लूका.
2.
अबलय्‌ लाक्‍क रोमी महाराजा कैसर अगस्‍टसं संसारय्‌ न्‍यंक जनगणना का धकाः उजं बिल। 
सिरियाय्‌ कुरेनियस धाःम्‍ह बडा हाकिम जुया च्‍वंबलय्‌ न्‍हापां जनगणना काःगु थ्‍व हे खः। 
अय्‌जूगुलिं फुक्‍क मनूत इमि थः थःगु गामय्‌ व शहरय्‌ वनाः नां च्‍वकः वन। 
योसेफ जुजु दाऊदया सन्‍तान जूगुलिं नासरत शहरं जुजु दाऊद बूगु बेथलेहेम गामय्‌ वन। 
वं थःलिसे ब्‍याहा यायेत क्‍वःछिना तये धुंकूम्‍ह मरियमयात नं ब्‍वना यंकल। वया प्‍वाथय्‌ दु। 
इपिं अन दुबलय्‌ हे वयात मचा बुइगु ब्‍यथा जुल। 
वं दकलय्‌ न्‍हापांम्‍ह काय्‌ बुइकल। च्‍वनेत गनं हे थाय्‌ मदुगुलिं इमिसं मचायात इचां भुनाः फैतय्‌त नकिगु थलय्‌ थ्‍यनातल। 
चान्‍हय्‌ अनं लिक्‍क लाःगु ख्‍यलय्‌ फैजवाःत फैचात पिवाः च्‍वनाच्‍वन। 
अबलय्‌ हे प्रभुया छम्‍ह दूत इमिथाय्‌ खने दय्‌कः वल। प्रभुयागु जः अन छचाःखेलं न्‍यन। इपिं फुक्‍कं ग्‍यानाः थरथर खात। 
अले स्‍वर्गदूतं इमित धाल -- “ग्‍याये म्‍वाः। जिगु खँ न्‍यँ, जि छिमित लसतायागु छगू तःधंगु भिंगु खँ कं वयागु खः। थ्‍व भिंगु खँ फुक्‍क मनूतय्‌त खः। 
जुजु दाऊद बूगु गामय्‌ छिमि छम्‍ह मुक्तिदाता नकतिनि हे बूगु दु। वय्‌कः हे ख्रीष्‍ट प्रभु खः। 
मचायात म्‍हसीकेगु चिं थ्‍व खः -- वय्‌कःयात इचां भुनाः फैतय्‌त नकिगु थलय्‌ थ्‍यना तःगु दु।” 
अबलय्‌ लाक्‍क हे छक्‍कलं मेपिं स्‍वर्गदूततय्‌गु छपुचः खने दत। इपिं फुक्‍कसिनं थथे धकाः म्‍ये हालाः परमेश्वरयागु जय जय यात -- 
“स्‍वर्गय्‌ च्‍वनादीम्‍ह परमेश्वर तःधं जुइमा। अले परमेश्वरयात यःपिं मनूतय्‌त पृथ्‍वीइ च्‍वनाच्‍वंसां शान्‍ति दयेमा।” 
स्‍वर्गदूतत अनं स्‍वर्गय्‌ वने धुंकाः फैजवाःतय्‌सं थथे खँ ल्‍हात -- “नु, झी बेथलेहेमय्‌ वनाः प्रभुं धयादीगु खँ स्‍वये।” 
अले इपिं हथाय्‌ पथासं वन। अन इमिसं मरियम, योसेफ व फैतय्‌त नकिगु थलय्‌ थ्‍यना तःम्‍ह मचायात खन। 
थ्‍व खनाः इमिसं स्‍वर्गदूतं कंगु खँ मचाया मांबौयात कन। 
फैजवाःतय्‌गु खँ न्‍यनाः फुक्‍कं अजूचाल। 
मरियमं धाःसा थ्‍व खँ मनं मनं बिचाः यानाः नुगलय्‌सं तया तल। 
