हितोपदेश.
7.
हे जिकाय्‌! जिं धयागु खँ बांलाक न्‍यँ। अले छु या धयागु खः लुमंका ति। 
जिं धाःथें या, छन्‍त जीवन दइ। जिगु उजंयात थःगु मिखाया नानिचा थें याना ति। 
थ्‍वयात थःगु पतिनय्‌ चिना ति, अले नुगःया ग्‍वरलय्‌ च्‍वया ति। 
बुद्धियात थः केहेँ नालाका, अले लिग्‍यांयात स्‍याःन्‍याःम्‍ह पासा। 
थुमिसं छन्‍त व्‍यभिचारी मिसा व म्‍हुतु पिचुपिं मिसातय्‌ पाखें तापाका तइ। 
छन्‍हु जि थःगु छेँया तिकिझ्‍यालं पिने स्‍वयाच्‍वनागु। 
जिं लँय्‌ तःम्‍ह हे ल्‍याय्‌म्‍हतय्‌गु पुचलय्‌ छम्‍ह बुद्धि मदुम्‍ह ल्‍याय्‌म्‍हयात खना। 
व ल्‍याय्‌म्‍ह व मिसाया छेँ वनेगु लँय्‌ वनाच्‍वन। व व मिसाया छेँ न्‍ह्यःने थ्‍यन। 
अबलय्‌ खिउँ खिउँ धायेधुंकल। 
व मिसां वयात नापालात। वं वेश्‍यां फीगु थें लं फिनातःगु दु। अले दाउ स्‍वयाच्‍वंगु दु। 
व न्‍ह्याबलें लिमलाःफमलाः लँय्‌ जक जुया जुइम्‍ह व नुगः थातय्‌ मलाःम्‍ह मिसा खः। 
गुबलें लँय्‌ सा गुबलें चुकय्‌ च्‍वनाः मनूतय्‌त जालय्‌ लाकेत दाउ स्‍वयाच्‍वनी। 
वं व मिजंयात ज्‍वनाः चुप्‍पा नइ। अले मछाः हे मजुसे धाइ -- 
“जिं मेलबलि छाये धकाः फ्‍यानातयागु थौं पूवंकागु दु। 
उकिं जि छन्‍त मालेत पिहां वयागु। आः छन्‍त थन नापलात। 
जिं थःगु लासाय्‌ मिश्र देशयागु रंगीचंगी तन्‍ना लानातयागु दु। 
जिं थःगु लासायात मूर्र, कुनुस्‍वां व दालाचिनि ह्वलाः नस्‍वाः वय्‌कातयागु दु। 
वा, थौं झी चच्‍छि आनन्‍द याये। निम्‍हं चच्‍छि घय्‌पुयाः द्यने। 
जिमि भाःत छेँय्‌ मदु। तापाक पिने वंगु दु। 
वं थःनापं यक्‍व धिबा यंकूगु दु, आः निवाः तक व लिहां वइ मखु।” 
थुकथं वं व मिजंयात थःगु जालय्‌ क्‍यंकल। व नं व मिसायागु पिचुगु खँय्‌ क्‍यन। 
उघ्रिमय्‌ व व मिसायागु ल्‍यूल्‍यू वन, स्‍यायेत यंकूम्‍ह द्वहं थें, जालय्‌ क्‍यनेत तिंतिं न्‍हुयाजूम्‍ह चल्‍ला थें। 
जाः प्‍यनातःथाय्‌ न्‍ह्यब्‍वांवंम्‍ह झंगः थें व व मिसाया ल्‍यूल्‍यू वन। थःगु ज्‍यान हे वनिगु खँ वं छुं हे मस्‍यू। 
हे जिकाय्‌! उकिं जिगु खँ न्‍यँ। जिगु खँय्‌ ध्‍यान ब्‍यु। 
अज्‍याःपिं मिसातय्‌गु खँ मतिइ हे तये मते, अज्‍याःपिनिगु लँय्‌ हे जुइ मते। 
थज्‍याःपिं मिसातय्‌सं यानाः यक्‍व हे मिजंत स्‍यनेधुंकल। थज्‍याःपिन्‍सं स्‍यंकूपिं मनूत अल्‍याख दयेधुंकल। 
थुमिगु छेँ कालयाथाय्‌ वनिगु लँपु खः, नर्कय्‌ थ्‍यंकीगु लँपु खः थुपिं।