हितोपदेश.
4.
हे जिकाय्‌! थः बौया खँ न्‍यँ! थुकी ध्‍यान ब्‍यु, अले लिग्‍यां का। 
जिं छिमित भिंगु खँ स्‍यने, उकिं जिगु खँयात ल्‍वःमंके मते। 
जि मचाबलय्‌ जिमि मांबौया याकः काय्‌ खः। 
जिमि बौनं जितः थथे धकाः स्‍यनादिल -- “जिं धयागु खँ लुमंकाति, गुबलें ल्‍वःमंके मते। जिं धयाथें या। छन्‍त जीवन दइ। 
बुद्धि दय्‌कि, लिग्‍यां दय्‌कि। जिगु खँयात ल्‍वःमंके मते, अले फस्‍वयाः वने मते। 
बुद्धियात त्‍वःते मते, वं छंगु रक्षा याइ, थ्‍वयात यय्‌कल धाःसा थ्‍वं छन्‍त बिचाः याइ। 
दकसिबय्‌ तःधंगु धयागु बुद्धि खः, उकिं थ्‍वयात लानाका, छंके दुगु फुक्‍क पायेमाःसां, लिग्‍यां दय्‌कि। 
बुद्धियात च्‍वछाःसा छन्‍त नं च्‍वछाइ, वयात कय्‌च्‍या, वं नं छन्‍त इज्‍जत बी। 
व छंगु छ्यंया श्रीपेच जुया बी।” 
हे जिकाय्‌ न्‍यँ! जिं धयागु खँ न्‍यँ! छ यक्‍व म्‍वाइ। 
जिं छन्‍त बुद्धिया लँय्‌ यंके, अले खःगु लँपुइ यंके। 
छ न्‍यासि जुइबलय्‌ पलाः लद्याइ मखु, ब्‍वाँय्‌ वंसां दइ मखु। 
छं सय्‌कागु खँ न्‍ह्याबलें लुमंकाति। सय्‌का थें जु। व छंगु जीवन खः। 
दुष्‍टतय्‌गु लँय्‌ वने मते, इमिसं याः थें यानाजुइ मते। 
अज्‍याःगु मतिइ हे तये मते, अज्‍याःगुलिइ जुइ हे मते। इपिं पाखें तापाक हे च्‍वँ, अले थःगु हे लँय्‌ जु। 
दुष्‍टत सुयातं मस्‍यंकुतले द्यनेफइ मखु सुयातं क्‍वःमथतले इमि न्‍ह्यः वइ मखु। 
मभिंगु ज्‍या व स्‍याये पालेगु ज्‍या इमिगु नसा व त्‍वँसा खः। 
धर्मीतय्‌गु लँ सुथसिया निभाः थें खः, बान्‍हि मजुतले व थिनावं वइ। 
दुष्‍टतय्‌गु लँ तसकं खिउँगु थें खः, इमिसं थःपिं छुकिं यानाः दल धयागु तकं सी मखु। 
हे जिकाय्‌, जिगु खँ न्‍यँ! जिगु खँय्‌ न्‍हाय्‌पं ब्‍यु। 
थुमित थः पाखें गुबलें तापाके मते। थःगु नुगलय्‌ तयाति। 
सुनां थ्‍व लुइके फइ, वयात थ्‍व जीवन जुइ। अले वयागु म्‍हयागु निंतिं उसाँय्‌ जुइ। 
थःगु मतियात बांलाक बिचाः या, छं मति तःथें हे छंगु जीवन जुइगु खः। 
मखुगु खँ ल्‍हाये मते, म्‍हुतुं गुबलें मज्‍यूगु, मत्‍यःगु खँ पिकाये मते। 
न्‍ह्याबलें मिखां तप्‍यंक स्‍वयेफय्‌कि, मछालाः गुबलें छ्यं क्‍वछुके म्‍वाःलेमा। 
छु याये त्‍यनागु खः, बांलाक बिचाः यानाः या। अले खःगु लँपु ज्‍वँ। 
उखेंथुखें पलाः तये मते। तप्‍यंक जु। मभिं पाखें तापाक हे पलाः ति।