स्‍वर्गदूततय्‌सं धाःथें स्‍वये व न्‍यने दुगुलिं फैजवाःत परमेश्वरयात जय जय यानाः लय्‌ तातां लिहां वन। 
बूगु च्‍यान्‍हु दय्‌काः मचायागु म्‍हय्‌ चिं तय्‌कल। अले वय्‌कःयागु नां येशू तल। थ्‍व नां प्‍वाथय्‌ दये न्‍ह्यः हे स्‍वर्गदूतं तःगु खः। 
मोशां च्‍वया तःथें बूगु पीन्‍हु दय्‌काः मचा बू ब्‍यंके त्‍यःबलय्‌ इमिसं वय्‌कःयात छायेत यरूशलेमयागु देगलय्‌ यंकल। 
दकलय्‌ न्‍हापालाक बूम्‍ह काय्‌मचा परमप्रभुया निंतिं पवित्र जुइ धकाः व्‍यवस्‍थाय्‌ च्‍वया तःगु दु। 
मचा बू ब्‍यंकीबलय्‌ छज्‍वः सुकुभत्तु जूसां निम्‍ह मचापिं बखुंचात जूसां बलि बियाः परमप्रभुयात छाये माः धकाः परमप्रभुयागु सफुलिइ च्‍वया तःथें इमिसं नं छाये यन। 
अबलय्‌ यरूशलेमय्‌ शिमियोन धाःम्‍ह छम्‍ह मनू दु। थ्‍व मनू तसकं धर्मीम्‍ह व परमेश्वरया भक्त खः। व इस्राएलीतय्‌गु उद्धार जुइगु दिन स्‍वयेत पिया च्‍वंम्‍ह खः। पवित्र आत्‍मा वयाके च्‍वनादीगु दु। 
अय्‌जूगुलिं परमेश्वरं बी धकाः धया तःम्‍ह मुक्ति बीम्‍ह ख्रीष्‍ट झाया मदितले छ सी मखुनि धकाः पवित्र आत्‍मां वयात धया तःगु दु। 
पवित्र आत्‍मां वयात देगलय्‌ यन। अबलय्‌ हे मचा येशूयात वया मांबौपिन्‍सं व्‍यवस्‍थाय्‌ च्‍वया तःथें यायेत देगलय्‌ हल। 
शिमियोनं मचायात बुयाः परमेश्वरयात सुभाय्‌ बियाः थथे धाल -- 
“परमप्रभु, छिं धयादीगु थ्‍व हे खँ थौं जिगु मिखां स्‍वये दत। आः जि याउँक सिना वंसां जिल। 
जिं थःगु हे मिखां थौं छिं संसारय्‌ च्‍वंपिन्‍त बियादीम्‍ह मुक्तिदातायात खने धुन। 
छिं फुक्‍क मनूतय्‌गु निंतिं थथे यानादीगु खः। 
यहूदीमखुपिन्‍त नं लँ क्‍यनिम्‍ह वय्‌कः मुक्तिदाता व जः खः। उकिं वय्‌कः मुक्तिदाता झायादीगुलिं मनूतय्‌सं झी इस्राएलीतय्‌त तःधंकी।” 
शिमियोनं थुकथं मचायागु खँ धाःगुलिं मचाया मांबौ छक्‍क जुल। 
अले शिमियोनं इमित आशिष बियाः मचाया मांयात थथे धाल -- “इस्राएलय्‌ च्‍वंपिं यक्‍व मनूतय्‌त भिंकेत नं स्‍यंकेत नं परमेश्वरं ल्‍ययादीम्‍ह मचा थ्‍व हे खः। थ्‍व मचा परमेश्वरयागु चिं जूगुलिं यक्‍वसिनं थ्‍वयागु विरोध याइ। 
थुकिं यक्‍व मनूतय्‌गु नुगःया बिचाः पिहां वइ। अले च्‍वामुगु तरवारं थें दुःखं छंगु नुगलय्‌ झ्‍वाबी।” 
