कलस्‍सी.
4.
मालिकतय्‌सं नं दासयागु भिं स्‍वये माः। छिमिसं नं स्‍वर्गय्‌ थः मालिक दु धयागु खँ ल्‍वःमंके मते। 
छिमिसं प्रार्थना यायेगु गुबलें त्‍वःते मते। म्‍हुतुं जक प्रार्थना यायेगु मखु, दुनुगलंनिसें परमेश्वरयात सुभाय्‌ बियाः प्रार्थना याये माः। 
जिमिगु निंतिं नं प्रार्थना या। ख्रीष्‍टयागु खँ कनेत व परमेश्वरयागु वचन न्‍यंकेत वय्‌कलं न्‍ह्याथासं लँ चायेकादी मा धकाः प्रार्थना या। थुकियागु निंतिं हे जिं थथे झ्यालखानाय्‌ कुंका च्‍वने माल। 
जिं गुकथं थुइके माःगु खः उकथं हे मेपिन्‍त थुइके फये मा धकाः छिमिसं जिगु निंतिं प्रार्थना याना ब्‍यु। 
विश्वासी मखुपिंलिसे खँ ल्‍हायेबलय्‌ छिमिसं बांलाक बिचाः यानाः नवा। अले इमित भिंगु खँ न्‍यंकेगु मौका त्‍वःफिके मते। 
चिं सवा ब्‍यूथें खँ ल्‍हायेबलय्‌ नाइक व यइपुसे च्‍वंक नवा। अले कथं हंक लिसः बीगु या। 
यःम्‍ह किजा तुखिकसं हे छिमित जिगु खँ फुक्‍क कनी। व नं जिपिं नाप ज्‍या याना च्‍वंम्‍ह विश्वास याये बहःम्‍ह प्रभुया दास खः। 
छिमिसं जिगु खँ सीके फये मा, अले छिमित साहस दये मा धकाः जिं वयात छिमिथाय्‌ छ्वया हयाच्‍वनागु दु। 
अले हानं छिमिथाय्‌ हे च्‍वंम्‍ह यःम्‍ह किजा ओनेसिमसयात नं व नाप छ्वया हयेत्‍यनागु दु। ओनेसिमस तसकं विश्वास याये बहःम्‍ह मनू खः। इमिसं हे छिमित थन जुयाच्‍वंगु फुक्‍क खँ कनी। 
जि नापं झ्यालाखानाय्‌ कुना तःम्‍ह अरिस्‍तार्खसं नं छिमित धया हःगु दु। अथे हे बारनाबासया किजा मर्कूसं नं छिमित ज्‍वजलपा धया हःगु दु। वयागु खँ ला छिमित न्‍हापा हे धाये धुन। व वल धाःसा छिमिसं वयात दुनुगलंनिसें लसकुस या। 
युस्‍तस धाःम्‍ह येशूं नं छिमित ज्‍वजलपा धया हःगु दु। परमेश्वरयागु राज्‍ययागु भिंगु खँ न्‍यंकेगु ज्‍याय्‌ जि नाप जुया च्‍वंपिं यहूदीत थ्‍व हे स्‍वम्‍ह जक खः। थुमिसं जितः गाक्‍कं तिबः बियाच्‍वंगु दु। 
छिमिथाय्‌ हे च्‍वंम्‍ह ख्रीष्‍ट येशूया मेम्‍ह दास इपाफ्रासं नं छिमित ज्वजलपा धया हःगु दु। छिमिसं क्‍वात्तुक विश्वास यानाः परमेश्वरयात यःकथं जक याना च्‍वने फये मा धकाः वं छिमिगु नितिं न्‍ह्याबलें प्रार्थना यानाच्‍वंगु दु। 
छिमिगु निंतिं, लाउडिकियाय्‌ च्‍वंपिनिगु निंतिं व हिरापोलिसय्‌ च्‍वंपिनिगु निंतिं वं तसकं दुःख सियाः प्रार्थना यानाच्‍वंगु दु धकाः जिं स्‍यू। 
झी यःम्‍ह डाक्‍टर लूका व डेमासं छिमित ज्‍वजलपा धया हःगु दु। 
लाउडिकियाय्‌ च्‍वंपिं दाजुकिजापिन्‍त, अले नुम्‍फास व वया छेँय्‌ मुं वइपिं दाजुकिजापिन्‍त जिं ज्‍वजलपा धया हःगु दु धकाः धया ब्‍यु। 
थ्‍व पौ छिमिसं ब्‍वने धुंकाः लाउडिकियाय्‌ च्‍वंपिं विश्वासीतय्‌त नं ब्‍वंकि। अले लाउडिकियाय्‌ च्‍वंगु मण्‍डलीयात च्‍वया हयागु पौ नं छिमिसं ब्‍वँ। 
अर्खिप्‍पसयात प्रभुं याके ब्‍यूगु ज्‍या बांलाक मन तयाः या धकाः धया ब्‍यु। 
जि पावलं थःगु हे ल्‍हातं छिमित ज्‍वजलपा च्‍वयाच्‍वनागु दु। जि झ्‍यालखानाय्‌ कुना तःगु खँ छिमिसं ल्‍वःमंके मते। परमेश्वरं छिमित दया माया यानादी मा।