मत्ती.
11.
झिंनिम्‍ह चेलातय्‌त थुलि धाये धुंकाः येशू अनं गां गामय्‌ स्‍यनेकने यायेत व भिंगु खँ न्‍यंकेत झाल। 
झ्‍यालखानाय्‌ कुना तःम्‍ह यूहन्‍नां मुक्ति बीम्‍ह ख्रीष्‍टं यानादीगु ज्‍याखँ न्‍यनाः थः चेलातय्‌त वय्‌कःयाथाय्‌ थथे धकाः न्‍यंके छ्वयाहल। 
“झायादीमाःम्‍ह छि हे खः ला कि जिमिसं मेम्‍हय्‌सिगु लँ स्‍वयाच्‍वने माः नि?” 
वय्‌कलं इमित लिसः बियादिल -- “छिमिसं छु छु खना अले न्‍यना यूहन्‍नायात वनाः व हे धयाब्‍यु। 
कांपिन्‍सं मिखां खन, लंग्रात न्‍यासि वने फत, कोह्रित लाया वन, ख्‍वाँय्‌तय्‌सं ताल, सीपिं मनूत हानं म्‍वाना वल, अले चीमिपिन्‍सं भिंगु खँ न्‍यन। 
जिगु विश्वासय्‌ सुनां संखा याइ मखु, व धन्‍यम्‍ह खः।” 
यूहन्‍नाया चेलात लिहां वने धुंकाः वय्‌कलं यूहन्‍नायागु खँय्‌ थथे धयादिल -- “मरुभूमिइ वनाः छिमिसं छु स्‍वया? फसं संकाच्‍वंगु तिं कथि स्‍वः वनागु ला? 
मखुसा छिपिं छु स्‍वयेत वनागु लय्‌? बाबांलाःगु वसतं पुना तःपिं मनूतय्‌त स्‍वः वनागु ला? बाबांलाःगु वसतं पुना तइपिं ला लाय्‌कुलिइ जक दइ। 
धात्‍थें छिपिं छु स्‍वः वनापिं? अगमवक्तायात स्‍वः वनागु ला? खः, जिं धाये -- यूहन्‍ना अगमवक्ता स्‍वयाः यक्‍व तःधं। 
थ्‍वयागु खँ धर्मशास्‍त्रय्‌ थथे च्‍वयातःगु दु -- ‘जिं जिम्‍ह दूतयात छंगु न्‍ह्यः हे छ्वया बी। वं हे छंगु निंतिं लँ दय्‌का बी।’” 
“जिं छिमित खःगु खँ धाये -- बप्‍तिस्‍मा बीम्‍ह यूहन्‍ना स्‍वयाः तःधंम्‍ह मनू मेम्‍ह मदु। अथेसां स्‍वर्गयागु राज्‍यय्‌ दक्‍वसिबय्‌ चिधंम्‍ह मनू नं व स्‍वयाः तःधं जुइ। 
बप्‍तिस्‍मा बीम्‍ह यूहन्‍नां भिंगु खँ न्‍यंकूसांनिसें स्‍वर्गयागु राज्‍यय्‌ दुहां वनेत मनूतय्‌सं धित्तुधिनाः जुल। थुकथं इमि दथुइ धेंधेंबल्‍लाः जुल। 
थ्‍व हे यूहन्‍नाया न्‍ह्यः वःपिं फुक्‍क अगमवक्तातय्‌सं व व्‍यवस्‍थां नं स्‍वर्गयागु राज्‍ययागु खँ धया वंगु खः। 
छिमिसं थ्‍व खँ विश्वास याना काःसा वइतिनि धाःम्‍ह एलिया यूहन्‍ना हे खः। 
सुयाके न्‍हाय्‌पं दु वं न्‍यना का।” 
“थौंकन्‍हय्‌यापिं मनूतय्‌त छु नाप दाँजय्‌ यायेगु? थुपिं ला बजारय्‌ च्‍वनाः पासापिन्‍त सःताः थथे खँ ल्‍हाइपिं मस्‍त थें च्‍वं -- 
