रोमी.
12.
यःपिं दाजुकिजापिं, थथे परमेश्वरयागु दया मायां यानाः वय्‌कःयात यय्‌क, पवित्र जुइक, छिमिगु जीवन वय्‌कःयात यः कथं देछाया ब्‍यु। थथे यायेगु हे दुनुगलंनिसें सेवा यायेगु खः। 
आवंनिसें थ्‍व संसारयापिं मनूतय्‌सं याना जूथें छिमिसं याना जुइ मते, बरु मनयात हीकाः न्‍हूपिं मनूत जुया च्‍वँ। थुकथं याना जूसा परमेश्वरयागु इच्‍छा छु खः, अले भिंगु, वय्‌कःयात यःगु, व छु खँ ठीक जू छिमिसं बांलाक सीके थुइके फइ। 
परमेश्वरं जितः दया माया यानादीगुलिं छिपिं फुक्‍कसिनं थःत तःधंम्‍ह धकाः मतिइ तया जुइ मते धकाः जिं छिमित बिन्‍ति यानाच्‍वना। परमेश्वरं छिमित बियादीगु विश्वास गपाय्‌धंगु खः उलि हे जक बांलाक बिचाः या। 
छाय्‌धाःसा मनूया म्‍ह छगू जूसां उकी यक्‍व म्‍हब्‍व दु। अले फुक्‍क म्‍हब्‍वतय्‌गु ज्‍या छगू हे जुइ मखु। 
थथे हे झीपिं नं यक्‍व दसां ख्रीष्‍टयागु म्‍हय्‌ ला छम्‍ह हे जक खः। अले थी थी म्‍हब्‍वत छगू छगू यानाः मिलय्‌ याना तःपिं खः। 
परमेश्वरं झीत दया माया यानाः बियातःगु थी थी वरदानयात झीसं छ्यले माल। अगमवाणी कनेगु वरदान दःसा वं विश्वासं थ्‍व ज्‍या यायेमाः। 
सेवा याइगु वरदान दःसा सेवा हे याये माः। स्‍यनेकने यायेगु वरदान दःसा स्‍यनेकने हे यायेमाः। 
अर्ती बीगु वरदान दःसा अर्ती बीगु हे यायेमाः। बीगु वरदान दःसा दुनुगलंनिसें बीगु यायेमाः। नायः जुइगु वरदान दःसा बुद्धि पूरय्‌ यानाः यायेमाः। कर्पिन्‍त दया माया यायेगु वरदान दःसा लय्‌तायाः या। 
दुनुगलंनिसें छिमिसं धात्‍थेंगु माया या। मभिंगु फुक्‍कं त्‍वःता छ्व। छु छु भिंगु खः व हे जक क्‍वात्तुक ज्‍वना ति। 
छिपिं विश्वासी दाजुकिजापिं थःथवय्‌ दुनुगलंनिसें माया याना च्‍वँ। थःथवय्‌ हनाबना तया च्‍वँ। 
याये माःगु ज्‍याय्‌ अल्‍छी चाये मते। दुनुगलंनिसें जोश दय्‌काः प्रभुयात सेवा याना च्‍वँ। 
छिमिके तःधंगु आशा दुगुलिं लय्‌ताया च्‍वँ। दुःखकष्‍ट जूसां सह याना च्‍वँ। प्रार्थना यायेगु गुबलें त्‍वःते मते। 
मगाःमचाःपिं दाजुकिजापिन्त ग्वाहालि या। छेँय्‌ पांहा वःपिन्‍त दुनुगलंनिसें सेवा यायेगु या। 
छिमित सास्ति ब्यूपिन्‍त सुवाः ब्‍यु, इमित सराः बी मते। 
लय्‌ताय्‌त च्वंपिं नाप छिपिं नं लय्‌ता। अले ख्‍वया च्‍वंपिं नाप छिपिं नं ख्‍व। 
छिपिं फुक्‍कं मिलय्‌ चलय्‌ जुयाः च्‍वनेगु या। तःधंछु जुइ मते, थःत जक यःथें याना जुइ मते, बरु चिधंपिं नाप बुला जुइगु बानि त्‍वःते मते। गुबलें घमण्‍डी जुइ मते। 
मभिंगुया पलेसा मभिंगु हे याये मते, बरु फुक्‍क मनूतय्‌त यइपुसे च्‍वंगु व भिंगु जक याना जु। 
फुक्‍क मनूत नाप फयां फतलय्‌ मिलय्‌ जुया च्‍वनेगु कुतः या। 
यःपिं दाजुकिजापिं, छिपिं थःपिन्‍सं हे पलेसा कायेगु स्‍वये मते, बरु परमेश्वरया तच्‍वःगु तंमय्‌ त्‍वःताब्यु। छाय्‌धाःसा धर्मशास्‍त्रय्‌ च्‍वया तःगु दु, “बदला कायेगु जिगु ज्‍या खः, जिं इमित सजाँय बी” परमप्रभुं धयादी। 
धर्मशास्‍त्रय्‌ च्‍वया तःथें याना च्‍वँ -- “थः शत्रु द्यांलाःसा वयात नयेगु ब्‍यु, अले पित्‍याःसा वयात त्‍वने ब्‍यु। थथे यात धाःसा मछालाः वयागु ख्वाः ह्याउँसे च्वनी।” 
मभिंगुलिं छिमित त्‍याके बी मते, बरु छिमिसं भिंगु यानाः मभिंगुयात त्‍याके फय्‌कि।