प्रेरित.
21.
इपिं लिसे बिदा जुयाः जिपिं अनं लःजहाजय्‌ च्‍वनाः कोसय्‌ थ्‍यंकः वयाः कन्‍हय्‌ खुन्‍हु रोडसय्‌, अले कंस खुन्‍हु पटाराय्‌ थ्‍यंकः वना। 
फोनिकेय्‌ वनेत्‍यंगु लःजहाज नाप लाःगुलिं जिपिं उकी हे च्‍वनाः वना। 
जिपिं साइप्रसया सत्तिक जुयाः दच्‍छिन पाखें सिरिया वना। टुरोसय्‌ मालसामान क्‍वकाय्‌त लःजहाज दिकूगुलिं जिपिं नं कुहां वना। 
विश्वासीतय्‌त नाप लाःगुलिं जिपिं न्‍हय्‌न्‍हु अन हे च्‍वना। पवित्र आत्‍मापाखें सीकाः इमिसं पावलयात यरूशलेमय्‌ वने मते धकाः धाल। 
न्‍हय्‌न्‍हु तक च्‍वने धुंकाः अन च्‍वंपिं फुक्‍क विश्वासीत थः कलाः व मचाखाचात नापं ज्‍वनाः जिमित शहरं पिने तक तः वल। जिमिसं समुद्र सिथय्‌ पुलिं चुयाः प्रार्थना याना। 
थथे इपिं नाप बिदा जुयाः जिपिं लःजहाजय्‌ च्‍वं वना। इपिं छेँय्‌ तुं लिहां वन। 
जिपिं लःजहाजय्‌ च्‍वनाः टुरोसं टोलेमाइसय्‌ थ्‍यंकः वया। दाजुकिजापिन्‍त नाप लानाः जिपिं छन्‍हु अन हे च्‍वना। 
कन्‍हय्‌ खुन्‍हु हे जिपिं अनं कैसरियाय्‌ वना। जिपिं अन भिंगु खँ न्‍यंका जुइम्‍ह फिलिप धाःम्‍हय्‌सिथाय्‌ वना। अले व नाप हे छन्‍हु निन्‍हु च्‍वना। यरूशलेमय्‌ ग्‍वाहालि यायेत ल्‍यःपिं न्‍हय्‌म्‍ह मध्‍ये व नं छम्‍ह खः। 
फिलिपया अगमवाणी कनिपिं, बिया मछ्वःनिपिं प्‍यम्‍ह म्‍ह्याय्‌पिं दु। 
जिपिं अन छुं न्‍हि हे च्‍वना। उबलय्‌ यहूदियां अगाबस धाःम्‍ह अगमवक्ता छम्‍ह वल। 
वं पावलयागु जनी कयाः थःगु ल्‍हाःतुति चिनाः थथे धाल -- “पवित्र आत्‍मां थथे धयादीगु दु -- ‘थ्‍व जनीया थुवाःयात यरूशलेमय्‌ वन धाःसा यहूदीतय्‌ नायःतय्‌सं थथे हे यानाः चिना बी, अले यहूदीमखुपिन्‍त लःल्‍हाना बी।’” 
थ्‍व खँ न्‍यनाः जिमिसं व अन च्‍वंपिं मनूतय्‌सं पावलयात यरूशलेमय्‌ वने मते धकाः पना। 
पावलं धाःसा थथे लिसः बिल -- “छिकपिन्‍सं थथे ख्‍वयाः हालाः जिगु मन क्‍वतुंकेत स्‍वयां छु याये? प्रभु येशूयागु नामय्‌ ज्‍वनाः चिकेत जक छु सीत तकं लिचिले मखु।” 
जिमिसं धयागु खँ वं न्‍यँ हे मन्‍यंगुलिं जिपिं थथे धयाः सुम्‍क च्‍वना -- “प्रभुं मनं तुनादीथें जुइमा।” 
