प्रेरित.
20.
हाहू दी धुंकाः पावलं विश्वासीतय्‌त सःताः साहस बीकथं स्‍यनेकने यानाः बिदा जुयाः माकेडोनियाय्‌ वन। 
अन थ्‍यने धुंकाः थाय्‌ थासय्‌ च्‍वंपिं विश्वासीतय्‌ थाय्‌ वनाः इमित साहस बियाः व हानं ग्रीसय्‌ वन। 
अन स्‍वला तक च्‍वने धुंकाः लःजहाजं सिरियाय्‌ वने त्‍यंबलय्‌ वं यहूदीतय्‌ नायःतय्‌सं वयात स्‍यायेत स्‍वयाच्‍वंगु दु धकाः सीकाः माकेडोनिया जुयाः तुं लिहां वनेगु क्‍वःछित। 
बेरियाय्‌ च्‍वंम्‍ह पुरसया काय्‌ सोपात्रोस, थेसलोनिकें वःपिं अरिस्‍तार्खस व सिकन्‍दस, डर्बिइ च्‍वंपिं गायस व तिमोथी, अले एशियाय्‌ च्‍वंपिं तुखिकस व त्रोफिमस, थुपिं फुक्‍कं पावल नाप वन। 
इपिं जिपिं स्‍वयाः न्‍हापा हे वनाः जिमित त्रोआसय्‌ पियाच्‍वन। 
जिपिं धाःसा सोडा मतःगु मरि नयेगु नखः धुंकाः फिलिप्‍पीं लःजहाजय्‌ च्‍वनावना। न्‍यान्‍हु लिपा जिपिं त्रोआसय्‌ इमिथाय्‌ थ्‍यंकः वना, अले न्‍हय्‌न्‍हु तक अन हे च्‍वना। 
आइतबार खुन्‍हु बहनी प्रभु भ्‍वय्‌ नयेत जिपिं मुना। कन्‍हय्‌ खुन्‍हु सुथय्‌ हे वनेगु मतिइ तयाः पावलं इमित बाचा तक स्‍यनेकने यानाच्‍वन। 
अबलय्‌ जिपिं मुनाच्‍वनागु क्‍वथाय्‌ तःप्‍वाः मछि मत च्‍याकातःगु दु। 
अन युटिकस धाःम्‍ह छम्‍ह ल्‍याय्‌म्‍ह झ्‍यालय्‌ च्‍वनाच्‍वंगु। पावलं स्‍यनेकने याना च्‍वंबलय्‌ न्‍ह्यलं ब्‍वानाः व स्‍वतंनिसें कुतुं वन। स्‍वःवंबलय्‌ व सी धुंकल। 
पावलं कुहां वनाः क्‍वछुनाः सीम्‍हय्‌सित घय्‌पुनाः थथे धाल -- “ग्‍याये म्‍वाः, थ्‍व मनू मसीनि।” 
पावल तले वन, अले सकलें जानाः प्रभु भ्‍वय्‌ नल। प्रभु भ्‍वय्‌ सिधय्‌काः पावल सुथ मजुतले इपिं लिसे खँ ल्‍हानाच्‍वन। अले अनं बिदा जुयाः वन। 
इमिसं व ल्‍याय्‌म्‍हम्‍ह मनूयात छेँय्‌ यंकल। व म्‍वाना वःगुलिं इपिं तसकं लय्‌ताल। 
पावल न्‍यासि वनेगु धाःगुलिं जिपिं जक लःजहाजय्‌ च्‍वनाः अस्‍सोसय्‌ वना, छाय्‌धाःसा पावलं हे जिमित अन नाप लायेत उजं ब्‍यूगु खः। 
वयात अस्‍सोसय्‌ नाप लानाः लःजहाजय्‌ तयाः जिपिं मितिलेनेय्‌ वना। 
जिपिं लःजहाजय्‌ च्‍वनाः कन्‍हय्‌ खुन्‍हु खियस व कंसखुन्‍हु सामोसय्‌ थ्‍यंका। अनं नं कन्‍हय्‌ खुन्‍हु मिलेटसय्‌ थ्‍यंकः वना। 
पावल पेन्‍तिकोसया नखः न्‍ह्यः हे यरूशलेमय्‌ थ्‍यंकेत हथाय्‌ चायाच्‍वन। उकिं वं एशियाय् यक्‍व ई च्‍वने म्‍वाःलेमा धकाः एफिससय्‌ मद्युसे वनेगु क्‍वःछित। 
पावलं मिलेटसं एफिससय्‌ च्‍वंगु मण्‍डलीया थकालिपिन्‍त सःतके छ्वल। 
इपिं वये धुंकाः वं इमित थथे धाल -- “एशियाय्‌ वयाबलय्‌ निसें जि छिकपिं लिसे हे च्‍वनागु ला छिकपिन्‍सं सि हे स्‍यू। 
फक्‍व क्‍वमिलु जुयाः मिखां ख्‍वबि हाय्‌काः जक मखु, यहूदीतय्‌सं स्‍यायेत स्‍वःबलय्‌ नं जिं प्रभुयागु सेवा याना हे च्‍वना। 
