भजन.
148.
हल्‍लेलूया! स्‍वर्गं परमप्रभुया प्रशंसा या, ततःजाःगु थासय्‌ वय्‌कःया प्रशंसा या! 
हे वय्‌कःया स्वर्गदूतत, वय्‌कःया प्रशंसा या! हे स्‍वर्गया सेना, वय्‌कःया प्रशंसा या! 
हे सूर्य व तिमिला, वय्‌कःया प्रशंसा या! हे प्‍वालप्‍वाल थीगु नगु, वय्‌कःया प्रशंसा या! 
हे दकलय्‌ तःजाःगु आकाश, हे आकाशय्‌ च्‍वय्‌ च्‍वंगु लः छिमिसं वय्‌कःया प्रशंसा या! 
इमिसं परमप्रभुया नांया प्रशंसा यायेमा, छाय्‌धाःसा वय्‌कःया आज्ञां हे उपिं सृष्टि जुल। 
वय्‌कलं इमित थःथःगु थासय्‌ न्‍ह्याबलेंया लागि तयादिल, वय्‌कलं छगू गुबलें सिमधइगु नियम बियादिल। 
हे ततःधिकपिं लः जन्‍तुत, व तःजाःगु समुद्र, पृथ्‍वीं परमप्रभुया प्रशंसा या! 
हे हाबलासा व प्‍वँ, च्‍वापु व सुपाँय्‌, वय्‌कःया आज्ञा पालन याइगु वा नापं वइगु वाफय्‌। 
पहाडत व फुक्‍क डाँडात, फल सय्‌कीगु सिमा व फुक्‍क देवदारु, 
गुँ पशु व छेँय्‌ लहीपिं पशु, घिस्रय्‌ जुया जुइपिं जन्‍तु व झंगःपंक्षित, 
पृथ्‍वीयापिं जुजुपिं व जातित, राजकुमार व पृथ्‍वीया शासकत, 
ल्‍याय्‌म्‍हपिं व मिसा मस्‍त, बुरापिं व मस्‍त, सकसिनं परमप्रभुया प्रशंसा या। 
इपिं सकसिनं परमप्रभुया नांया प्रशंसा याये मा, छाय्‌धाःसा वय्‌कःयागु नां जक तःधं। वय्‌कःया महिमा पृथ्‍वी व आकाश स्‍वयाः च्‍वय्‌ दु। 
वय्‌कलं थःगु देशयात बल्‍लाकादीगु दु, उकिं विश्वास याये बहःपिं वय्‌कःयात तसकं यःपिं, इस्राएलया मनूतय्‌सं वय्‌कःया प्रशंसा याइ। हल्‍लेलूया।