिंगु ज्‍याखँ मयासे पवित्र जुया च्‍वनेगु खः।