प्रेरित.
1.
हनेमाःम्‍ह थियोफिलस, जिगु न्‍हापांयागु सफुलिइ येशू ख्रीष्‍टं यानादीगु व स्‍यनादीगु फुक्‍क खं निसें कयाः 
वय्‌कलं ल्‍ययादीपिं प्रेरिततय्‌त पवित्र आत्‍मां आज्ञा बियादी धुंकाः स्‍वर्गय्‌ झायादीगु खँ तक च्‍वयागु दु। 
दुखः सीधुंकाः वय्‌कलं पीन्‍हु तक धूवांधू इमिथाय्‌ झायाः इमित परमेश्वरया राज्‍ययागु खँ कँकं वय्‌कः हानं म्‍वाना वःगु खः धयागु यक्‍व ग्‍यसुलाःगु दसि क्‍यनादिल। 
छन्‍हु इपिं नाप नयेत फ्‍यतुनादीबलय्‌ वय्‌कलं थथे धयादिल -- “यरूशलेमं गनं मवँसे बाःनं बियादी तिनि धकाः जिं धयागु वरदान कायेत पिया च्‍वँ। 
यूहन्‍नां ला लखं बप्‍तिस्‍मा बिल, आः याकनं हे पवित्र आत्‍मापाखें छिमिगु बप्‍तिस्‍मा जुइतिनि।” 
अय्‌जूगुलिं इमिसं हानं मुंबलय्‌ येशूयात थथे न्‍ह्यसः यात -- “प्रभु, छिं आः हे इस्राएलीतय्‌त राज्‍य लित बियादीत्‍यना ला?” 
अले वय्‌कलं धयादिल -- “बाःनं यानादीगु ज्‍या छिमिसं छु इलय्‌, गुबलय्‌ जुइ धकाः न्‍यना च्‍वने माःगु मदु। 
पवित्र आत्‍मां छिपिं जायेवं छिमिके शक्ति दइ। अले छिपिं यरूशलेमय्‌, यहूदियाय्‌ व सामरियांनिसें सारा संसार न्‍यंक जिगु साक्षी जुइ।” 
थुलि धयादी धुंकाः इमिसं स्‍वया च्‍वँच्‍वं हे वय्‌कःयात थत यंकाः सुपाँचं त्‍वपुया बिल। 
वय्‌कः थहां झायाच्‍वंगु मिखा हे लिमकासे आकाशय्‌ स्‍वया च्‍वंबलय्‌ तुयुगु वसः पुना तःपिं निम्‍ह मनूतय्‌सं इमिथाय्‌ लिक्‍क दं वयाः 
थथे धाल -- “गालीलय्‌ च्‍वंपिं मनूत, छाय्‌ वातां दनाः आकाशय्‌ स्‍वयाच्‍वनागु? येशू स्‍वर्गय्‌ झायादीगु छिमिसं खंथें तुं वय्‌कः हानं अथे हे थन लिहां झायादी तिनि।” 
अले इपिं जैतून डाँडां यरूशलेमय्‌ तुं लिहां वल। जैतून डाँडां यरूशलेम छगू किलोमिटर ति तापाः। 
शहरय्‌ वयेवं इपिं छखा छेँय्‌ दुहां वनाः तले च्‍वंगु क्‍वथाय्‌ वन। अन पत्रुस, यूहन्‍ना, याकूब, अन्‍द्रियास, फिलिप, थोमा, बारथोलोमाइ, मत्ती, अल्‍फयसया काय्‌ याकूब, क्रान्‍तिइ सने धुंकूम्‍ह सिमोन व याकूबया काय्‌ यहूदापिं च्‍वनिगु खः। 
इपिं फुक्‍कं छगू हे मनयापिं जुयाः मेमेपिं मिसात, येशूया मां मरियम व वय्‌कःया किजापिं नाप प्रार्थना यानाच्‍वनिगु खः। 
लिपा अन सछि व नीम्‍ह चेलात मुना च्‍वंथाय्‌ पत्रुसं दनाः थथे नवात -- 
“दाजुकिजापिं, येशूयात ज्‍वंकूम्‍ह यहूदाया खँय्‌ न्‍हापां हे दाऊदया म्‍हुतुं पवित्र आत्‍मां नवाःगु खँ धर्मशास्‍त्रय्‌ च्‍वयातःगु खः। थथे जुइ हे माःगु खः, अले जु नं जुल। 
व नं झीपिं थें खः, अले वं नं झीसं थें हे ज्‍या यानाच्‍वंगु खः।” 
यहूदां मभिंगु ज्‍या याना वःगु धिबां छकू जग न्‍यात। अले व हे जगय्‌ कुतुं वनाः आतापति फुक्‍कं पिहां वयाः सित। 
थ्‍व खँ यरूशलेमय्‌ च्‍वंपिं फुक्‍क मनूतय्‌सं सिल। अले व जगयात इमिगु थःगु भासं ‘हकल्‍दामा’, अथबाः ‘हियागु जग’ धकाः नां तल। 
“थ्‍व खँ भजनया सफुलिइ थथे च्‍वयातःगु दु -- ‘वयागु छेँ खालि जुइमा, अले अन सुं हे मच्‍वनेमा।’ ‘वयागु थाय्‌ नं मेम्‍हय्‌सिनं कायेमा।’ 
“अय्‌जूगुलिं प्रभु येशू झी नाप दीबलय्‌ निसें न्‍ह्याबलें झी नाप दुम्‍ह छम्‍ह मनूयात ल्‍यये माल। 
थ्‍व मनू यूहन्‍नां बप्‍तिस्‍मा ब्‍यूबलय्‌ निसें येशू स्‍वर्गय्‌ झायादीबलय्‌ तकं झी नाप दुम्‍ह जुइ माः। वं झीसं थें येशू सिनाः म्‍वाना वःगु खँय्‌ साक्षी बी माः।” 
अले इमिसं निम्‍ह मनू बारसाबास धाःम्‍ह योसेफ, (वयागु मेगु नां युस्‍तस खः) व मतियासयात न्‍ह्यथन। 
अले इमिसं थथे प्रार्थना यात -- “मनूतय्‌गु नुगलय्‌ दुने च्‍वंगु खँ स्‍यूम्‍ह प्रभु, थुपिं निम्‍हय्‌ गुम्‍हय्‌सित छिं ल्‍ययादिया, जिमित क्‍यनादिसँ। 
यहूदा थ्‍व ज्‍या त्‍वःताः गन वने माःगु खः अन वने धुंकूगुलिं वया थासय्‌ ज्‍याय्‌ तयेत व प्रेरित यायेत गुम्‍ह मनू ज्‍यू, धयादिसँ?” 
अले इमिसं चिट्ठा तल, चिट्ठा मतियासयात लात। थथे मतियास नापं यानाः आः झिंनिम्‍ह प्रेरित खात।