मत्ती.
4.
पवित्र आत्‍मां येशूयात शैतानपाखें जाँचय्‌ याकेत मरुभूमिइ ब्‍वनायंकल। 
पीन्‍हु पीचा तक छुं हे नयामदीगुलिं वय्‌कःयात तसकं हे नयेपित्‍यात। 
अबलय्‌ हे शैतानं वयाः वय्‌कःयात थथे धाल -- “छि परमेश्वरया काय्‌ खःसा थ्‍व ल्‍वहंयात मरि जुइमा धकाः धयादिसँ।” 
येशूं लिसः बियादिल -- “थथे च्‍वयातःगु दु -- ‘मनूत मरिं जक मखु, परमेश्वरयागु म्‍हुतुं पिहां वःगु छगू छगू वचनं म्‍वाइ।’” 
शैतानं हानं वय्‌कःयात पवित्रगु शहरय्‌ यंकल, अले देगः च्‍वकाय्‌ यंकाः थथे धाल -- 
“छि परमेश्वरया काय्‌ खःसा थनं तिंन्‍हुयादिसँ। छाय्‌धाःसा थथे च्‍वयातःगु दु -- ‘छ न्‍ह्याथाय्‌ वंसां रक्षा यायेत परमेश्वरं थः दूततय्‌त आज्ञा बियादी ल्‍वहँतं छंगु तुतियात घाःपाः मजुइमा धकाः इमिसं थःगु ल्‍हातं छन्‍त ल्‍ह्वना तइ।’” 
येशूं वयात धयादिल -- “थथे च्‍वयातःगु दु -- ‘छं परमप्रभु परमेश्वरयागु मन स्‍वये मते।’” 
अनंलि शैतानं वय्‌कःयात तःजाःगु पहाडय्‌ यंकाः संसारयागु बाबांलाःगु फुक्‍क राज्‍य क्‍यन। 
“छिं जितः भागि यानादीसा जिं छितः थ्‍व फुक्‍कं बी” धकाः शैतानं धाल। 
अले वय्‌कलं धयादिल -- “अय्‌ शैतान, जिगु न्‍ह्यःने च्‍वने मते, हुँ। थथे नं च्‍वयातःगु दु -- ‘छं छिम्‍ह परमप्रभु परमेश्वरयागु जक सेवा याये माः। वय्‌कःयात जक मानय्‌ याये माः।’” 
अले तिनि शैतानं वय्‌कःयात त्‍वःता वन। अले स्‍वर्गदूतत वयाः वय्‌कःयागु सेवा यात। 
बप्‍तिस्‍मा बीम्‍ह यूहन्‍नायात झ्‍यालखानाय्‌ कुनातल धकाः न्‍यनादीगुलिं येशू गालीलय्‌ झायादिल। 
वय्‌कः नासरतय्‌ च्‍वना मदिसे जबूलून व नप्‍तालीया दथुइ लाःगु गालील समुद्र लिक्‍क च्‍वंगु कफर्नहुम झायाः च्‍वनादिल। 
थुकथं यशैया अगमवक्तां धया थकूगु थ्‍व खँ पूवन -- 
“यर्दन खुसि व समुद्र दथुइ लाःगु जबूलून व नप्‍ताली, अले यहूदीमखुपिं च्‍वनाच्‍वंगु गालील, 
थ्‍व खिउँथाय्‌ च्‍वनाच्‍वंपिं मनूतय्‌सं छगू तःधंगु जः खनीतिनि। कालया किचलय्‌ लाःगु देशय्‌ च्‍वनाच्‍वंपिन्‍सं नं थ्‍व तःधंगु जः स्‍वइतिनि।” 
उबलय्‌ निसें वय्‌कलं थथे धकाः न्‍यंकादिल -- “पश्‍चाताप या, छाय्‌धाःसा स्‍वर्गयागु राज्‍य न्‍ह्यःने थ्‍यंकः वये धुंकल।” 
छन्‍हु येशूं गालील समुद्र सिथय्‌ झायाच्‍वंबलय्‌ जाः ह्वानाः न्‍या लानाच्‍वंपिं निम्‍ह दाजुकिजापिं सिमोन व वया किजा अन्‍द्रियासयात खन। इपिं न्‍या लाइपिं खः। 
वय्‌कलं इमित धयादिल -- “जि नाप वा, अले जिं छिमित मनूत लाइपिं यानाबी।” 
थ्‍व खँ न्‍यनेवं इपिं थःगु जाःजी हे त्‍वःताः वय्‌कः नाप वन। 
अनं झाःबलय्‌ वय्‌कलं जब्‍दिया निम्‍ह काय्‌ याकूब व वया किजा यूहन्‍नायात खन। इपिं थः अबु जब्‍दि नाप नांचाय्‌ च्‍वनाः पुलांगु जाः ल्ह्वनाच्‍वंगु खः। वय्‌कलं इमित नं सःतादिल। 
धयाकथं इपिं थः अबु व नांचा त्‍वःताः वय्‌कः नाप वन। 
येशू गालील फुक्‍कभनं चाःहिलादिल। धर्मशास्‍त्र स्‍यनिगु छेँय्‌ झायाः मनूतय्‌त स्‍यनेकने यानाः परमेश्वरयागु राज्‍ययागु भिंगु खँ न्‍यंकादिल। अले तःतामछि ल्‍वय्‌ दुपिं मनूतय्‌त नं लाय्‌कादिल। 
वय्‌कलं थथे यानादीगु खँ सिरिया देशय्‌ फुक्‍कभनं बय्‌बय्‌ जुल। अले तःतामछि ल्‍वय्‌ दुपिं, तःतामछि दुःखकष्‍ट दुपिं, भूत दुबिना च्‍वंपिं, तिल्‍वय्‌ वःपिं व पक्षवातं कःपिं मनूतय्‌त वय्‌कःयाथाय्‌ हल। वय्‌कलं इपिं फुक्‍कसिगु ल्‍वय्‌ लाय्‌कादिल। 
गालील, डेकापोलिस, यरूशलेम, यहूदिया व यर्दन खुसिया पारिंनिसें वःपिं ग्‍वाः ग्‍वाः मनूत वय्‌कः नाप नाप जुल।