भजन.
149.
हल्‍लेलूया! परमप्रभुया निंतिं छपु न्‍हूगु भजन हा, विश्वास याये बहःपिनिगु सभाय्‌ वय्‌कःया प्रशंसा या! 
इस्राएल थःत सृष्टि यानादीम्‍हय्‌सिया कारणं लय्‌तायेमा, सियोनयापिं मनूत थः जुजुया कारणं लय्‌तायेमा! 
प्‍याखं ल्‍हुल्‍हुं इमिसं वय्‌कःया नांया प्रशंसा यायेमा, दम्‍फु व वीणा थानाः इमिसं वय्‌कःया भजन हालेमा। 
परमप्रभु थः मनूत खनाः लय्‌ताः, वय्‌कलं क्‍वमिलुतय्‌त मुक्ति बियाः हनादी। 
विश्वास याये बहःपिं मनूत महिमाया कारणं लय्‌तायेमा, अले थःगु लासाय्‌ च्‍वनाः नं इमिसं जय जय यायेमा। 
इमिगु म्‍हुतुं परमेश्वरया प्रशंसा जुइमा, अले इमिगु ल्‍हातय्‌ निखें धाः दुगु तरवार दयेमा, 
इमिसं जाति जातियात बदला कायेमा, देश देशयापिं मनूतय्‌त सजाँय बीमा, 
इमि जुजुपिन्‍त सिखलं, व इमि नायःतय्‌त नयागु न्‍यवलं चीमा। 
अले इमित क्‍वःछिनातःगु सजाँय बीमा। विश्वास याये बहःपिं मनूत महिमाया कारणं लय्‌तायेमा। हल्‍लेलूया!