फिलिप्‍पी.
2.
ख्रीष्‍टयात विश्वास यानाः छिमित साहस वःगु दु ला? वय्‌कःयागु मायां छिमित तिबः ब्‍यूगु दु ला? छिमिसं पवित्र आत्‍मां धाःथें याना जुयागु दु ला? छिमिसं थःथवय्‌ दया माया याना जुयागु दु ला? 
अथे खः धयागु जूसा छिमिसं छगू हे मनं, छगू हे मायां, छगू हे नुगलं, अले छता हे खँय्‌ मन बियाः जितः अज्‍जं लय्‌ ताय्‌की। 
थःगु जक भिं स्‍वयाः तःधंछुना जुइ मते। बरु थःथवय्‌ क्‍वमिलु जुयाः मेपिं स्‍वयाः चिधं जुया जु। 
थःगु जक बिचाः याये मते, मेपिनिगु नं बिचाः या। 
छिमिगु मन ख्रीष्‍ट येशूयागु थें जुइ माः -- 
ख्रीष्‍ट येशू परमेश्वर हे जुयाः नं वय्‌कलं थःत परमेश्वर भाःपिया मदी। 
थः यसें फुक्‍कं त्‍वःताः दास थें जुयादिल, अले झीपिं थें मनू जन्‍म कयादिल। 
वय्‌कलं मनू जुयाः सीत तकं नं लिचिला मदी। क्रूसय्‌ सिनादीबलय्‌ तकं वय्‌कः क्‍वमिलु जुयाः आज्ञा मानय्‌ यानादिल। 
अय्‌जूगुलिं परमेश्वरं वय्‌कःयात फुक्‍क स्‍वयाः नं तःधंकादिल, अले दक्‍वसिबय्‌ तःधंगु नां नं छुनादिल। 
थुकथं स्‍वर्गय्‌ च्‍वंपिं, पृथ्‍वीइ च्‍वंपिं व पातालय्‌ च्‍वंपिं फुक्‍कसिनं वय्‌कःया नामय्‌ पुलिं चुइ माः। 
अले परमेश्वर बाःयात तःधंकेत फुक्‍कसिनं येशू ख्रीष्‍ट हे “प्रभु” खः धकाः थः नाला काये माः। 
यःपिं दाजुकिजापिं, जि छिपिं नाप दुबलय्‌ छिमिसं जिगु फुक्‍क खँ न्‍यना का। अथे हे जि मदइबलय्‌ नं झन छिमिसं जिगु खँ न्‍यने माः। अले ग्‍याभय्‌ कयाः मुक्तिया ज्‍या क्‍वचाय्‌केत मेहनत या। 
परमेश्वर झी नापं ज्‍या यानादी। बांलाःगु इच्‍छां ज्‍या याकादीम्ह परमेश्वर हे खः। 
न्‍ह्यागुं ज्या उसि मचासे व जवाःसवाः मयासे याये माः। 
उकिं छिपिं दोष मदुपिं व स्‍वजापिं जुयाः पापी व मभिंगु मनूतय्‌गु पुचलय्‌ छुं हे ख्‍वं मदय्‌क परमेश्वरया मस्‍त जुया च्‍वँ। नगुतय्‌सं आकाशय्‌ झल्‍ल थीकू थें छिपिं नं इमिगु पुचलय्‌ थिना च्‍वँ। 
छिमिसं इमित परमेश्वरयागु जीवन बीगु वचन न्‍यंका जुल धाःसा येशू ख्रीष्‍ट झाइबलय्‌ थःम्‍हं यानागु ज्‍या सितिं मवन धकाः जिं छ्यं धस्‍वाके फइ। 
छिमिगु विश्वासयागु बलिदान व सेवाय्‌ थःगु हि तकं हाय्‌के माःसां जि लय्‌ताः। अले जि छिपिं नापं लय्‌ताय्‌। 
अथे हे छिपिं नं जि थें लय्‌ताया च्‍वँ। 
तिमोथीयात छिमिथाय्‌ याकनं हे छ्वया हये फइ धकाः जिं प्रभु येशूयाके आशा यानाच्‍वनागु दु। अले छिमिगु भिंगु खँ न्‍यने दयाः जितः लय्‌तावइ। 
तिमोथीं थें छिमिगु च्‍यूताः कयाजुइपिं मेपिं सुं हे मदु। 
येशू ख्रीष्‍टयागु च्‍यूताः हे मतसे मेपिं फुक्‍कं थःथःगु स्‍वार्थया ज्‍याय्‌ जक जुयाच्‍वंगु दु। 
तिमोथी गज्‍याःम्‍ह मनू खः धकाः ला छिमिसं सि हे स्‍यू। छम्‍ह काय्‌ नं थः बौनाप ज्‍या याये थें वं जि नाप भिंगु खँ न्‍यंका जुल। 
जितः छु छु जुइ स्‍वये, अले थ्‍व खँ सी दयेवं हे जिं वयात छिमिथाय्‌ छ्वया हये। 
जि थः हे नं याकनं वये दइ धकाः प्रभुयाके भरोसा तयाच्‍वनागु दु। 
जितः ग्‍वाहालि याके छ्वया हःम्‍ह किजा इपाफ्रोडिटसयात छिमिथाय्‌ हे लिछ्वया हये माः थें जिं ताय्‌का। जिपिं निम्‍हय्‌सिनं नं नापं ज्‍या याना, अले भिंगु खँ न्‍यंकेगु ज्‍याय्‌ नं जिपिं नापं हे जुया। 
वं छिमिगु ख्‍वाः स्‍वये मास्‍ति वय्‌काच्‍वंगु दु, छाय्‌धाःसा छिमिसं व म्‍हंमफुगु खँ न्‍यंगुलिं व छिमिथाय्‌ वयेत तसकं आय्‌बुयाच्‍वंगु दु। 
व धात्‍थें हे सी थें च्‍वंक म्‍हंमफुगु खः। अय्‌नं परमेश्वरं वयात दया यानादिल। वयात जक मखु, वय्‌कलं जितः नं दया यानादिल। मखुसा ला जितः दुःखय्‌ हानं मेगु दुःख जू वइगु खः। 
अय्‌जूगुलिं वयात हाकनं स्‍वये दयाः छिपिं लय्‌ताय्‌मा धकाः जिं वयात छ्वया हयेत्‍यनागु खः। अले जिगु दुःखकष्‍ट नं क्‍वलाना वनी। 
अय्‌जूगुलिं वयात थः हे किजा भाःपियाः दुनुगलंनिसें लसकुस या। थज्‍याःपिन्‍त ला हने हे माः। 
ख्रीष्‍टयागु ज्‍याया निंतिं जितः ग्‍वाहालि बीत वं थःत ज्‍यान तकं पात। छिमिसं जिगु निंतिं पूवंके मफुगु ज्‍या वं पूवंकल।