अबलय्‌ अन हन्‍ना धाःम्‍ह अगमवादिनी मिसा छम्‍ह दु। व आशेर कुलयाम्‍ह फनुएल धाःम्‍ह मनूया म्‍ह्याय्‌ खः। ब्‍याहा यानाः वया भाःतनाप न्‍हय्‌दँ तक जक ह्वने खन। आः ला व बुह्रि जुइ धुंकल। 
व चय्‌प्‍यदँ दुबलय्‌ तक भाःत मदय्‌कः हे च्‍वन। वं यक्‍व हे अपसं च्‍वनाः प्रार्थना यानाः परमेश्वरया सेवा यानाच्‍वंगु दु। 
मचा येशू देगलय्‌ दनिबलय्‌ हे हन्‍नां नाप लाः वयाः परमेश्वरयात सुभाय्‌ बिल। अले यरूशलेमय्‌ च्‍वंपिनिगु उद्धार जुइतिनि धकाः पिया च्‍वंपिन्‍त व मचायागु खँ कन। 
व्‍यवस्‍थाय्‌ च्‍वया तःथें फुक्‍कं याये सिधय्‌काः योसेफ व मरियम गालीलय्‌ लाःगु थःगु हे गां नासरतय्‌ लिहां वल। 
मचा तःधिकः जुया वल। बुद्धिं नं जाया वल, अले परमेश्वरं नं वय्‌कःयात आशिष बियादीगु दु। 
येशूया मांबौ दँय्‌दसं यरूशलेमय्‌ छुत्‍काराया नखः हनेत वं। 
वय्‌कः झिंनिदँ दुबलय्‌ नं इपिं नखः मानय्‌ यायेत यरूशलेमय्‌ वन। 
नखः सिधय्‌काः इपिं छेँ लिहां वन। मचाम्‍ह येशू जक यरूशलेमय्‌ तुं च्‍वन। वय्‌कःया मांबौपिन्‍सं थ्‍व खँ मस्‍यू। 
वय्‌कः पासापिंनाप वयाच्‍वंगु दइ धकाः इपिं न्‍हिच्‍छि वनाच्‍वन। बहनी थःथितिपिं व पासापिनिगु पुचलय्‌ वय्‌कःयात माला स्‍वत। 
वय्‌कःयात लुइके मफुगुलिं इपिं हानं यरूशलेमय्‌ तुं माः वन। 
स्‍वन्‍हु दय्‌काः इमिसं वय्‌कःयात देगलय्‌ गुरूपिंनापं फ्‍यतुनाः इमिगु खँ न्‍यँन्‍यं, न्‍ह्यसः यानाच्‍वंगु खन। 
अन च्‍वंपिं फुक्‍क वय्‌कःयागु बुद्धि व लिसः न्‍यनाः छक्‍क जुयाच्‍वन। 
थुकथं वय्‌कःयात अन खनाः मांबौपिं निम्‍हं छक्‍क जुल। अले मांम्‍हं थथे धाल -- “पुता, छं छाय्‌ थथे यानागु? छं बाः व जिं छन्‍त गुलि माले धुन। जिमि ला म्‍हय्‌ जिउ हे मन्‍त का।” 
अले वय्‌कलं धयादिल -- “छिकपिन्‍सं जितः माला मदीसां ज्‍यूगु खःनि। जि जिम्‍ह बाःयागु छेँय्‌ च्‍वने माः धकाः छिकपिन्‍सं मस्‍यू ला?” 
वय्‌कलं धयादीगु खँ इमिसं मथुल। 
अथेसां वय्‌कः इपिं नाप तुं नासरतय्‌ लिहां झाल। अन वय्‌कः मांबौनं धाःथें च्‍वनादिल। वय्‌कःया मामं थ्‍व खँ मनय्‌सं तया तल। 
वय्‌कः मनूतय्‌गु व परमेश्वरयागु दया मायां झन झन तःधिकः जुयाः बुद्धिं जायावल।