प्रेरित.
13.
एन्‍टिओखियाय्‌ च्‍वंगु मण्‍डलीइ अगमवक्ता व गुरूत नं दु। थुपिं बारनाबास, हाकु धाःम्‍ह शिमियोन, कुरेनीं वःम्‍ह लुकियस, दरबारय्‌ हेरोद जुजु नाप ब्‍वलंम्‍ह मनेन व शाऊल खः। 
थुपिं अपसं च्‍वनाः प्रभुया आराधना यानाच्‍वंबलय्‌ पवित्र आत्‍मां थथे धयादिल -- “बारनाबास व शाऊलयात जिं सःतागु ज्‍याय्‌ छ्व।” 
अले इमिसं अपसं च्‍वनाः प्रार्थना यानाः छेनय्‌ ल्‍हाः तयाः इमित ज्‍याय्‌ छ्वया बिल। 
थथे इपिं पवित्र आत्‍मां छ्वःगु ज्‍याय्‌ वन। इपिं सिलुकिया जुयाः साइप्रस टापुपाखे लःजहाजं वन। 
सलामिसय्‌ थ्‍यंकाः इमिसं अन यहूदीतय्‌ धर्मशास्‍त्र स्‍यनिगु छेँय्‌ वनाः वचन न्‍यंकल। इमित ग्‍वाहालि बीत मर्कूस धाःम्‍ह यूहन्‍नायात नं इपिं नाप ब्वना यंकल। 
इपिं सलामिसं पाफोस धाःगु शहरय्‌ थ्‍यंकः वन। अन इमिसं छम्‍ह फताहा अगमवक्ता बार-येशू धाःम्‍ह यहूदी झाँक्री नाप लात। 
व छम्‍ह बुद्धि दुम्‍ह सर्गियस पौलुस धाःम्‍ह तःधंम्‍ह हाकिमयागु छेँय्‌ च्‍वनिम्‍ह खः। व तःधंम्‍ह हाकिमं परमेश्वरयागु भिंगु खँ न्‍यने मास्‍ति वय्‌काः बारनाबास व शाऊलयात सःतल। 
एलुमास धाःम्‍ह बार-येशूं धाःसा तःधंम्‍ह हाकिमयात परमेश्वरयागु खँ मन्‍यंकेगु कुतः यात। 
थथे याःगुलिं शाऊलं (वयात आः पावल नं धाः) पवित्र आत्‍मां जायाः वयात मिखा हे लिमकासे स्‍वयाः धाल -- 
“छ शैतानया मचा, फुक्‍क भिंगु ज्‍याया शत्रु, लुच्‍चा, थगय्‌ जक यानाः नया जुइम्‍ह, छु छं प्रभुयागु सत्‍य खँयात स्‍यंकेत स्‍वयेगु ज्‍या त्‍वःते मखु ला? 
प्रभुं छन्‍त सजाँय बियादी धुंकल। छुं ई तक छ कां जुइ। अले छंगु मिखां निभाः जः खनी मखु।” थुलि धायेवं एलुमासं छुं हे मखना वन। अले ल्‍हाः ज्‍वना यंकिम्‍ह सुं मनू दु ला धकाः पचि पचि याः जुल। 
थ्‍व खनाः तःधंम्‍ह हाकिमं अजूचायाः परमेश्वरयागु स्‍यना खँय्‌ विश्वास यात। 
पावल व वया पासापिं पाफोसं लः जहाजय्‌ च्‍वनाः पामफिलियाय्‌ लाःगु पर्गा धाःगु शहरय्‌ थ्‍यंकः वल। यूहन्‍ना धाःसा इमित अन हे त्‍वःताः यरूशलेमय्‌ लिहां वन। 
इपिं पर्गां तुं पिसिदिया जिल्‍लाय्‌ लाःगु एन्‍टिओखियाय्‌ वन। विश्रामबार खुन्‍हु धर्मशास्‍त्र स्‍यनिगु छेँय्‌ वनाः अन न्‍यना च्‍वंपिं लिसे फ्‍यतूवन। 
व्‍यवस्‍थायागु सफू व अगमवक्तातय्‌गु सफू ब्‍वने धुंकाः थकालिपिन्‍सं इमित सःताः थथे धाल -- “किजापिं, थ्‍व मनूतय्‌त छुं भिंगु खँ न्‍यंके मास्‍ति वःसा, धयादिसँ।” 
अले पावलं दनाः ल्‍हाः भाय्‌ यानाः थथे धाल -- “इस्राएली दाजुकिजापिं व परमेश्वरयात मानय्‌ याइपिं, जिगु खँ न्‍यनादिसँ। 
“इस्राएलीतय्‌ परमेश्वरं झी तापाःबाज्‍यापिन्‍त ल्‍ययादिल, अले मिश्र देशय्‌ च्‍वना च्‍वंबलय्‌ इमित तःधंकादिल। अले थःगु शक्ति क्‍यनाः इमित अनं पित ब्‍वना हयादिल। 
