एफिसी.
2.
छिपिं थःगु अपराध व पापं यानाः सीपिन्‍त वय्‌कलं म्‍वाकादिल। 
थ्‍व संसारयापिं मनूतय्‌सं थें छिमिसं नं पापी ज्‍याखँ याना जूगु खः। अले मभिंगु ज्‍याखँया नायः शैतानं धाःथें जुयाच्‍वंगु खः। थ्‍व शैतानं परमेश्वरयात विश्वास मयाःपिन्‍त थःगु ल्‍हातय्‌ कयातःगु दु। 
झीपिं नं छकः इपिं थें हे जुइ धुनागु दु, झीसं नं थःत यःथें यानाः मोजमज्‍जा यानाजुइ धुन। थुकथं मेपिं थें झीपिं नं परमेश्वरयागु तं फये मालिपिं जुइ धुन। 
अय्‌नं परमेश्वरं झीत तसकं तःधंगु दया माया क्‍यनादीगु दु। 
झीपिं सीपिं मनूत थें पापी जुया च्‍वंसां ख्रीष्‍टं झीगु पाप क्षमा यानादिल। परमेश्वरयागु तःधंगु दया मायां छिमित थथे मुक्ति बियादीगु खः। 
झीसं ख्रीष्‍टयात विश्वास यानागुलिं वय्‌कलं झीत हानं म्‍वाकाः वय्‌कः नाप स्‍वर्गय्‌ तयादिल। 
झीत परमेश्वरं दया माया यानादी धकाः सीके बीत थथे यानादीगु खः। थ्‍व दया माया ख्रीष्‍ट येशूपाखें परमेश्वरं झीत न्‍ह्याबलेंया निंतिं क्‍यनादीगु दु। 
परमेश्वरयात छिमिसं विश्वास याःगुलिं छिमित वय्‌कलं दया माया यानाः मुक्ति बियादीगु खः। छिमिगु थःगु हे कुतलं थ्‍व मुक्ति दुगु मखु। थ्‍व ला परमेश्वरयागु वरदान खः। 
छिमिगु धर्मकर्मं थथे जूगु मखु, उकिं छिमिसं तःधंछुइगु खँ हे मदु। 
छाय्‌धाःसा झीपिं वय्‌कलं सृष्‍टि याना तःपिं खः। वय्‌कलं न्‍हापांनिसें दय्‌कातःगु भिंगु ज्‍याखँ झीगु पाखें जुइ फयेमा धकाः झीत ख्रीष्‍ट येशूपाखें सृष्‍टि यानादीगु खः। 
न्‍हापायागु खँ लुमंकि, म्‍हय्‌ चिं तयातःपिं यहूदीतय्‌सं छिमित म्‍हय्‌ चिं मतःपिं यहूदीमखुपिं धकाः धाइगु खः। 
बिचाः या, छिपिं ख्रीष्‍टपाखें तापाना च्‍वंपिं खः। छिपिं इस्राएलयागु हकं पिनेलाःपिं, परमेश्वरं चिनादीगु बाचां पिनेलाःपिं, आशा धयागु हे त्‍वफिका च्‍वंपिं, व परमेश्वर हे मदय्‌का च्‍वंपिं जुयाच्‍वंगु खः। 
उबलय्‌ छिपिं ख्रीष्‍ट येशूपाखें तापाना च्‍वंपिं खः। आः धाःसा छिमित ख्रीष्‍टयागु हिं हे वय्‌कः नाप सत्तिकादिल। 
थः हे क्रूसय्‌ सिनाः वय्‌कलं यहूदीत व यहूदीमखुपिनिगु दथुइ च्‍वंगु पःखाः थुनाः थःथवय्‌ मिलय्‌ यानाः झीत शान्‍ति बियादिल। 
थथे यायेत वय्‌कलं यहूदीतय्‌गु व्‍यवस्‍थाय्‌ च्‍वंगु आज्ञा व नियम त्‍वथुलादिल। अले यहूदीतय्‌त नं यहूदीमखुपिन्‍त नं थःत विश्वास याकाः मिलय्‌ यानाः छम्‍ह हे यानादिल। थुकथं वय्‌कलं झीत शान्‍ति बियादिल। 
थुकथं ल्‍वापुख्‍यापु मदय्‌काः क्रूसय्‌ सिनाः वय्‌कलं यहूदीतय्‌त नं यहूदीमखुपिन्‍त नं छम्‍ह हे यानादिल। 
थथे यायेत वय्‌कलं परमेश्वरलिसे तापाना च्‍वंपिं व सत्तिना च्‍वंपिन्‍त नं शान्‍तियागु खँ न्‍यंकादिल। 
वय्‌कलं यानाः हे झीपिं यहूदीत नं यहूदीमखुपिं नं पवित्र आत्‍मा दयाः परमेश्वर बाःया न्‍ह्यःने वने फत। 
उकिं छिपिं आः यहूदीमखुपिं जूसां इस्राएलयागु हकं पिनेलाःपिं व परमेश्वरयागु बाचां पिनेलाःपिं मखुत। बरु आः छिपिं नं इस्राएलयागु हकं थ्‍याःपिं व परमेश्वरया जहानया दुजः जुल। 
प्रेरिततय्‌सं व अगमवक्तातय्‌सं स्‍वना थकूगु जगय्‌ दय्‌कूगु छेँ छिपिं नं खः। अले थ्‍व जगयागु मूल्‍वहं येशू ख्रीष्‍ट खः। 
वय्‌कलं हे फुक्‍कसितं मिलय्‌ यानाः थ्‍व छेँयात परमेश्वर च्‍वनादीगु पवित्रगु देगः यानादी। 
छिपिं नं मेपिं थें पवित्र आत्‍माय्‌ परमेश्वर च्‍वनादीगु छेँ जुइत नाप नापं च्‍वजाया वनी।