१ कोरिन्‍थी.
14.
अय्‌जूगुलिं छिमिसं कर्पिन्‍त माया यायेगु कुतः या। आत्‍मायागु वरदान कायेत नं कुतः या। अज्‍ज ला अगमवाणी कनेगु वरदान कायेत स्‍व। 
थी थी भासं नवाइम्‍ह मनुखं मनूत नाप नवाःगु मखु बरु परमेश्वर नाप नवाःगु खः। वं नवाःगु खँ सुनानं थुइ मखु। आत्‍मायागु शक्तिं वं गुप्‍ति खँ ल्‍हानाच्‍वंगु खः। 
अगमवाणी कनिम्‍हय्‌सिनं ला मनूत नाप हे खँ ल्‍हाइ, अले थुकिं मनूतय्‌त ग्‍वाहालि, साहस व शान्‍ति बी। 
थी थी भासं नवाइम्‍ह मनुखं थःत जक हे भिंकी, अगमवाणी कनिम्‍हय्‌सिनं ला मण्‍डलीयात हे भिंकी। 
छिपिं फुक्‍कसिनं थी थी भासं नवाये फयेमा धकाः जिं मनं तुना। अज्‍ज ला छिपिं फुक्‍कसिनं अगमवाणी कनेगु वरदान काये फयेमा धकाः जिं झन अप्वः मनं तुना च्‍वना। थी थी भासं नवाइम्‍ह मनू स्‍वयाः अगमवाणी कनिम्‍ह मनू यक्‍व हे तःधं। अले थी थी भासं नवाःगु खँ कर्पिन्‍त थुइका बी फुसा जक मण्‍डलीयात भिंकी, मखुसा भिंकी मखु। 
अय्‌जूगुलिं यःपिं दाजुकिजापिं, छिमि थाय्‌ वयाः जिं थी थी भासं नवाःसा छिमित छु ज्‍यालगय्‌ जुइ? थी थी भासं नवायेगु स्‍वयाः परमेश्वरं जितः क्‍यनादीगु खँ, ज्ञानयागु खँ, अगमवाणी, अले शिक्षा न्‍यंकुसा हे जक छिमित ज्‍यालगय्‌ जुइ। 
बाँसुरी पुइबलय्‌ व वीणा थायेबलय्‌ त्‍याजिक सः पिमज्‍वःसा मनूतय्‌सं थुकिया लय्‌ थुइका काये फइ मखु। 
तुरही पूम्‍हय्‌सिनं बांलाक ध्‍वाथुइक मपूसा लडाइँ वनेत सु न्‍ह्यब्‍वाइ? 
अथे हे तुं छिमिसं थी थी भासं नवाःगु ध्‍वामथूसा छिमिगु खँ सुनानं थुइके फइ मखु। छिमिसं फसय्‌ नवाःगु थें जक जुइ। 
संसारय्‌ तःता भाय्‌ दु, अय्‌नं न्‍ह्यागु भाय्‌या थः थःगु हे अर्थ दु। 
सुनानं ल्‍हाःगु भाय्‌ मथूसा जितः व मनू मेगु देशय्‌ च्‍वंम्‍ह थें जुइ, अथे हे वयात नं जि मेगु देशय्‌ च्‍वंम्‍ह थें जुइ। 
आत्‍मां बीगु वरदानयात छिमिसं यय्‌काच्‍वंगु दु। अय्‌जूगुलिं मेमेगु वरदान स्‍वयाः मण्‍डलीयात भिनिगु व बल्‍लाना वइगु वरदान कायेत कुतः या। 
अय्‌जूगुलिं थी थी भासं नवाइम्‍ह मनुखं अथे थःम्‍हय्‌सिनं नवानागु खँयात थुइका नं बी फयेमा धकाः प्रार्थना याये माः। 
मथूगु भासं जिं प्रार्थना याःसा जिगु आत्‍मां ला प्रार्थना याइ, जिगु मनं धाःसा थुकी ब्‍वति काइ मखु। 
अय्‌जूसा जिं छु यायेगु लय्‌? जिं प्रार्थना यायेबलय्‌ जिगु आत्‍मां नं जिगु मनं नं याये माः। अथे हे म्‍ये हालेबलय्‌ जिगु आत्‍मां नं जिगु मनं नं हाले माः। 
परमेश्वरयात सुभाय्‌ बीत छंगु आत्‍मां जक प्रार्थना याःसा मेपिं न्‍यना च्‍वंपिन्‍सं मथुइकं गथे यानाः “आमेन” धकाः धायेगु? 