पीदँ तक मरुभूमिइ च्‍वंबलय्‌ इमिगु मभिंगु ज्‍याखँयात सह यानादिल। 
लिपा परमेश्वरं हे कनानय्‌ च्‍वंपिं न्‍हय्‌गू जातियात नाश यानाः इमिगु देश थुमित लः ल्‍हानादिल। 
थथे जुइत प्‍यसः व न्‍ययदँ (४५०) बित। “अनं लिपा इमित राज्‍य याकेत परमेश्वरं न्‍यायाधीशत छ्वया हयादिल। थुमिसं शमूएल धाःम्‍ह अगमवक्तायागु पालय्‌ तक ज्‍या यात। 
अले इमिसं छम्‍ह जुजु फ्‍वन। अले परमेश्वरं पीदँ तक बेन्‍यामीन कुलयाम्‍ह कीशया काय्‌ शाऊल धाःम्‍हय्‌सित जुजु दय्‌कादिल। 
लिपा थ्‍व जुजुयात लिकयाः परमेश्वरं दाऊद धाःम्‍हय्‌सित ल्‍ययादिल। थ्‍व हे दाऊदयात वय्‌कलं थथे धयादिल -- ‘जिं जिगु मन नाप मिलय्‌ जूम्‍ह यिसैया काय्‌ दाऊदयात लुइके धुन। थ्‍वं हे जिं धयागु फुक्‍क याइ।’ 
“थ्‍व हे मनूया कुलं परमेश्वरं इस्राएलयात मुक्ति बीम्‍ह येशूयात छ्वया हयादिल। थथे छ्वया हये धकाः वय्‌कलं न्‍हापा हे बचं बियादीगु खः। 
येशू झाये न्‍ह्यः बप्‍तिस्‍मा बीम्‍ह यूहन्‍नां वयाः फुक्‍क इस्राएलीतय्‌त पापं लिच्‍यु अले बप्‍तिस्‍मा का धकाः न्‍यंकाः जुल। 
यूहन्‍नां थःगु ज्‍या सिधय्‌काः थथे धाःगु खः -- ‘छिमिसं जि सु धकाः ताय्‌का च्‍वना? जि व हे मखु। जि लिपा छम्‍ह झायाच्‍वंगु दु। जि ला वय्‌कःयागु लाकां पुतु फ्‍यनेत नं मल्‍वः।’” 
“दाजुकिजापिं, अब्राहामया सन्‍तान जूसां वा परमेश्वरयात मानय्‌ याइपिं यहूदीमखुपिं जूसां थ्‍व मुक्तियागु खँ परमेश्वरं झी फुक्‍कसितं छ्वया हयादीगु खः। 
यरूशलेमय्‌ च्‍वंपिन्‍सं व इमि शासकतय्‌सं वय्‌कःयात म्‍हसीके मफुत। विश्रामबार पतिकं ब्‍वना वयाच्‍वंगु अगमवक्तातय्‌गु सफुलिइ च्‍वयातःगु खँ न्‍यंसां नं इमिसं थुइके मफुत। अय्‌जूगुलिं इमिसं वय्‌कःयात स्‍यानाः अगमवक्तातय्‌सं धाःगु खँ पूवंकल। 
वय्‌कःयाके स्‍याना छ्वये माःगु छुं हे दोष लुइके मफुसां इमिसं पिलातसयाके ‘वयात स्‍याना छ्व’ धकाः फ्‍वन। 
“थथे च्‍वया तःथें वय्‌कःयात जूवये माःगु फुक्‍क जुइ धुंकाः इमिसं वय्‌कःयात क्रूसं क्‍वकयाः चिहानय्‌ तया बिल। 
तर परमेश्वरं वय्‌कःयात सीम्‍हं म्‍वाकादिल। 
अले तःन्‍हु तक थःपिं नाप गालीलंनिसें यरूशलेमय्‌ थ्‍यंक वःपिन्‍थाय्‌ खने दय्‌कः झाल। थुपिं आः तक थ्‍व खँया साक्षी दनि। 
“आः जिमिसं परमेश्वरं झी तापाःबाज्‍यापिन्‍त बी धकाः धयादीगु थ्‍व हे भिंगु खँ छिमित कं वयाच्‍वना। 
थ्‍व हे खँ वय्‌कलं सीम्‍ह येशूयात म्‍वाकाः आः झी इमि सन्‍तानयागु निंतिं पूवंकादिल। निगूगु भजनय्‌ येशूया खँय्‌ थथे च्‍वयातःगु दु -- ‘छ जिमि काय्‌ खः। थनिंनिसें जि छं बाः जुल।’ 
परमेश्वरं वय्‌कःयात गुबलें सी म्‍वाय्‌क म्‍वाकादीगु खँय्‌ थथे धयादिल -- ‘जिं दाऊदयात बी धकाः धयागु पवित्र आशिष छिमित बी।’ 
