एफिसी.
4.
प्रभुयागु ज्‍या यानाः कुंकाच्‍वने माःम्‍ह जिं छिमित प्रभुयात यःकथं ज्‍याखँ याना च्‍वँ धकाः दुनुगलंनिसें बिन्‍ति यानाच्‍वना। 
न्‍ह्याबलें क्‍वमिलु, स्‍वजा व सह याइपिं जुयाः थःथवय्‌ माया यानाः 
पवित्र आत्‍मायागु ग्‍वाहालिं छिपिं फुक्‍कं छम्‍ह थें जुया च्‍वनेगु कुतः या। अले छिमित शान्‍ति दइ। 
गथे परमेश्वरं छिमित छगू हे आशाया निंतिं सःतादीगु खः, अथे हे छिमिगु म्‍ह नं छगू हे, आत्‍मा नं छगू हे खः। 
अथे हे प्रभु नं छम्‍ह हे जक, विश्वास नं छगू हे जक, अले बप्‍तिस्‍मा नं छगू हे जक दु। 
अले हानं सकसियां परमेश्वर बाः नं छम्‍ह हे जक दु। वय्‌कः फुक्‍कसियां प्रभु, फुक्‍क ज्‍या यानादीम्‍ह व सकसिकें दीम्‍ह खः। 
झी फुक्‍कसितं ख्रीष्‍टं स्‍वयाः स्‍वयाः वरदान बियादीगु दु। 
थथे च्‍वयातःगु दु -- “प्रभु स्‍वर्गय्‌ थहां झायादीबलय्‌ ज्‍वनातःपिन्‍त नं थःलिसें यंकादिल। अले मनूतय्‌त वरदान बियादिल।” 
प्रभु थहां झाल धाःगु छु खः? थुकिं ख्रीष्‍ट पृथ्‍वीइ क्‍वय्‌ थ्‍यंक झाःगु दु धकाः सी दत। 
क्‍वहां झाःम्‍ह वय्‌कः हे खः। अले फुक्‍कभनं न्‍यनादीत वय्‌कः स्‍वर्ग स्‍वयाः च्‍वय्‌ थ्‍यंक नं थहां झाल। 
वय्‌कलं हे गुम्‍हय्‌सितं प्रेरित, गुम्‍हय्‌सितं अगमवक्ता, गुम्‍हय्‌सितं भिंगु खँ न्‍यंक जुइम्‍ह, गुम्‍हय्‌सितं मण्‍डलीइ हेरचाह याइम्‍ह, गुम्‍हय्‌सितं वचन स्‍यनेकने याइम्‍ह यानादिल। 
परमेश्वरया मनूतय्‌त ख्रीष्‍टयागु ज्‍या याये फयेमा धकाः व वय्‌कःयागु म्‍ह मण्‍डलीयात ब्‍वलंकेत वय्‌कलं थुकथं ल्‍ययादिल। 
थुकथं थ्‍व वरदानयागु ज्‍यां झीत विश्वासय्‌ छप्‍पँ जुइत व परमेश्वरया काय्‌यात म्‍हसीकाः न्‍ह्यज्‍यायेत ग्‍वाहालि बियाच्‍वनी। अले छन्‍हु झीपिं ख्रीष्‍ट थें जुइ फइ। 
अले झीपिं मखुगु खँ स्‍यना जुइपिं मनूतय्‌गु फय्‌गं खँय्‌ जुइपिं मस्‍त जुइ मखु। इमिगु खं मनूतय्‌त मखुगु लँय्‌ यंकी। 
दया माया यानाः सत्‍य खँ ल्‍हानाः झीपिं न्‍ह्यागु ज्‍याखँय्‌ नं झीम्‍ह थकालि ख्रीष्‍ट थें जुयाः न्‍ह्यज्‍याये माः। 
