फिलिप्‍पी.
4.
अय्‌जूगुलिं यःपिं दाजुकिजापिं, थुकथं हे प्रभुयात क्‍वात्तुक विश्वास याना च्‍वँ। जि छिमित नापलायेत आय्‌बुयाच्‍वनागु दु। छिपिं जिगु लय्‌ताः व श्रीपेच खः। 
इयोदिया व सुन्‍तुखेयात जिं बिन्‍ति यानाच्‍वना -- छिपिं निम्‍ह तताकेहेँ प्रभुयात विश्वास यानाः मिलय्‌ जुया च्‍वँ। 
अले विश्वास याये बहःम्‍ह पासा, थुपिं मिसातय्‌त ग्‍वाहालि या। छाय्‌धाःसा इमिसं जि नाप भिंगु खँ न्‍यंकेगु ज्‍या याःगु दु। थुलि जक मखु, इमिसं क्‍लेमेस व जि नाप ज्‍या याःपिं जीवनयागु सफुलिइ नां दुथ्‍याःपिं मेमेपिं मनूतलिसे नं भिंगु खँ न्‍यंकूगु दु। 
प्रभु लिसे न्‍ह्याबलें लय्‌ताया च्‍वँ। जिं हानं धाये -- “लय्‌ताया च्‍वँ।” 
फुक्‍कलिसे बांलाक हनाबना याना च्‍वँ। प्रभु याकनं झाइ। 
छुं खँय्‌ नं चिन्‍ता काये मते। छिमित माःगु खँ प्रार्थना यानाः सुभाय्‌ बियाः परमेश्वरयात बिन्‍ति या। 
सुयागुं ज्ञान बुद्धिं थुइके मफुगु परमेश्वरयागु शान्‍तिं छिमिगु नुगः व मनयात ख्रीष्‍ट येशूपाखें बचय्‌ याना तइ। 
यःपिं दाजुकिजापिं, दकलय्‌ लिपा जिं धाये -- छिमिसं सत्‍यगु, हनेबहःगु, भिंगु, शुद्धगु, बांलाःगु, ततःधंगु व प्रशंसा याये बहःगु खँय्‌ जक मन बिया च्‍वँ। 
जिं यानागु छिमिसं न्‍यनातःगु व थः नालाकया तःगु हे दु। अले जिं छिमित स्‍यना बियागु व थुइका बियागु नं दु। छिमिसं नं अथे हे याना च्‍वँ। अले शान्‍ति बियादीम्‍ह परमेश्वर छिपिं नाप दइ। 
प्रभु लिसे जि तसकं लय्‌तायाच्‍वनागु दु। तःन्‍हु लिपा छिमिसं जितः हानं लुमंकाः हल। अथे ला छिमिसं न्‍हापांनिसें लुमंकाच्‍वंगु खः। ई जक चू मलाःगु खः। 
मदय्‌कं मगानाः ला जिं थथे धयागु मखु, छाय्‌धाःसा न्‍ह्यागु हे जूसां लुधंकाच्‍वनेत स्‍यनाकयागु दु। 
मदुबलय्‌ नं दुबलय्‌ नं जि लुधंकाच्‍वने सः। न्‍ह्याबलें न्‍ह्याथासं नये खंसां मखंसां, यक्‍व दुसां द हे मदुसा नं जिं लुधंकाच्‍वने सय्‌कागु दु। 
जितः शक्ति बियादीम्‍ह ख्रीष्‍टया पाखें जिं न्‍ह्यागुं याये फु। 
अय्‌नं जितः थथे दुःख जुया च्‍वंबलय्‌ छिमिसं ग्‍वाहालि याःगु बां हे लात। 
थ्‍व खँ छिमिसं सि हे स्‍यू माकेडोनियां भिंगु खँ न्‍यंकाः वने त्‍यनाबलय्‌ नं छिमिगु मण्‍डलीं हे जक जितः ग्‍वाहालि यात, मेगु गुगुं नं मण्‍डलीं मयाः। 
थेसलोनिकेय्‌ दुबलय्‌ नं छिमिसं जितः तःकःमछि ग्‍वाहालि छ्वया हल। 
जिं छिमि पाखें ग्‍वाहालि कायेत थथे धयागु मखु। बरु स्‍वर्गय्‌ च्‍वंगु छिमिगु हे ल्‍याःचालय्‌ यक्‍व दयावये मा धकाः खः। 
छिमिगु पाखें जितः मतिइ तयागु स्‍वयाः अप्‍वः हे दत। छिमिसं इपाफ्रोडिटसयात बीके छ्वया हःगु ग्‍वाहालि नं जिगु ल्‍हातय्‌ लात। छिमिसं छ्वया हःगु थ्‍व ग्‍वाहालि ला नस्‍वाः वःगु व परमेश्वरयात यःगु होमबलि थें खः। 
जिमि परमेश्वरं छिमिगु मगाःमचाः स्‍वयादी। ख्रीष्‍ट येशूयाके दुगु वय्‌कःयागु गुबलें मसुइगु धुकुतिं छिमित माःगु बियादी। 
झी परमेश्वर बाः न्‍ह्याबलें तःधना च्‍वनेमा। आमेन। 
फुक्‍क विश्वासीतय्‌त जिं न्‍यना हःगु दु धकाः धया ब्‍यु। जि नाप थन दुपिं दाजुकिजापिन्‍सं नं छिमित न्‍यना हःगु दु। 
थन च्‍वंपिं फुक्‍क विश्वासीतय्‌सं नं छिमित ज्‍वजलपा धया हःगु दु। खास यानाः कैसरया जहानपिनिपाखें ज्‍वजलपा धया हःगु दु। 
येशू ख्रीष्‍टयागु दया माया छिपिं फुक्‍कसित दया हे च्‍वनेमा।