मेगु भजनय्‌ नं दाऊदं थथे धयातःगु दु -- ‘अले छिं थःम्‍ह पवित्रम्‍ह मनूयात ध्‍व‍गिकेबी मखु।’ 
थ्‍व खँ दाऊदं थःगु बारे च्‍वयातःगु मखु, छाय्‌धाःसा परमेश्वरया इच्‍छाकथं सेवा यानाः सी धुंकाः वयात वया तापाःबाज्‍यापिं नापं थुना बिल। अले वयागु सीम्‍ह ध्‍वगिना वन। 
अय्‌नं गुम्‍हय्‌सित थ्‍व खँ धाःगु खः व ला ध्‍वगिना मवं, बरु परमेश्वरं वय्‌कःयात सीम्‍हं हानं म्‍वाकादिल। 
“अय्‌जूगुलिं दाजुकिजापिं, छिकपिन्‍सं थ्‍व खँ थुइकादिसँ। थ्‍व हे मनूयागु नामं छिमिगु पाप क्षमा जुइ धकाः जिमिसं धयाच्‍वनागु खः। 
वय्‌कःयात विश्वास याःपिनिगु न्‍ह्याथेंज्‍याःगु पाप नं क्षमा याना बी। थ्‍व ज्‍या मोशां ब्‍यूगु व्‍यवस्‍थां याये मफुत। 
उकिं होश यानादिसँ। अगमवक्तातय्‌सं च्‍वयातःगु थ्‍व खँ छिकपिन्‍त लाः मवयेमा -- 
‘अय्‌ मूर्खत, हेबाय्‌चबाय्‌ जक याना जुइपिं, थुइके मफयाः छिपिं अथें सिना वनी। छिपिं दुबलय्‌ हे जिं छगू थज्‍याःगु ज्‍या याये। जिं यानागु थ्‍व ज्‍या छिमित सुनानं कन धाःसां छिमिसं गुबलें नं पत्‍याः याइ मखु।’” 
पावल व बारनाबास धर्मशास्‍त्र स्‍यनिगु छेँनं पिहां वयाच्‍वंबलय्‌ मनूतय्‌सं वइगु विश्रामबार खुन्‍हु नं कं झासँ धकाः बिन्‍ति यात। 
सभा क्‍वचाय्‌ धुंकाः यक्‍व हे यहूदीत व यहूदी जूपिं मनूत इपिं नाप वन। पावल व बारनाबासं परमेश्वरं धयादी थें याना च्‍वँ धकाः इमित बःबियाः धाल। 
मेगु विश्रामबार खुन्‍हु परमेश्वरयागु वचन न्‍यनेत शहरय्‌ च्‍वंपिं अप्‍वः थें मनूत वल। 
थथे यक्‍व मनूत न्‍यं वःगु खनाः यहूदीतय्‌ नायःतय्‌गु नुगः मुल। अले इमिसं पावलं धाःगु खँ ख हे मखु धकाः हेस्‍यानाः वयात मभिंकाः खँ ल्‍हात। 
अय्‌नं पावल व बारनाबासं मग्‍यासे थथे धाल -- “परमेश्वरयागु भिंगु खँ छिकपिन्‍त निं न्‍हापा लाक्‍क न्‍यंके माःगु खः। छिकपिन्‍सं हे न्‍यने मयः धाल धाःसा, अले थःपिन्‍त अनन्‍त जीवन कायेत मल्‍वःपिं ताय्‌कल धाःसा आः जिपिं यहूदीमखुपिन्‍थाय्‌ वनाः कं वने। 
छाय्‌धाःसा थथे या धकाः प्रभुं हे जिमित धयादीगु दु -- ‘जिं छिमित यहूदीमखुपिन्‍थाय्‌ जः ह्वलेत, अले संसारयात मुक्तियागु लँ क्‍यनेत छ्वयाच्‍वना।’” 
थ्‍व न्‍यनाः यहूदीमखुपिं तसकं लय्‌लय्‌ ताल। इमिसं परमेश्वरयागु वचनयात तःधंकल। अले अनन्‍त जीवन बीत ल्‍यया तःपिं मनूतय्‌सं विश्वास यात। 
थथे प्रभुयागु वचन उगु इलाकाय्‌ फुक्‍क थासय्‌ न्‍यना वन। 
अय्‌नं यहूदीतय्‌सं नां जाःपिं धर्मीपिं मिसातय्‌त व शहरय्‌ च्‍वंपिं नायःतय्‌त ग्‍वाकाः पावल व बारनाबासयात ख्‍यानाः इमिगु इलाकां पितिना छ्वल। 
अले इपिं थःगु लाकामय्‌ च्‍वंगु धू था था यानाः आइकोनियनय्‌ वन। 
एन्‍टिओखियाय्‌ च्‍वंपिं चेलात पवित्र आत्‍मां जायाः लय्‌तायाच्‍वन।