हितोपदेश.
5.
हे जिकाय्‌! जिगु बुद्धिया खँय्‌ ध्‍यान ब्‍यु। जिगु दुग्‍यांया खँयात बांलाक न्‍यँ। 
थुकिं छन्‍त लिग्‍यां दइ। अले छंगु खँय्‌ ग्‍यां पिज्‍वइ। 
व्‍यभिचारी मिसाया म्‍हुतुसि कस्‍ति थें चाकुसे च्‍वनि, अले वयागु खँ चिकं थें चुल्‍लुसे च्‍वनि। 
लिपा व बिख थें खाइसे व निखें धाः दुगु तरवार थें जुइ। 
वं छन्‍त मृत्‍युया गालय्‌ क्‍वफाये यंकी। वयागु लँपु धयागु सीगाःया लँपु खः। 
व जीवनया लँय्‌ जुइ मखु वयागु लँ बेक्‍वः। तर वं छुं हे सी मखु। 
हे जि काय्‌पिं! उकिं जिगु खँ न्‍यँ, अले गुबलें त्‍वफिके मते। 
अज्‍याःपिं मिसातय्‌ पाखें तापाक हे च्‍वँ, इमिगु छेँया लुखा न्‍ह्यःने तक हे नं वने मते। 
मखुसा छिमिसं थःपिनिगु इज्‍जत मेपिनिगु ल्‍हातिं तंकेमालि, अले नुगः मछिंकाः थःपिनिगु ज्‍यान पायेमाली। 
पिनें वःपिन्‍सं छिमिगु सम्‍पत्तिइ मोज याइ। छिमिसं याःगु ज्‍याया कमाइ मेपिनिगु ल्‍हातिइ लाइ। 
सीत्‍यय्‌काः छिमिगु क्‍वँय्‌ व छेंगू जक ल्‍यंदइ, अले छिपिं ख्‍वया जुइमाली। 
अले छिमिसं धाइ -- “जिं छाय्‌ इलय्‌ हे सय्‌के मफुत? छाय्‌ जिं सुयागुं भिंगु खँयात नालाकाये मफुत? 
थः गुरूपिनिगु खँय्‌ जिं ध्‍यान हे मबिया। इमिसं धाःगु खँय्‌ बिचाः हे मयाना। 
आकाझाकां फुक्‍कसिया न्‍ह्यःने इज्‍जत वंगु वाःचाल।” 
थःगु हे तुंया लः त्‍वनेगु या। 
थःगु तुंया लः पिने लँय्‌ छाय्‌ बाः वंकेबीगु। 
व छंगु हे जक जुइमा। मेपिन्‍त ब्‍याके मते। 
छंगु तुंयात आशिष दयेमा। ल्‍याय्‌म्‍हबलय्‌ ब्‍याहा यानाम्‍ह कलाः पाखें लय्‌तायाच्‍वँ। 
छिमि कलाः चला थें बांलाः, अले हिसि दु। छं थः कलाः पाखे हे नुगः क्‍वसाय्‌काः च्‍वनेमाः। अले माया यानाः च्‍वनेमाः। 
हे जिकाय्‌! छाय्‌ छ व्‍यभिचारी मिसालिसे भेलय्‌ पुना जुयागु? थ्‍व व मदुपिं मिसातय्‌गु जालय्‌ छ छाय्‌ तक्‍यना जुयागु? 
परमप्रभुं छं याःगु फुक्‍कं स्‍वयाच्‍वंगु दु। छ गन गन वन दक्‍वं स्‍वयाच्‍वंगु दु। 
दुष्‍ट मनू थःगु मभिंगु ज्‍यां थःगु हे जालय्‌ क्‍यनी। वयागु पापया खिपतं वयात हे ची। 
थःम्‍हं थःत कःघाये मफयाः व नाश जुयावनी। थःगु हे मूर्खतां व सिनावनी।