प्रेरित.
11.
यहूदीमखुपिन्‍सं नं परमेश्वरयागु वचन न्‍यनाः विश्वास यात धकाः यहूदियाय्‌ च्‍वंपिं प्रेरितत व मेपिं विश्वासीतय्‌सं सीकल। 
पत्रुस यरूशलेमय्‌ लिहां वंबलय्‌ इमिसं वयात थथे धकाः ब्‍वःबिल -- 
“यहूदीमखुपिन्‍थाय्‌ वनाः छं नयेत्‍वने याना वयागु ला?” 
अले वं छगू छगू दतले जूगु खँ फुक्‍कं इमित थुकथं कन -- 
“योप्‍पाय्‌ छन्‍हु प्रार्थना याना च्‍वनाबलय्‌ जिं दर्शन खना। व दर्शनय्‌ जिं छकू देलासा थेंज्‍याःगु प्‍यखें कुन्‍चाय्‌ ज्‍वनाः स्‍वर्गं जिथाय्‌ कुतुं वयाच्‍वंगु खना। 
जिं क्‍वथीक स्‍वयाबलय्‌ उकी पशु, पंक्षि, घिस्रय्‌ जुया जुइपिं जन्‍तुत खना। 
अले जिं थथे धया हःगु सः ताया -- ‘दँ पत्रुस, थुमित स्‍यानाः न।’ 
“जिं लिसः बिया -- ‘मखु प्रभु, थौं तक जिं शुद्ध मजूगु व थीमज्‍यूगु मनयानि।’ 
“स्‍वर्गं हानं जितः थथे धया हल -- ‘परमेश्वरं शुद्ध याःगुयात छं शुद्ध मजू धकाः धाये मते।’ 
थथे स्‍वकः तक जुइ धुंकाः व फुक्‍कं स्‍वर्गय्‌ तुं थत यंकल। 
“अबलय्‌ हे कैसरियां जितः सःतःवःपिं स्‍वम्‍ह मनूत जि च्‍वनाच्‍वनागु छेँय्‌ थ्‍यंकः वल। 
पवित्र आत्‍मां जितः म्‍हां मधासे इपिं नाप सुमुक हुँ धकाः धयादिल। अले योप्‍पाय्‌ च्‍वंपिं खुम्‍ह विश्वासीत नाप जि कर्नेलियसयाथाय्‌ वना। 
छम्‍ह स्‍वर्गदूतं छेँय्‌ वयाः वयात थथे धाःगु खँ वं जिमित कन -- ‘योप्‍पाय्‌ मनूत छ्वयाः सिमोन धाःम्‍ह पत्रुसयात सःतके छ्व। 
थ्‍व हे मनुखं छंगु व छिमि फुक्‍क जहानपिनिगु पाप क्षमा जुइगु खँ कनी।’ 
“जि इपिं लिसे नवाना च्‍वनाबलय्‌ झीत थें इमित नं पवित्र आत्‍मां जाय्‌कादिल। 
थथे जुसेंलि प्रभुं धयादीगु खँ जितः लुमंसे वल -- ‘यूहन्‍नां ला लखं बप्‍तिस्‍मा बियाच्‍वन, अय्‌नं छिमित पवित्र आत्‍मां बप्‍तिस्‍मा बी।’ 
परमेश्वरं थथे येशू ख्रीष्‍टयात विश्वास यानाः झीत पवित्र आत्‍मा बियादी थें इमित नं पवित्र आत्‍मा बियादिल धाःसा जि सु खः धकाः परमेश्वरं बीत्‍यंगु पनेत, जिं परमेश्वरयात पने फु ला?” 
इमिसं फुक्‍क खँ न्‍यने धुंकाः पत्रुसयात ब्‍वःबीगु त्‍वःताः थथे धकाः परमेश्वरयात तःधंकल -- “अय्‌सा परमेश्वरं यहूदीमखुपिन्‍त नं पश्‍चाताप याकाः म्‍वाकादिल खनि।” 
स्‍तिफनसयात स्‍याये धुंकाः सास्‍ति फये मफयाः विश्वासीतय्‌सं फोनिके, साइप्रस व एन्‍टिओखियाय्‌ बिस्‍युं वनाः अन इमिसं यहूदीतय्‌त जक भिंगु खँ न्‍यंका जुल। 
अय्‌नं साइप्रसय्‌ व कुरेनीइ च्‍वंपिं विश्वासीत गुलिसिनं धाःसा एन्‍टिओखियाय्‌ वयाः यहूदीमखुपिन्‍त नं प्रभु येशूयागु खँ न्‍यंकल। 
प्रभु इपिं लिसे दीगुलिं यक्‍व मनूतय्‌सं प्रभुयात विश्वास यात। 
थथे अन नं विश्वासीत दत धयागु खँ यरूशलेमया मण्‍डलीयापिन्‍सं सियाः बारनाबासयात एन्‍टिओखियाय्‌ छ्वया हल। 
थथे व अन वयाः परमेश्वरं अन च्‍वंपिं विश्वासीतय्‌त बियादीगु आशिष खनाः तसकं लय्‌ताल। अले वं इमित मग्‍यासे दुनुगलंनिसें प्रभु नाप जुया च्‍वने माः धकाः स्‍यनेकने यात। 
थ्‍व बारनाबास धाःम्‍ह तसकं भिंम्‍ह तःधंगु विश्वास दुम्‍ह व पवित्र आत्‍मां जाःम्‍ह मनू खः। वं यानाः तःम्‍हय्‌सिनं हे प्रभुयात विश्वास यात। 
अले व टार्ससय्‌ शाऊलयात माः वन। 
लुइके धुंकाः वयात एन्‍टिओखियाय्‌ ब्‍वना हल। इपिं अन दच्‍छि तक च्‍वनाः मण्‍डलीइ च्‍वंपिं यक्‍वसित हे स्‍यनेकने यात। एन्‍टिओखियाय्‌ हे दकलय्‌ न्‍हापां विश्वासीतय्‌त ख्रीष्‍टियन धायेगु यात। 
छन्‍हु यरूशलेमं सुं अगमवक्तात एन्‍टिओखियाय्‌ वल। 
इपिं मध्‍ये अगाबस धाःम्‍हय्‌सिनं संसारय्‌ न्‍यंक हे अनिकाल जुइतिनि धकाः आत्‍मायागु शक्तिं अगमवाणी कन। थ्‍व अनिकाल कैसर क्‍लौडियसया पालय्‌ जुल। 
अथेजूगुलिं अन च्‍वंपिं चेलातय्‌सं फक्‍व धिबा ल्‍हानाः यहूदियाय्‌ च्‍वंपिं विश्वासीतय्‌त ग्‍वाहालि यायेगु क्‍वःछित। 
मुंगु भेटी शाऊल व बारनाबासयागु ल्‍हातं यरूशलेमया मण्‍डलीया थकालिपिन्‍त बीके छ्वल।