थथे छं परमेश्वरयात ब्‍यूगु सुभाय्‌ तसकं हे बांलाःसां थुकिं मेपिन्‍त भिंकी मखु। 
छिमिसं स्‍वयाः जिं थी थी भासं नवाये फु, उकिं जिं परमेश्वरयात सुभाय्‌ बी। 
मण्‍डली मुनाः सेवा यायेबलय्‌ धाःसा द्वःछिगू खँग्‍वः नवायेगु स्‍वयाः मेपिन्‍सं थुइक न्‍यागू हे जक खँग्‍वलं स्‍यनेगु यः। 
यःपिं दाजुकिजापिं, थुइकेगु सीकेगु खँय्‌ छिपिं मस्‍त थें जुइ मते। मभिंगु खँय्‌ धाःसा छिपिं मस्‍त थें जु। थुइकेगु व सीकेगु खँय्‌ छिपिं तःधिपिं थें जु। 
धर्मशास्‍त्रय्‌ नं थथे च्‍वयातःगु दु -- “मथूगु भाय्‌ ल्हाइपिं मनूतय्‌गु म्हुतुं व परदेशीतय्‌गु म्हुतुं जिं थः मनूत नापं खँ ल्‍हाये। अय्‌नं इमिसं जिगु खँ न्‍यनी मखु।” 
अय्‌जूगुलिं थी थी भाय्‌ विश्वास याना च्वंपिनिगु निंतिं मखु, तर विश्वास मयाःपिनिगु निंतिं चिं खः। तर अगमवाणी विश्वास मयाःपिनिगु निंतिं मखु, तर विश्वास याना च्वंपिंनिगु निंतिं खः। 
मण्‍डलीइ फुक्‍क मुना च्‍वनीबलय्‌ थथे फुक्‍कसिनं थी थी भासं नवाना च्‍वनीबलय्‌ विश्वास मयाःनिपिं व छुं मस्‍यूपिं मनूत वल धाःसा इमिसं छिमित “वें” धकाः मधाइ ला? 
अथे हे अगमवाणी कना च्‍वंबलय्‌ विश्वास मयाःनिम्‍ह सुं मनू वल धाःसा वं वचन न्‍यनाः थःगु पापया पश्‍चाताप याइ। थुकथं थःम्‍हं थःत नं जाँचय्‌ याइ। 
वयागु नुगलय्‌ च्‍वंगु गुप्‍ति खँ नं सी दइ। अले वं “धात्‍थें हे परमेश्वर छिपिं नापदी खनि” धकाः क्‍वछुनाः परमेश्वरयात तःधंकी। 
यःपिं दाजुकिजापिं, जिगु धापू छिमिसं थुल ला? छिपिं फुक्‍कं छथाय्‌ मुनाः परमेश्वरयात सेवा यायेबलय्‌ छम्‍हय्‌सिनं भजन यायेगु, छम्‍हय्‌सिनं स्‍यनेगु, छम्‍हय्‌सिनं परमेश्वरं क्‍यनादीगु खँ न्‍यंकेगु, छम्‍हय्‌सिनं थी थी भासं नवायेगु, अले छम्‍हय्‌सिनं थथे थी थी भासं नवाःगु थुइका बीगु याये माः। थ्‍व फुक्‍क ज्‍यां मण्‍डलीयात भिंकिगु जुइ माः। 
थी थी भासं नवायेगु ज्‍या निम्‍ह स्‍वम्‍हय्‌सिनं स्‍वयाः अप्‍वःसिनं याये मज्‍यू। व नं पालंपाः याये माः। अले थथे थी थी भासं नवाःगु खँयात छम्‍हय्‌सिनं थुइकाबीगु याये माः। 
अय्‌नं थी थी भासं नवाःगु खँ थुइका बीम्‍ह सुं नं मदुसा मण्‍डलीइ अथे थी थी भासं नवाके मते। थज्‍याःम्‍ह मनुखं थःलिसे व परमेश्वरलिसे जक अथे नवायेगु याये माः, मण्‍डलीइ वयाः नवाये मज्‍यू। 
अले हानं अगमवाणी कनेगु नं निम्‍ह स्‍वम्‍हय्‌सिनं जक याये माः। थथे इमिसं न्‍यंकीगु वचनयात खः ला कि मखु धकाः जाँचय्‌ याये माः। 
थथे नवाना च्‍वनीबलय्‌ परमेश्वरं अन दुपिं सुयातं नवायेत धयादिल धाःसा नवाना च्‍वंम्‍हय्‌सिनं दिना बी माः। 
छम्‍ह छम्‍ह यानाः छिपिं फुक्‍कसिनं अगमवाणी कने ज्‍यू। अले जक फुक्‍कसिनं स नं सय्‌की, अले साहस नं दइ। 
अगमवाणी कनेगु वरदान दुपिं मनूतय्‌सं थःत बसय्‌ तये माः। 
न्‍ह्यःनेलाःथें यायेत झीत परमेश्वरं सःतादीगु मखु बरु बांलाक यायेत अले मिलय्‌ जुइत सःतादीगु खः। 
मण्‍डलीइ सेवा यायेबलय्‌ मिसातय्‌सं नवाये मज्‍यू। इमित नवाके मज्‍यू। व्‍यवस्‍थां धाःकथं इपिं अधिनय्‌ च्‍वने माः। 
इमिसं छुं खँ सीके मास्‍ति वःसा छेँय्‌ थः भाःतयाके न्‍यने माः। मण्‍डलीइ मिसातय्‌सं नवायेगु तसकं हे बांमलाःगु खँ खः। 
परमेश्वरयागु वचन छिमिगु पाखें हे दुगु खः ला? परमेश्वरयागु वचन छिमिथाय्‌ जक वःगु खः ला? 
सुनानं थः अगमवक्ता व परमेश्वरयागु वरदान दुम्‍ह मनू खः धकाः बिचाः याःसा वं जिं च्‍वयाच्‍वनागु थ्‍व खँ परमेश्वरयागु उजं खः धकाः सीके माः। 
जिगु थ्‍व खँयात सुनानं मन्‍यंसा वयागु खँ नं न्‍यने मते। 
अय्‌जूगुलिं यःपिं दाजुकिजापिं, अगमवाणी कनेगु वरदान कायेत कुतः या। अय्‌नं थी थी भासं नवाइपिन्‍त नं पने मते। 
न्‍ह्यागु हे ज्‍या याःसां पालंपाः व बांलाक या।