अनं लिपा जिपिं थःथःगु सामान ज्‍वनाः यरूशलेमय्‌ स्‍वया वना। 
कैसरियाय्‌ च्‍वंपिं सुं दाजुकिजापिं नं जिपिं लिसे हे वल। इमिसं जिमित साइप्रसं वया च्‍वंम्‍ह मनासोन धाःम्‍ह छम्‍ह पुलांम्‍ह विश्वासीयागु छेँय्‌ थ्‍यंका बिल। 
जिपिं यरूशलेमय्‌ थ्‍यंबलय्‌ अन च्‍वंपिं दाजुकिजापिं जिमित खनाः तसकं लय्‌ताल। 
कन्‍हय्‌ खुन्‍हु पावल व जिपिं फुक्‍क याकूबयाथाय्‌ वना। अन मण्‍डलीयापिं फुक्‍क थकालिपिं मुनाच्‍वंगु जुयाच्‍वन। 
इमित ज्‍वजलपा याये धुंकाः पावलं यहूदीमखुपिन्‍थाय्‌ भिंगु खँ न्‍यंका जूबलय्‌ परमेश्वरं गज्‍याःगज्‍याःगु ज्‍या यानादिल धयागु छता छता खँ कन। 
पावलयागु खँ न्‍यनाः इमिसं परमेश्वरयात तःधंकल। अले वयात धाल -- “किजा, थन नं द्वलंद्वः यहूदीतय्‌सं विश्वासी जुइ धुंकाः नं व्‍यवस्‍थायात उलि हे मानय्‌ यानाच्‍वंगु दु। 
इमिसं छता निता छंगु खँ नं न्‍यनातःगु दु। छिं यहूदीमखुपिनिगु देशय्‌ च्‍वनाच्‍वंपिं यहूदीतय्‌त ‘आः मोशायागु व्‍यवस्‍थायात नं मस्‍तय्‌त म्‍हय्‌ चिं तय्‌केगु नं त्‍वःता छ्व, व्‍यवस्‍थाय्‌ च्‍वया तःथें नं जुइ मते’ धकाः धया जुल हं। 
अय्‌जूगुलिं आः छु यायेगु? इमिसं छि थन वःगु दु धकाः मसीकी मखु। 
“उकिं जिमिसं धयाथें याना दिसँ। जिमिथाय्‌ भाकल याना च्‍वंपिं प्‍यम्‍ह मनूत दु। 
इपिं लिसे शुद्ध जुइत छि नं देगलय्‌ झासँ। अले इमित सँ खायेत नं छिं हे धिबा पुला बिया दिसँ। अले तिनि छिं थथे व्‍यवस्‍थाय्‌ च्‍वया तःथें याःगु खनाः इमिसं थःपिन्‍सं न्‍यनातःगु खँ मखु धकाः ताय्‌की। 
“यहूदीमखुपिं विश्वासीतय्‌त जक जिमिसं ‘मूर्तियात छाःगु प्रसाद नये मते, हि त्‍वने मते, हि मम्‍हुकुसे स्‍यानातःगु ला नये मते, व्‍यभिचार याये मते’ धकाः पौ च्‍वया छ्वयागु दु।” 
अले पावलं उपिं मनूतय्‌त ब्‍वना यंकाः कन्‍हय्‌ खुन्‍हु हे इपिं प्‍यम्‍ह नाप देगलय्‌ वन। इमिसं शुद्ध याये धुंकूगु खः। उकी वं इमिगु भाकल पूवनिगु दिं व इपिं छम्‍ह छम्‍हय्‌सिगु निंतिं बां स्यायेगु दिं पुजाहारीतय्‌त कन। 
न्‍हय्‌न्‍हुया ई पूवनेत्यंबलय्‌ एशियां वःपिं सुं यहूदीतय्‌सं पावलयात देगलय्‌ खनाः अन च्‍वंपिं मनूत फुक्‍कसित ग्‍वाकाः थथे धकाः हालाः हय्‌क्‍काः वन -- 
