रोमी.
3.
थथे खः धयागु जूसा यहूदीत जुइवं तुं छु फाइदा दत लय्‌? म्‍हय्‌ चिं तःगु छु ज्‍यालगय्‌ जुल? 
न्‍ह्याखें नं इमित फाइदाया फाइदा जक दु। दकलय्‌ न्‍हापालाक यहूदीतय्‌त हे परमेश्वरयागु वचन लः ल्‍हानातःगु खः। 
इपिं मध्‍ये सुं यहूदीतय्‌सं विश्वास मयात धायेवं छु जुल धकाः? छु इमिसं विश्वास मयात धायेवं परमेश्वर विश्वास याये बहः मजूम्‍ह जुइ ला? 
गुबलें नं जुइ फइ मखु। फुक्‍क मनूत फताहा जूसां परमेश्वर सत्यम्ह हे जुयादी धकाः थथे धर्मशास्‍त्रय्‌ नं च्‍वयातःगु दु -- “छिं जिगु न्याय यानादीगु पाय्‌छि जू अले जितः दोषी ठहरय्‌ यानादीगु पाय्‌छि ताय्‌के।” 
झीसं यानागु मभिंगु ज्‍यां परमेश्वरया धार्मिकता झन सी दत धाःसा झीसं छु धायेगु? परमेश्वरं तं चायाः झीत सजाँय बियादीवं परमेश्वर मभिंम्‍ह जुइ ला? (थ्‍व खँ जिं मनूतय्‌सं थें धया च्‍वनागु दु।) 
थथे जुइ फइ मखु। थथे खःसा परमेश्वरं संसारयात गथे यानाः न्‍याय यानादी? 
जिगु मभिंगु ज्‍याखं यानाः परमेश्वर सत्यम्ह खः धकाः झन बांलाक सी दइ धाःसा जिं छाय्‌ हानं पापी थें जुयाः इन्‍साफय्‌ लानाच्‍वनेगु? 
गुम्‍हं गुम्‍हय्‌सिनं जितः तसकं बांमलाकाः जिं थथे धाल धकाः धाइ -- “मभिंगु यानाः भिं जुया वइगु खःसा मभिंगु जक छाय्‌ मयायेगु?” थज्‍याःपिं मनूतय्‌सं तःधंगु सजाँय फयेमाली। 
अय्‌सा यहूदीत जुल धकाः झीपिं मेपिं मनूत स्‍वयाः भिं जुल ला? मखु, झीपिं नं भिंपिं मखु। यहूदीत व यहूदीमखुपिं नं फुक्‍कं पापयागु पन्‍जाय्‌ लानाच्‍वंगु दु धकाः ला दोष बी हे धुन। 
धर्मशास्‍त्रय्‌ नं थथे च्‍वयातःगु दु -- “सुं हे धर्मी मदु, अहं, छम्‍ह हे मदु। 
परमेश्वरयात सुनानं मथू, वय्‌कःयात मालाजुइपिं सुं हे मदु। 
इपिं मखुगु लँय्‌ वने धुंकल, इपिं स्‍यना वने धुंकल। भिंगु याइपिं छम्ह हे मदयेधुंकल। 
इमिगु कथुप्‍वाः दिपया लुखा थें चाः। इमिसं नवाइगु सर्पं न्‍याःगु थें खः, इमिगु म्‍हुतुसि सर्पयागु बिख दइ। 
इमिगु म्‍हुतु सराः व मभिंगु खं जक जायाच्‍वंगु दु। 
मनूतय्‌त स्‍यायेत इमिगु तुति न्‍ह्यज्‍याः। 
इमिगु लँपुइ दुःखकष्‍ट व विनाश जक दु। 
थज्‍याःपिन्‍सं शान्‍तियागु लँपु म्‍हमस्‍यू। 
