हिब्रू.
8.
जिमिसं धया च्‍वनागु मूखँ थ्‍व हे खः -- झीके स्‍वर्गय्‌ परमेश्वरया सिंहासनया जवपाखे च्‍वनादीम्‍ह दकलय्‌ तःधंम्‍ह पुजाहारी दी। 
अन वय्‌कलं पवित्रगु थासय्‌ पुजाहारी जुयाः सेवा यानादी। थ्‍व थाय्‌ मनूतय्‌सं दय्‌कूगु मखु, परमेश्वरं हे दय्‌कादीगु खः। 
तःधंपिं पुजाहारीत फुक्‍कं परमेश्वरयात बी हःगु छायेत व बलि बीत तया तःपिं खः। अय्‌जूगुलिं झी दकलय्‌ तःधंम्‍ह पुजाहारीं नं छुं न छुं ला छाये हे माल। 
वय्‌कः थ्‍व संसारय्‌ च्‍वनादीगु जूसा पुजाहारी जुयादी मखुगु, छाय्‌धाःसा व्‍यवस्‍थाय्‌ च्‍वया तःथें छाय्‌छी याइपिं पुजाहारीत ला थन द हे दु। 
इमिसं पुजाहारी जुयाः थन याइगु ज्‍या ला स्‍वर्गय्‌ जूगु ज्‍याखँया किपालु जक खः। मोशायात नं वं पाल ग्‍वयेत्‍यंबलय्‌ परमेश्वरं थथे धयादीगु खः -- “जिं छन्‍त गुँच्‍वकाय्‌ क्‍यनागु नमूनाकथं थ्‍व फुक्‍कं बांलाक दय्‌कि।” 
येशूयात इपिं स्‍वयाः नं तसकं तःधंम्‍ह पुजाहारी दय्‌कादीगु खः। अथे हे परमेश्वर व मनूतय्‌गु दथुइ वय्‌कलं चिनादीगु न्‍हूगु बाचा नं न्‍हापायागु पुलांगु बाचा स्‍वयाः तःधं, छाय्‌धाःसा उकी अज्‍ज भिंगु खँया बचं बियातःगु दु। 
न्‍हापायागु बाचाय्‌ द्वंगु मदुगु जूसा लिपायागु बाचा चिनादी माली मखुगु। 
परमेश्वरं इमिगु द्वंबिद्वंयात क्‍यनाः थथे धयादिल -- “इस्राएलयापिं व यहूदायापिंलिसे जिं न्‍हूगु बाचा चीत्‍यनागु ई वया च्‍वंगु दु। 
इमि तापाःबाज्‍यापिन्‍त मिश्र देशं लिगना हये धुंकाः इपिंलिसे चिनागु थेंज्‍याःगु बाचा थ्‍व मखु। जिं चिनागु बाचायात इमिसं च्‍यूताः मतःगुलिं नं जिं इमित च्‍यूताः मयानागु खः। 
जिं इस्राएलीतलिसे चीत्‍यनागु बाचा थुकथं खः -- ‘जिं थःगु नियम इमिगु मनय्‌ थ्‍यंक तया बी, अले इमिगु नुगलय्‌ नं च्‍वया बी। अले जि इमि परमेश्वर जुइ व इपिं जिम्‍ह मनूत जुइ।’ 
‘प्रभुयात म्‍हसीकी’ धकाः इमिसं थः जःलाखःलापिन्‍त व दाजुकिजापिन्‍त नं स्‍यना जुइ माली मखु, छाय्‌धाःसा चिधिकःपिन्‍संनिसें कयाः तःधिकःपिन्‍सं तकं जितः म्‍हसी। 
इमिसं याःगु मभिंगु बांमलाःगु ज्‍याखँ फुक्‍कं जिं क्षमा यानाबी, अले इमिगु पाप नं जिं लुमंके मखु।” 
न्‍हूगु बाचा धयादीगुलिं हे परमेश्वरं न्‍हापायागु बाचायात पुलां यानादिल। पुलां जुया वंगु जुक्‍व मदया वनी।