२ कोरिन्थी.
8.
यःपिं दाजुकिजापिं, माकेडोनियाया थाय्‌थासय्‌ च्‍वंगु मण्‍डलीयात परमेश्वरं दया माया यानादीगु खँ छिमित धयाच्‍वना। 
न्‍ह्याथें ज्‍याःगु दुःखकष्‍ट वःसां इपिं लय्‌तायाच्‍वन, अले थःत मगाः मचाःबलय्‌ इमिसं नुगः चक्‍कंकाः मेपिन्‍त ग्‍वाहालि बियाच्‍वन। 
धात्‍थें हे इमिसं थः यसें हे थःम्‍हं बी फुगु स्‍वयाः नं अप्वः बिल। 
थथे भेटी बियाः इमिसं यहूदियाय्‌ च्वंपिं विश्वासीतय्‌त ग्‍वाहालि बीगु ज्‍याय्‌ ब्‍वति काये दयेमा धकाः तःक मछि बिन्‍ति यात। 
जिमिसं मतिइ तयागु स्‍वयाः नं इमिसं यक्‍व हे ग्वाहालि यात। न्हापां इमिसं थःत हे प्रभुयात देछाल, अले परमेश्वरया इच्छाकथं इमिसं थःत जिमिगु ल्हातय्‌ लःल्‍हाना बिल। 
तीतसं न्‍हापा हे छिमिथाय्‌ सुरु याये धुंकूगु भिंगु ज्‍या पूवंकेत जिमिसं वयात हे छ्वयाहयागु खः। 
छिमिके दुगु फुक्‍क खँय्‌ छिपिं तःमि, विश्वास यायेगुलिइ, नवायेगुलिइ, ज्ञानय्‌, ग्‍वाहालि बीगुलिइ अले जिमित माया यायेगुलिइ नं। उकिं भेटी बीगुलिइ नं छिमिसं अथे याना क्यँ धकाः जिमिसं बिन्‍ति यानाच्‍वना। 
छिमिसं थथे याये हे माः धकाः जिं छिमित उजं बियाच्‍वनागु मखु। मेपिन्‍सं लय्‌ तायाः ग्‍वाहालि बिल धकाः खँ कनाः छिमिगु माया सत्‍य खः ला कि मखु धकाः स्‍वयेत्‍यनागु खः। 
झी प्रभु येशू ख्रीष्‍ट गुलि ग्‍वाहालि यानादीम्‍ह प्रभु खः धकाः ला छिमिसं सि हे स्‍यू। वय्‌कः तःमि जुयाः नं छिमिगु निंतिं चीमि जुयादिल। थः चीमि जुयाः छिमित तःमि यायेत वय्‌कलं थथे यानादिल। 
दच्छि न्ह्यः छूगु ज्‍या पूवंकि धकाः जिं छिमित सल्‍लाह बियाच्‍वना। ग्वाहालि बीत जक मखु, छिपिं ज्‍या यायेगु इच्‍छा यायेत नं न्‍हापां जुल। 
छिमिसं आः छूगु ज्‍या नं पूवंकि। उबलय्‌ छिमिसं बीत तसकं मन याःगु खः। थःम्‍हं फक्‍व बियाः आः व इच्‍छा पूवंकि। 
छिमिसं बी मास्‍ति वःसा छिमिके दुगु जक परमेश्वरयात ब्‍यूसां गाः, छिमिके मदुगु बी माः धयागु मदु। 
छिमिसं अप्‍वः ब्‍यु, मेपिन्‍सं भतिचा जक ब्‍यूसां गाः धकाः जिमिसं धयाच्‍वनागु मखु। मेपिन्‍सं ब्‍यूगु ति जक छिमिसं नं ब्‍यूसां गाः। 
थौकन्हय्‌ छिमिके माक्व दु। अय्‌जूगुलिं छिमिसं मदुपिन्त बी माः। अले इमिसं दइबलय्‌ छिमित मगाइबलय्‌ ग्‍वाहालि बी। थुकथं छिमिसं थःथवय्‌ ग्वाहालि बी फइ। अले फुक्‍क उति हे ग्‍यनी। 
धर्मशास्‍त्रय्‌ नं थथे च्‍वयातःगु दु -- “अप्वः मुंकूपिनि अप्‍वः मजू। म्‍हो मुंकूपिनि मगाः मजू।” 
परमेश्वरं यानाः तीतसं नं जिं थें छिमित ग्‍वाहालि बी मास्‍ति वय्‌काच्‍वंगुलिं जिमिसं परमेश्वरयात सुभाय्‌ बियाच्‍वनागु दु। 
जिमिसं धयाः जक व वःगु मखु, व थः यसें हे छिमिथाय्‌ वःगु खः। 
भिंगु खँ न्‍यंकाः जुइम्‍ह फुक्‍क मण्‍डलीयापिन्‍सं भिं धया तःम्‍ह छम्‍ह विश्वासी किजायात नं व नाप छिमिथाय्‌ छ्वयाहयागु दु। 
थुलि जक मखु, विश्वासीतय्‌त ग्‍वाहालि बीत जिपिं नाप वयाः भेटी कायेत मण्‍डलीयापिन्‍सं थ्‍व हे किजायात ल्‍ययादीगु खः। थुकिं प्रभुयात तःधंकेत जिमिसं गुलि ग्‍वाहालि बी मास्‍ति वय्‌काच्‍वनागु दु धकाः सी दइ। 
थुलिमछि धिबा जिमिसं कयाः यंकाच्‍वनागुलिइ सुनानं जिमित मभिंगु खँ ल्‍हाये मफयेमा धकाः जिमिसं होश यानाच्‍वनागु दु। 
प्रभुया न्‍ह्यःने जक मखु, मनूतय्‌गु न्‍ह्यःने नं भिंगु ज्‍या यायेत जिमिसं कुतः यानाच्‍वना। 
अय्‌जूगुलिं जिमिसं इपिं नाप मेम्‍ह किजायात नं छ्वयाहयागु दु। तःकः जाँचय्‌ यानाः स्‍वयाः जिमिसं वयात ज्या याये तसकं इच्छा दुम्ह धकाः सीका। अज्‍ज ला छिमिके अप्वः भरोसा दुगुलिं थौंकन्हय्‌ व ग्‍वाहालि यायेत अप्वः न्ह्यचिलाच्वंगु दु। 
तीतस जक जि लिसे जानाः छिमित ग्‍वाहालि बीगु ज्‍या याना च्‍वंम्‍ह खः। व नाप वःपिं मेपिं दाजुकिजापिं मण्‍डलीयापिं मनूत खः, इपिं नं ख्रीष्‍टयागु नां तःधंकेत ज्‍या याइपिं खः। 
अय्‌जूगुलिं इमित नं माया यानाः छिमिसं थःगु मायायागु दसु क्‍यँ। अले जिमिसं छिमिगु खँ ल्‍हानाच्‍वनागु फुक्‍क सत्‍य खः धकाः फुक्‍क थासय्‌ च्‍वंगु मण्‍डलीयापिन्‍सं सीकी।