हितोपदेश.
18.
याकःचा जक जुइम्‍ह मनुखं थःगु जक बिचाः याइ। वं मेपिनिगु खःगु खँ नं मानय्‌ याइ मखु। 
मूर्खतय्‌सं थू मथूया बिचाः याइ मखु, थःगु खँ जक द्यःने तयेत स्‍वइ। 
मखुगु ज्‍यां मछालापुकी, अले न्‍हाय्‌ भुइकी। 
ज्ञानया खँ तःजाःगु गालं थहां वयाच्‍वंगु लःया धाः थें खः। 
दोषीया पँ लिनाः निर्दोषम्‍हय्‌सित द्वपं बियेगु पाय्‌छि मजू। 
मूर्खतय्‌सं ल्‍वापु थयेगु धयागु हे थःपिन्‍त दाय्‌केत धाःगु खः। 
मूर्खतय्‌सं नवायेगु धयागु हे थःम्‍हं थःगु विनाश मालेगु खः। अले थःगु हे खँय्‌ तक्‍यनेगु खः। 
म्‍वाःमदुगु खँ न्‍यनेगु धयागु सवाः वःगु नसा नये थें खः। थ्‍व मनूतय्‌गु नुगः दुनेथ्‍यंक दुहां वनी। 
अल्‍छीम्‍ह मनू नाश यानाजुइम्‍ह मनू थें खः। 
परमप्रभुयागु नां बल्‍लाःगु किल्‍ला थें खः। धर्मी मनूत थन वनाः थःगु रक्षा याये फइ। 
तःमिपिं मनूत थःपिनिगु धनसम्‍पत्तिं हे शहरया प्‍यखें च्‍वंगु ततःजाःगु व बल्‍लाःगु पःखालं थें रक्षा याइ धकाः च्‍वनी। 
क्‍वमिलुपिन्‍त हनाबना तइ। घमण्‍डीत विनाश पाखे न्‍ह्यांवनाच्‍वनी। 
लिसः बी न्‍ह्यः खँ न्‍यनेगु या, मखुसा छ मूर्ख जुइ, अले मछालापुकी। 
मनूतय्‌त म्‍हं मफइबलय्‌ म्‍वायेगु इच्‍छां वयात लिधंसा बियाच्‍वनी। तर थज्‍याःगु इच्‍छा मन्‍त कि मनूतय्‌गु म्‍वायेगु आशा नं फुनावनी। 
सःस्‍यूपिं मनूतय्‌सं न्‍ह्याबलें सय्‌केगु मनसुबा तयाच्‍वनि, अले मालाच्‍वनि। 
सुं तःधंपिं मनूतय्‌त नापलाये मास्‍तेवःसा कोस्‍यालि ज्‍वनाः हुँ। थुकिं नापलायेत अःपुकी। 
मुद्दा जुइबलय्‌ विपक्षी वयाः न्‍ह्यसः मततले न्‍हापा नवानाच्‍वंम्‍ह मनूयागु खँ हे पाय्‌छि थें च्‍वनी। 
निम्‍हं उतिकं हे धिसिलाःपिं जुल कि चिट्ठा तयाः त्‍याःबू क्‍वःछी। 
थः दाजुकिजापिन्‍त ग्‍वाहालि या। अले इमिसं शहरया बल्‍लाःगु किल्‍लां थें छन्‍त रक्षा याइ। ल्‍वापुं दाजुकिजाया लुखा तिनाबी। 
म्‍हुतुया फलं मनूतय्‌ प्‍वाः जाइ। म्‍हुतुं पिहां वःगु खँग्‍वलं मनूतय्‌त लुधंकी। 
म्‍हुतुया वचनं जीवन व मृत्‍यु क्‍वःछी। उकिं थःगु वचनया फल थःम्‍हं फयेमाली। 
मनूतय्‌गु तःधंगु सम्‍पत्ति धयागु हे वया कलाः खः, अले परमप्रभुया कृपा नं। 
चीमिपिन्‍सं लिसः बीबलय्‌ क्‍वमिलु जुयाः नवाइ, तःमिपिन्‍सं नवाइबलय्‌ छाक्‍क नवाइ। 
गुलिं गुलिं पासापिं स्‍यंकाबीपिं नं दु। गुलिं पासापिं धाःसा दाजुकिजा स्‍वयाः नं स्‍याःन्‍याःपिं जुइ।