“हे इस्राएली दाजुकिजापिं, जिमित ग्‍वाहालि यानादिसँ। उखेंथुखें वनाः सकसितं झी मनूत, मोशायागु व्‍यवस्‍था व थ्‍व देगःया विरोधय्‌ न्‍यंका जूम्‍ह थ्‍व हे खः। नकतिनि हे जक थ्‍वं यहूदीमखुपिन्‍त देगलय्‌ हयाः थ्‍व थाय्‌यात अपवित्र याना बिल।” 
इमिसं एफिससं वःम्‍ह त्रोफिमसयात शहरय्‌ पावल नाप खंगुलिं पावलं वयात देगलय्‌ हःगु जुइ धकाः थथे धाःगु खः। 
थ्‍व न्‍यनाः शहरय्‌ च्‍वंपिं मनूत अन मुंवल। इमिसं पावलयात लुयाः देगलं पिने हल। अले देगःयागु ध्‍वाखा तिनाबिल। 
इमिसं पावलयात थुकथं स्‍यायेत्‍यंबलय्‌ यरूशलेमय्‌ खलबल जुयाच्‍वन धयागु खँ तःधंम्‍ह रोमी कप्‍तानयाथाय्‌ थ्‍यन। 
थ्‍व खँ न्‍यनाः व सिपाइँत व कप्‍तानतय्‌त ब्‍वनाः अन थ्‍यंकः वल। तःधंम्‍ह कप्‍तान व सिपाइँतय्‌त खनेवं इमिसं पावलयात दायेगु त्‍वःतल। 
अले कप्‍तानं पावलयात ज्‍वनाः निपु सिखलं चिकेबियाः मनूतय्‌त थथे धकाः न्‍यन -- “थ्‍व मनुखं छु यात? थ्‍व गन च्‍वंम्‍ह खः?” 
अन मुना च्‍वंपिं मनूतय्‌सं छम्‍हय्‌सिनं छगू खँ धाःसा मेम्‍हय्‌सिनं मेगू हे खँ धया हाःगुलिं वं अन अथे छाय्‌ खलबल जूगु धकाः बांलाक सीके मफुत। अले वं पावलयात किल्‍लाय्‌ यंकाः कुनेगु उजं बिल। 
व त्‍वाथलय्‌ थ्‍यंबलय्‌ मनूतय्‌सं घ्‍वात्तुघ्‍वाःगुलिं वयात सिपाइँतय्‌सं ल्‍ह्वना यंकल। 
छाय्‌धाःसा “वयात स्‍या हे स्‍या” धकाः हालाः मनूतय्‌गु हुल ल्‍यू ल्‍यू वन। 
थथे किल्‍लाय्‌ दुने यंकेत्‍यंबलय्‌ पावलं तःधंम्‍ह कप्‍तानयाके न्‍यन -- “जिं छितः छता खँ धाये ला?” अले वं धाल -- “छं ग्रीक भासं खँ ल्‍हाये सः ला? 
छु छ मिश्र देशयाम्‍ह व हे मनू मखु ला? गुम्‍ह छुं न्‍हि न्‍ह्यः सरकारयात स्‍यंके माः धकाः मरुभूमिइ प्‍यद्वः मनूतय्‌ नायः जुया जूगु खः?” 
पावलं लिसः बिल -- “जि ला किलिकियागु टार्सस शहरय्‌ च्‍वंम्‍ह यहूदी खः। जि चिधंगु शहरय्‌ च्‍वंम्‍ह मखु। जितः थुपिं लिसे खँ ल्‍हाके बियादिसँ।” 
तःधंम्‍ह कप्‍तानं “नवा” धकाः धाःगुलिं पावलं त्‍वाथलय्‌ दनाः सकसितं सुम्‍क च्‍वनेत ल्‍हाः भाय्‌ यात। इपिं सुम्‍क च्‍वनेवं वं हिब्रू भासं थथे धाल --