२ तिमोथी.
1.
ख्रीष्‍ट येशूयात विश्वास याक्‍वसित जीवन बी धकाः धयादीगुलिं परमेश्वरं वय्‌कःयाम्‍ह प्रेरित यानादीम्‍ह पावल पाखें 
जि यःम्‍ह काय्‌ तिमोथीयात थ्‍व पौ च्‍वयाच्‍वना। झी परमेश्वर बाः व प्रभु ख्रीष्‍ट येशूं छन्‍त दया माया यानाः शान्‍ति बियादीमा। 
जिं जिमि तापाःबाज्‍यापिन्‍सं थें दुनुगलंनिसें परमेश्वरयागु ज्‍या यानाच्‍वनागु दु। प्रार्थना यायेबलय्‌ जिं छन्‍त लुमंकाः चान्‍हिं परमेश्वरयात सुभाय्‌ बियाच्‍वनागु दु। 
छंगु मिखाय्‌ जाया वःगु ख्‍वबि लुमंकाः जि छन्‍त नापलाः वये मास्‍ति वइगु। छन्‍त नाप लाये खंसा जिगु मन च्‍वनी। 
छं यचुगु नुगलं विश्वास याःगु जि अज्‍जं लुमनि। छिमि बजे लोइस व मां युनिसं नं अथे हे यचुगु नुगलं विश्वास याःगु खः। छं अज्‍ज नं उकथं हे यचुगु नुगलं विश्वास यानाच्‍वंगु दइ धकाः जितः विश्वास दु। 
अय्‌जूगुलिं जिं छन्‍त हानं लुमंका च्‍वना -- जिं छंगु छेनय्‌ ल्‍हाः तयाबलय्‌ परमेश्वरं बियादीगु वरदानयात छं बांलाक छ्यला च्‍वँ। 
परमेश्वरं झीत भयया आत्‍मा मखु, बरु झीत शक्ति, माया व थःत कःघाये फइगु आत्‍मा बियादीगु दु। 
उकिं झी प्रभुयागु भिंगु खँ न्‍यंका जुइत लज्‍या चाये मते, अले जितः कुनातःगुलिइ नं लज्‍या चाये मते, बरु परमेश्वरयागु शक्तिइ भरोसा तयाः छं नं जिं थें तुं भिंगु खँयागु निंतिं दुःख सिया जु। 
थ्‍व हे परमेश्वरं झीत बचय्‌ यानाः वय्‌कःया मनूत यायेत सःतादिल। झीसं यानागु धर्मकर्मं यानाः मखु, बरु वय्‌कलं हे दया माया यानाः झीत बचय्‌ यानादीगु खः। सृष्‍टि जुइ न्ह्यः हे ख्रीष्‍ट येशूं झीत थ्‍व दया माया बियादीगु खः। 
झीत मुक्ति बीम्‍ह ख्रीष्‍ट येशू झायादी धुंकाः तिनि थ्‍व बांलाक सी दत। वय्‌कलं मृत्‍युयात त्‍याकाः भिंगु खँ न्‍यंक्‍वसित अनन्‍त जीवन बियादिल। 
थ्‍व हे भिगुं खँ न्‍यंकेत व स्‍यनेत जितः प्रेरित दय्‌कादीगु खः। 
थ्‍व हे ज्‍यायागु निंतिं जिं थथे दुःख सिया च्‍वनागु खः। थ्‍व ज्‍या यानाः जिं लज्‍या मचाया छाय्‌धाःसा जिं सुयात विश्वास यानाच्‍वनागु दु व बांलाक स्‍यू। अले प्रभुयात जिं लः ल्‍हाना बियागु फुक्‍क वय्‌कलं हानं लिहां झाया मदितले बांलाक बचय्‌ याना तयादी। 
ख्रीष्‍ट येशूं झीत क्‍यनादीगु विश्वास व माया थें छं नं जिं धयागु फुक्‍क खँ याना क्‍यँ। 
झीगु दुने च्‍वनादीम्‍ह पवित्र आत्‍मायागु ग्‍वाहालिं छन्‍त लः ल्‍हाना बियातःगु सत्‍य खँयात बांलाक नुगलय्‌ तया ति। 
एशियाय्‌ च्‍वंपिं फुक्‍कसिनं जितः त्‍वःता वन धकाः ला छं सि हे स्‍यू। फुगेलस व हेर्मोगेनसं तकं जितः त्‍वःता वन। 
ओनेसिफरसया जहानपिन्‍त परमेश्वरं दया यानादी मा, छाय्‌धाःसा वं जितः यक्‍व यक्‍व हे साहस ब्‍यूगु दु। जितः झ्‍यालखानाय्‌ कुना तल धकाः व लज्‍या मचाः। 
रोमय्‌ नं वं जितः मात्तुमालाः लुइकल। 
एफिससय्‌ दुबलय्‌ नं वं जितः गुलि ग्‍वाहालि यात धयागु खँ ला छं नं बांलाक हे स्‍यू। प्रभु झायादीबलय्‌ वयात दया माया यानादी मा।