गलाती.
4.
जिं छु धाये धाःसा -- अबुयागु सम्‍पत्ति फुक्‍कं वया काय्‌पिनिगु खःसां मचाबलय्‌ इपिं च्‍यः थें हे जुयाच्‍वनी। 
अबुम्‍हय्‌सिनं मधातले इपिं इमित सुसाःकुसाः यायेत तया तःम्‍हय्‌सिनं धाःथें च्‍वने माः। 
विश्वास याये न्‍ह्यः झीपिं नं मस्‍त थें खः, अले झीत संसारयागु मभिंगु आत्मां चिना तल। 
परमेश्वरं धयादीगु ई वयेवं परमेश्वरं वय्‌कःया काय्‌यात छ्वया हयादिल। वय्‌कः मिसाम्‍हय्‌सिगु क्‍वखं बुल। अले यहूदीतय्‌गु व्‍यवस्‍था मानय्‌ यानाः च्‍वनादिल। 
व्‍यवस्‍था मानय्‌ याना च्‍वंपिन्‍त व्‍यवस्‍थां लिगनाः परमेश्वरया काय्‌पिं यायेत वय्‌कलं थथे यानादीगु खः। 
झीपिं नं परमेश्वरया काय्‌पिं खः धकाः सीकेत परमेश्वरं थः काय्‌यागु आत्‍मा झीगु नुगलय्‌ तयादिल। अले थ्‍व हे आत्‍मां झीगु नुगलं “अब्‍बा, जिमि बाः” धकाः धयादी। 
थथे जूगुलिं छिपिं आः दास मखुत, बरु परमेश्वरया काय्‌पिं जुइ धुंकल। उकिं वय्‌कलं थः सन्‍तानयात फुक्‍क अधिकार बियादी। 
न्‍हापा परमेश्वरयात म्‍हमस्‍यूगुलिं छिपिं परमेश्वर हे मखुपिं मेपिं द्यःतय्‌ दास जुयाच्‍वंगु खः। 
आः छिमिसं परमेश्वरयात म्‍हसी धुंकल। वय्‌कलं नं छिमित म्‍हसीकादिल। आः हानं छिपिं गथे यानाः व हे ज्‍यालगय्‌ मजूपिं व पुलांपिं द्यःतय्‌थाय्‌ लिहां वने फुगु? छु छिपिं हानं इमि दास जूवनेगु ला? 
थौं छिमिसं खास न्‍हि, थिथिकुति, ला, रितु व दँयात मानय्‌ यानाच्‍वन। 
उकिं छिपिं स्‍यनावनी धकाः जितः तसकं पीर जुया च्‍वन। छिमिथाय्‌ वयाः उलिमछि दुःखकष्‍ट सियाः जिं ज्‍या याना थकागु सितिं वनिगु जुल ला? 
यःपिं दाजुकिजापिं, जिं छिमित बिन्ति याये -- जिं याना थें तुं छिमिसं नं या। जि छम्‍ह यहूदी खःसां छिपिं नाप यहूदीमखुपिं थें जुया च्‍वने धुन। छिमिसं जितः छुं हे मभिंकूगु मदु। 
दकलय्‌ न्‍हापा छिमित भिंगु खँ न्‍यंकाबलय्‌ जि म्‍हंमफु धयागु खँ छिमिसं लुमंकातःगु दयेमाः। 
म्‍हंमफुसां जितः हेला मयासे छिमिसं भचा हे थाकुमचासे बिचाः यात। स्‍वर्गदूतयात व ख्रीष्‍टयात थें छिमिसं जितः दुकयाः सुसाःकुसाः यात। 
छिपिं अबलय्‌ गुलि लय्‌ताःगु। जि जक ज्‍यूसा थःगु मिखा लिकया बीत तक नं छिपिं न्‍ह्यचिली। थ्‍व खँय्‌ जिं साक्षी बी फु। आः जक छिमित छु जुल? 
सत्‍य खँ कनागुलिं जि छिमि शत्रु जुल ला? 