‘जिमिसं बाँसुरी पुयाः नं छिपिं प्‍याखं मल्‍हू, जिमिसं सीबाजं थानाः नं छिपिं मख्‍वः।’ 
नयाः त्‍वनाः सनामजुइम्‍ह यूहन्‍ना वल। इमिसं वयात -- ‘भूत दुब्‍यूम्‍ह मनू’ धकाः धाल। 
मनूया काय्‌नं नये त्‍वने याना जुल। इमिसं वयात -- ‘नगुलु, अय्‌लाःगुलु व कर काइपिनि व पापीतय्‌ पासा’ धकाः धया जुल। इमिगु बुद्धि ला इमिगु ज्‍यां हे क्‍यं।” 
येशूं अप्‍वः यानाः अजूचायापुगु ज्‍या यानादीगु शहरय्‌ च्‍वंपिं मनूतय्‌सं पश्‍चाताप मयाःगुलिं इमित ब्‍वः बियादिल। 
“हे खोराजीन व बेथसेदाय्‌ च्‍वंपिं मनूत, छिमित धिक्‍कार दु, छाय्‌धाःसा छिमिथाय्‌ याःगु अजूचायापुगु ज्‍याखँ टुरोस व सीदोनय्‌ याःगु जूसा अन च्‍वंपिन्‍सं उबलय्‌ हे भांग्रां हिनाः नौनं बुयाः पश्‍चाताप याये धुंकल जुइ। 
जिं छिमित धाये -- परमेश्वरं न्‍याय यानादीबलय्‌ टुरोस व सीदोनय्‌ च्‍वंपिन्‍त स्‍वयाः अप्‍वः छिमित सास्‍ति यानादी। 
“हे कफर्नहुमय्‌ च्‍वंपिं मनूत, छिमित छु स्‍वर्गय्‌ थत यनी धयाच्‍वनागु ला? छिमित ला नरकय्‌ क्‍वफाइ। छिमिथाय्‌ याःगु अजूचायापुगु ज्‍याखँ सदोमय्‌ याःगु जूसा आः तक नं सदोम दया च्‍वनिगु जुइ। 
जिं छिमित धाये -- परमेश्वरं न्‍याय यानादीबलय्‌ सदोमय्‌ च्‍वंपिन्‍त स्‍वयाः छिमित अप्‍वः सास्‍ति यानादी।” 
अबलय्‌ येशूं धयादिल -- “हे परमेश्वर बाः, स्‍वर्ग व पृथ्‍वीया प्रभु, जिं छितः सुभाय्‌ बी, छाय्‌धाःसा छिं थ्‍व खँ सःस्‍यू व थू धाइपिन्‍त न्‍यंका मदिसे छुं मस्‍यूपिं मस्‍तय्‌त न्‍यंकादिल। 
बाः छितः थ्‍व हे भिं ताल।” 
“बाःनं हे फुक्‍क जिगु ल्‍हातय्‌ तयादीगु खः। काय्‌यात सुनानं म्‍हमस्‍यू, बाःनं जक काय्‌यात म्‍हस्‍यू। अले बाःयात नं सुनानं म्‍हमस्‍यू, काय्‌नं जक स्‍यू। काय्‌नं म्‍हसीका ब्‍यूपिन्‍सं जक बाःयात म्‍हसी।” 
“कु कुबियाः त्‍यानु चाःपिं फुक्‍कं जिथाय्‌ झासु लंकः वा, जिं छिमित आराम बी। 
जिगु जुवा छिमिसं कुब्‍यु, अले जिके स्‍यना का, छाय्‌धाःसा जि स्‍वजाम्‍ह व क्‍वमिलुम्‍ह खः। अले छिमिसं दुनुगलंनिसें आराम काये खनी। 
जिगु जुवा कुबी अःपु, अले जिगु कु याउँसे च्‍वं।”