इमिके परमेश्वरयागु ग्याःभय भ्याःभचा हे दइ मखु।” 
आः झीसं थ्‍व खँ सिल, व्‍यवस्‍थाय्‌ च्‍वया तक्‍व फुक्‍कं व्‍यवस्‍था पालन याःम्‍हय्‌सित जक धयातःगु खः। अय्‌जूगुलिं सुनानं छुं धाय्‌थाय्‌ मदु। जिं हानं धाये -- संसारयापिं फुक्‍क मनूत परमेश्वरया न्‍ह्यःने दोषी ठहरय्‌ जुइ धुंकल। 
व्‍यवस्‍थाय्‌ च्‍वयातःगु नियम पालन यानाः सुं हे मनू धर्मी जुइ फइ मखु। व्‍यवस्‍थां ला पाप छु खः धकाः क्‍यना बी। 
आः ला व्‍यवस्‍था मानय्‌ याये म्‍वाय्‌क हे परमेश्वरं फुक्‍कसितं धर्मी ठहरय्‌ यानादी धयागु खँ सी दये धुंकूगु दु। व्‍यवस्‍था ब्‍यूम्‍ह मोशां व अगमवक्तातय्‌सं नं थथे जुइतिनि धकाः न्‍हापा हे च्‍वयातःगु दु। 
येशू ख्रीष्‍टयात विश्वास याक्‍वसित परमेश्वरं धर्मी ठहरय्‌ यानादी, छाय्‌धाःसा वय्‌कलं यहूदी व यहूदीमखुपिं धकाः पाकादी मखु। 
सकसिनं पाप याःगु दु, उकिं इपिं परमेश्वरया महिमां तापाय्‌ धुंकल। 
अय्‌नं परमेश्वर दया दुम्‍ह जूगुलिं वय्‌कलं ख्रीष्‍टयात छ्वया हयाः झीत सितिकं धर्मी यानादिल। 
परमेश्वरं येशू ख्रीष्‍टयात प्रायश्‍चितया बलिदान याकाः वय्‌कःयागु हिं वय्‌कःयात विश्वास याक्‍वसिगु पाप क्षमा यानादिल। वय्‌कलं न्‍हापा न्‍हापायापिं मनूतय्‌गु पापया सजाँय मब्‍युसे सह यानादिल। 
वय्‌कः ख्‍वाः स्‍वयाः न्याय यानामदीम्‍ह परमेश्वर खः धकाः क्‍यनेत व येशूयात विश्वास याक्‍वसित धर्मी ठहरय्‌ यानादी धकाः क्‍यनेत वय्‌कलं थथे यानादीगु खः। 
थथे खः धयागु जूसा झीसं छु खँय्‌ तःधंछुइगु? छुं खँय्‌ हे मदु। झी छु खँय्‌ तःधनेगु? व्‍यवस्‍था मानय्‌ यानागुलिं मखु, बरु विश्वास यानागुलिं खः। 
व्‍यवस्‍था मानय्‌ मयासे हे ख्रीष्‍टयात विश्वास याःम्‍ह मनूयात परमेश्वरं धर्मी ठहरय्‌ यानादी। 
छु परमेश्वर यहूदीतय्‌ जक परमेश्वर खः ला? वय्‌कः यहूदीमखुपिं मनूतय्‌ परमेश्वर मखु ला? वय्‌कः यहूदीमखुपिं मनूतय्‌ नं परमेश्वर खः। 
परमेश्वर छम्‍ह हे जक जूगुलिं वय्‌कलं म्‍हय्‌ चिं तःपिन्‍त नं मतःपिन्‍त नं व हे विश्वासं धर्मी ठहरय्‌ यानादी। 
छु थ्‍व विश्वासं यानाः व्‍यवस्‍था ज्‍यालगय्‌ मजुल ला? अहं, अथे मखु, बरु झीसं ला व्‍यवस्‍थायात झन जक बांलाक मानय्‌ यानाच्‍वनागु जुइ।