हिब्रू.
13.
दाजुकिजापिं, थःथवय्‌ माया यायेगु त्‍वःते मते। 
पाहां वःपिन्‍त दुकाय्‌त थाकुचाय्‌ मते। थथे यानाः गुलिसिनं सि हे मस्‍युसे स्‍वर्गदूततय्‌त दुकाःगु दु। 
थःत नं कुना तःगु थें हे ताय्‌काः कुना तःपिनिगु च्‍यूताः ति। दुःख सिया च्‍वंपिन्‍त थःम्‍हं हे दुःख सियाच्‍वना थें च्‍वंक लुमंकेगु या। 
ब्याहायात सकसिनं तःधंके माः। निम्‍हतिपूया दथुइ थः थवय्‌ विश्वास दये माः, छाय्‌धाःसा व्‍यभिचार याइपिन्‍त व ब्‍याहा याये धुंकाः नं मेपिं नाप जुयाः स्‍यनिपिन्‍त परमेश्वरं न्‍याय यानादी। 
धिबायागु लोभं तापाक च्‍वँ। थःके गुलि दु उलिं हे लुधंका च्‍वँ। परमेश्वरं धयादीगु दु -- “जिं छिमित गुबलें त्‍वःते मखु, जिं छिमित गुबलें ल्‍वःमंके नं मखु।” 
अय्‌जूगुलिं झीसं संका मयासे धाये फु -- “प्रभु जितः ग्‍वाहालि यानादीम्‍ह खः। जितः ग्‍याये माःगु मदु। मनूतय्‌सं जितः छुं हे याये फइ मखु।” 
छिमित परमेश्वरयागु वचन स्‍यनिपिं गुरूतय्‌त लुमंकि। इपिं गुकथं म्‍वानाच्‍वन, व स्‍वयाः छिमिसं नं इमिसं थें हे विश्वास यायेगु या। 
येशू ख्रीष्‍ट म्‍हिगः नं थौं नं अले सदां उथें हे जुयादी। 
थी थी कथंया अजूचायापुगु स्‍यनातःगु खं छिमित मखुगु लँय्‌ यंके मफयेमा। नयेत्‍वनेगुलिं मखु, बरु परमेश्वरयागु दया मायां थःगु मनयात बल्‍लाकि, छाय्‌धाःसा नयेत्‍वनेगुलिइ जक जुया च्‍वंपिन्‍त गुब्‍सं भिं जूगु मदु। 
झीगु छगू वेदी दु, गुकी छायेहःगु बलिपाखें पवित्र पालय्‌ ज्‍या याइपिं पुजाहारीतय्‌सं नये मज्‍यू। 
दकलय्‌ तःधंम्‍ह पुजाहारीं महा पवित्रगु थासय्‌ बलियागु हि छाये यनी। अले बांयागु म्‍ह जक छाउनीं पिने यनाः उनाछ्वइ। 
अथे हे येशूयात नं शहरयागु ध्‍वाखां पिने यंकाः स्‍यात। वय्‌कलं थःगु हिं मनूतय्‌गु पाप हुया छ्वयेत थथे याकादिल। 
अय्‌जूगुलिं झीपिं नं वय्‌कःया निंतिं हेला फयाः ध्‍वाखां पिने वय्‌कःयाथाय्‌ वने नु। 
झीगु निंतिं थन सदां दयाच्‍वनिगु शहर मदु। झीपिं ला लिपा वइगु शहरयागु लँ स्‍वया च्‍वनापिं खः। 
अय्‌जूगुलिं झीसं सदां ख्रीष्‍टया नामय्‌ परमेश्वरयात तःधंके माः। थ्‍व झीगु म्‍हुतुं वय्‌कःयात छायेगु बलि खः। 
मेपिन्‍त भिंका जुइगु व ग्‍वाहालि यायेगु ल्‍वःमंके मते। थज्‍याःगुलिं हे परमेश्वर लय्‌तायादी। 
छिमिसं मण्‍डलीया थकालिपिनिगु खँ न्‍यँ, अले इमिसं धाःथें च्‍वँ, छाय्‌धाःसा इमिसं थःगु ज्‍याया ल्‍याःचाः परमेश्वरयात क्‍यनेमाःगुलिं छिमित बांलाक हेरचाह याना तइ। इमित थःगु ज्‍या लसतां याके ब्‍यु, इमित नुगलय्‌ स्‍याके मते। मखुसा छिमित हे बांलाइ मखु। 
जिमिगु निंतिं प्रार्थना याना हे च्‍वँ। जिमित विश्वास दु, जिमिगु नुगः यचुसे च्‍वँ, छाय्‌धाःसा जिमित बांलाःगु ज्‍या जक याये मास्‍ति वः। 
जि छिमिथाय्‌ याकनं वये फयेमा धकाः छिमिसं जिगु निंतिं दुनुगलंनिसें प्रार्थना याना च्‍वँ। 
परमेश्वरं तःधंम्‍ह फैजवाः झी प्रभु येशूयात सीम्‍हं हानं म्‍वाकादीगु दु। अले वय्‌कःयागु हे हिं शान्‍ति बीम्‍ह परमेश्वरं झीपिं लिसे सदांया निंतिं बाचा चिनादीगु दु। 
थ्‍व हे परमेश्वरं छिमित वय्‌कःयात लय्‌ताय्‌केत माक्‍व भिंगु बांलाःगु फुक्‍कं बियादीमा। थुकथं येशू ख्रीष्‍ट पाखें झीपिं वय्‌कःयात यय्‌क म्‍वानाच्‍वने फयेमा। वय्‌कः सदां तःधना च्‍वनेमा। आमेन। 
यःपिं दाजुकिजापिं, चिचाहाकय्‌क जूसां जिं छिमित च्‍वयागु थ्‍व अर्ती छिमिसं बांलाक न्‍यना का। 
झी किजा तिमोथीयात त्‍वःताहःगु खँ जिं छिमित सीके बियाच्‍वना। व थन याकनं वल धाःसा जि वयात ब्‍वनाः आम्‍कन वये। 
छिमि थकालिपिन्‍त व आम्‍कन च्‍वंपिं फुक्‍क विश्वासीतय्‌त ज्‍वजलपा धया ब्‍यु। इटालियाय्‌ च्‍वंपिं विश्वासीतय्‌सं नं छिमित ज्‍वजलपा धया हःगु दु। 
छिपिं फुक्‍कसितं परमेश्वरं दया माया यानादीमा। आमेन।