मेपिं मनूतय्‌सं छिमित लय्‌ताय्‌केत स्‍वया च्‍वंगु दु, अथेसां इमिगु मति मभिं। इपिं छिमित जि पाखें लिगनाः थःपाखे सालाकायेत स्‍वया च्‍वंपिं खः। 
मेपिनिगु खँ न्‍यनेगु नं बां हे लाःगु खँ खः। अय्‌नं न्‍ह्याबलें भिंम्‍ह मनूयागु जक खँ न्‍यने माः। जि दुबलय्‌ जक मखु, मदुबलय्‌ नं छिमिसं थथे याये माः। 
छिपिं ख्रीष्‍ट थें मजुतले जितः मचाबूब्‍यथा थें दुःख जुयाच्‍वनी। 
छिमिथाय्‌ वये फुगु जूसा जिं छिमिगु नुगलय्‌ ध्‍वाथुइक खँ कनेगु खः। छिमिगु खँय्‌ जिं छुं हे क्‍वःछी मफया च्‍वन। 
व्‍यवस्‍था मानय्‌ याये मास्‍ति वःपिन्‍त जिं धाये -- व्‍यवस्‍थां छु धाइ व छिमिसं मस्‍यू ला? 
व्‍यवस्‍थाय्‌ थथे च्‍वयातःगु दु -- अब्राहामया निम्‍ह काय्‌पिं दु। छम्‍ह काय्‌ भ्‍वातिंपाखें बूम्‍ह, अले मेम्‍ह ब्‍याहा याना हःम्‍ह कलाःयापाखें बूम्‍ह। 
भ्‍वातिंपाखें बूम्‍ह अब्राहामया काय्‌ इमिगु इच्‍छां बूम्‍ह खः। ब्‍याहा याना हःम्‍हपाखें बूम्‍ह काय्‌ धाःसा परमेश्वरयागु बचंकथं बूम्‍ह खः। 
थ्‍व दसु थें खः। थुपिं निम्‍ह मिसा परमेश्वरं बाचा चिनादीगु निता खँ खः। हागार धाःम्‍ह भ्‍वातिं सीनै पहाडय्‌ ब्‍यूगु व्‍यवस्‍था खः। 
हागार अरब देशया सीनै पर्वत खः। व्‍यवस्‍था मानय्‌ याना च्‍वंपिं मनूत फुक्‍कं हागारया मस्‍त जुल, उकिं थुपिं फुक्‍कं दास जुल। 
सारा धाःसा परमेश्वरं चिनातःगु बाचा थें खः। सारा न्‍यानातःम्‍ह भ्‍वातिं मखु, व स्‍वर्गयागु यरूशलेम थें खः। अले झीपिं वया सन्‍तान जुल। 
धर्मशास्‍त्रय्‌ नं थथे च्‍वयातःगु दु -- “हे मचा बुइकिमखुम्‍ह थारिम्‍ह लय्‌ताया च्‍वँ, मचा बुइकेबलय्‌ गुलि दुःख जुइ धकाः मस्‍यूम्‍ह नुगः चाय्‌काः हाला जु। छाय्‌धाःसा भाःत नाप च्‍वना च्‍वंम्‍ह मिसाया स्‍वयाः भाःतं त्‍वःतूम्‍ह मिसायागु हे मस्‍त यक्‍व दु।” 
यःपिं दाजुकिजापिं, छिपिं इसहाक थें बचंया सन्‍तान खः। 
न्‍हापा थें आः नं भ्‍वातिंयापाखें बूपिन्‍सं परमेश्वरया आत्‍मां बूपिन्‍त दुःखकष्‍ट बियाच्‍वंगु दु। 
थ्‍व हे खँय्‌ धर्मशास्‍त्रय्‌ छु धकाः च्‍वया तल? “भ्‍वातिंयात व वया काय्‌यात पितिना छ्व। छाय्‌धाःसा ब्‍याहा याना हःम्‍ह कलाःपाखें बूम्‍ह काय्‌नं थें वं थः अबुयागु सम्‍पत्ति काये दइ मखु।” 
अय्‌जूगुलिं यःपिं दाजुकिजापिं, झीपिं भ्‍वातिंनं बुइका तःपिं सन्‍तान मखु, बरु ब्‍याहा याना हःम्‍हय्‌सिया पाखें बूपिं सन्तान खः।