वय्‌कलं हे यानाः फुक्‍क म्‍हब्‍व मिलय्‌ जुयाच्‍वंगु दु, अले म्‍ह छम्‍हं माःकथं स्‍वानाच्‍वंगु दु। छता छता म्‍हब्‍वं थः थःगु ज्‍या याना च्‍वंसा म्‍ह छम्‍हं स्‍वय्‌ जिया वइ, अले थःथवय्‌ माया यानाः न्‍ह्यज्‍याये फइ। 
जिं प्रभुयागु नामय्‌ धयाच्‍वनागु दु -- छिपिं आः हानं परमेश्वरयात म्‍हमस्‍यूपिं थें याना जुइ मते। इमिगु बिचाः हे बांमलाः। 
इमिगु नुगः अज्‍जं मचाःनि। परमेश्वरं बियादीगु न्‍हूगु जीवनं इपिं अज्‍जं तापाः नि, छाय्‌धाःसा इमिगु नुगः तसकं छाः, अले इमिसं छुं हे मस्‍यू। 
इमिके लज्‍या धयागु तकं मदये धुंकल। अले मभिंगु लँय्‌ जुयाः इपिं लाःलाःथे याना जुयाच्‍वंगु दु। 
ख्रीष्‍टं ला छिमित थथे या धकाः स्‍यनादीगु मदु। 
प्रभुयागु सः छिमिसं ताःगु हे दु। ख्रीष्‍टपाखें हे धात्‍थेंगु खँ छिमिसं सय्‌का काःगु दु। 
थःत हे स्‍यंकीगु न्‍हापायागु चालचलनयात छिमिसं त्‍वःता छ्व। 
थुकिया पलेसा पवित्र आत्मां छिमिगु बिचाः व पहःयात न्‍हूगु यायेमा 
परमेश्वरयात यःकथं जुयाः वय्‌कःया न्‍ह्यःने धर्मी ठहरय्‌ जुयाः अले पवित्र जुयाः छिपिं परमेश्वरं दय्‌कादीपिं न्‍हूपिं मनूत जुया च्‍वँ। 
अय्‌जूगुलिं मखुगु खँ ल्‍हायेगु त्‍वःताः थःथवय्‌ खःगु खँ जक ल्‍हाना जु, छाय्‌धाःसा झीपिं फुक्‍कं ख्रीष्‍टयागु म्‍हया छता छता म्‍हब्‍व खः। 
छिमिसं तं पिहां वइबलय्‌ तमय्‌ छुं कथंया पापय्‌ लाके मते। निभाः बी न्‍ह्यः हे छिमिगु तं क्‍वलाये माः! 
शैतानयात थःपिन्‍त स्‍यंके बीत लँ बी मते। 
खुँज्‍या याइम्‍हय्‌सिनं खुइगु त्‍वःति। अले थःगु हे ल्‍हातं ज्‍या यानाः मगाःमचाःपिन्‍त नं ग्‍वाहालि याये फय्‌के माः। 
छिमिगु म्‍हुतुं बांमलाःगु खँ पिहां मवयेमा। माःगु, भिंगु व ज्‍यूगु जक खँ ल्‍हाना जु। अले न्‍यनिपिन्‍त नं न्‍ह्याइपुसे च्‍वनी। 
थुलि जक मखु, पवित्र आत्‍मायात दुःख बी मते, छाय्‌धाःसा पवित्र आत्‍मा उद्धार बी खुन्‍हुयात धकाः झीत बियातःगु चिं खः। 
बांमलाःगु खँ मतिइ तये मते, तं व ल्‍वापुख्‍यापु त्‍वःता छ्व। ईख यायेगु व मेपिन्‍त क्‍वह्यंका जुइगु त्‍वःता छ्व। मेपिन्‍त स्‍यंका जुइगु नं त्‍वःता छ्व। 
गथे ख्रीष्‍टयात विश्वास याःगुलिं परमेश्वरं छिमित क्षमा यानादिल, अथे हे छिमिसं नं थःथवय्‌ क्षमा बीगु यानाः दया माया याना च्‍वँ।