जिं छेँय्‌ छेँय्‌ वनाः मनूतय्‌गु न्‍ह्यःने भिंगु खँ न्‍यंका जुयाबलय्‌ छिकपिनिगु भिं जुइगु छुं हे खँ मल्‍यंका। 
जिं यहूदीतय्‌त व यहूदीमखुपिन्‍त थःथःगु पापं लिचिलाः परमेश्वरयाथाय्‌ लिहां वयेत व झी प्रभु येशू ख्रीष्‍टयात विश्वास यायेत न्‍यंका जुया। 
“आः स्‍वयादिसँ, जि आत्‍मायागु खँ न्‍यनाः यरूशलेमय्‌ वनेत्‍यना। अन जितः छु छु जुइ धकाः जिं मस्‍यू। 
अथेसां पवित्र आत्‍मां जितः शहर पतिकं दुःखकष्‍ट सिया च्‍वने माली व झ्‍यालखानाय्‌ वने माली धकाः सीके बियादीगु दु। 
न्‍ह्याथे हे जूसां जिं जिगु च्‍यूताः तये मखु, अले परमेश्वरं यानादीगु दया मायायागु भिंगु खँ न्‍यंका जुयाः प्रभु येशूं बियादीगु ज्‍या जक पूवंके दःसा गाः।” 
“आः स्‍वयादिसँ, छिकपिं जिं परमेश्वरयागु राज्‍यया खँ न्‍यंका वया च्‍वनापिं, छिकपिन्‍सं हानं जिगु ख्‍वाः स्‍वये दइ मखु धकाः जिं स्‍यू। 
अय्‌जूगुलिं जिं छिकपिन्‍त धयाच्‍वना -- छुं जुयाः छिकपिं सुं नं नाश जुया वन धाःसा जितः दोष लाइ मखु। 
छाय्‌धाःसा परमेश्वरयागु खँ छुं नं मल्‍यंकुसे जिं छिकपिन्‍त न्‍यंकागु हे दु। 
“अथेजूगुलिं होश या, अले पवित्र आत्‍मां धाःथें छिकपिन्‍सं विश्वासीतय्‌गु हेरबिचार याना च्‍वँ, छाय्‌धाःसा प्रभुं थःगु हि हाय्‌काः इमित न्‍यानादीगु खः, अले छिकपिं इमि जवाः खः। 
जिं स्‍यू, जि वने धुंकाः थन मण्‍डलीयात स्‍यंकीपिं गुँखिचात वइ। 
थुलि जक मखु, छिकपिनिगु हे पुचलं मखुगु खँ ल्‍हाना जुइपिं मनूत पिहां वइ। अले इमिसं विश्वासीतय्‌त थःगु हे मभिंगु लँय्‌ यंकी। 
अय्‌जूगुलिं होश याना च्‍वँ, स्‍वदँ स्‍वदँ तक जिं छिकपिन्‍त चच्‍छि न्‍हिच्‍छि ख्‍वबि हाय्‌काः स्‍यनागु खँ ल्‍वःमंके मते।” 
“आः जिं छिकपिन्‍त परमेश्वरया ल्‍हातय्‌ व वय्‌कःया दया मायां जाःगु वचनय्‌ त्‍वःताच्‍वना। वय्‌कलं हे छिकपिन्‍त विश्वासय्‌ बल्‍लाकादी, अले यक्‍व आशिष बियादी। 
“स्‍वयादिसँ, जिं सुयाकें धिबा व वसः फ्‍वनागु मदु। 
थ्‍व हे निपा ल्‍हातं ज्‍या यानाः जिं नयाच्‍वना, अले जि नाप दुपिन्‍त नं ग्‍वाहालि यानाच्‍वनागु ला छिकपिन्सं सि हे स्‍यू। 
दक्‍व खँ जिं थःम्‍हं हे याना क्‍यनागु दु। अथे हे छिकपिन्‍सं नं थःम्‍हं हे थाकुगु ज्‍या यानाः मफुपिन्‍त ग्‍वाहालि याये माः। अले प्रभु येशूं धयादीगु खँ ल्‍वःमंके मते। वय्‌कलं धयादीगु दु -- ‘कायेगु स्‍वयाः बीगु यक्‍व भिं।’” 
थुलि धयाः पावलं फुक्‍कलिसे जानाः पुलिं चुयाः प्रार्थना यात। 
अले अन च्‍वंपिं फुक्‍कं तसकं ख्‍वल। पावलयात घय्‌पुयाः इमिसं चुप्‍पा नल। 
पावलं आः हानं इमिसं वयात खनी मखुत धाःगुलिं इपिं थथे नुगः मछिंकाः ख्‍वःगु खः। इमिसं वयात लःजहाजय्‌ तक तये यन।