भजन.
145.
दाऊदया भजन हे परमेश्वर, जिमि जुजु, जिं छितः तःधंके, जिं छिगु नांया न्ह्याबलें प्रशंसा याये। 
न्‍हियान्‍हिथं जिं छिगु प्रशंसा याये, अले न्‍ह्याबलें छिगु नां च्‍वछाये। 
परमप्रभु तःधंम्‍ह खः अले प्रशंसा याये बहःम्‍ह खः। वय्‌कः गुलि तःधं धकाः झीसं थुइके हे फइ मखु। 
छगू पुस्‍तां मेगु पुस्‍तांलिसें छिगु ज्‍याया प्रशंसा याइ, इमिसं छिगु बल्‍लाःगु ज्‍याया बारे कनी। 
इमिसं छिगु महिमा व गौरवया बारे खँ ल्‍हाइ, अले जिं छिगु अजूचायापुगु ज्‍याय्‌ ध्‍यान याये। 
इमिसं छिगु ततःधंगु ज्‍यायागु शक्तिया बारे खँ ल्‍हाइ, अले जिं छिगु ततःधंगु ज्‍या कने। 
इमिसं छिगु फुक्‍क भिंगु ज्‍याया निंतिं लसता हनी। मनूतय्‌सं छिगु धार्मिकताया म्‍ये हाली। 
परमप्रभु दया माया दुम्‍ह खः। वय्‌कः तंचायेत लिबाकादीम्‍ह व तसकं दया माया यानादीम्‍ह खः। 
परमप्रभुं सकसितं भिं यानादी, वय्‌कःया दयां वय्‌कलं यानादीगु फुक्‍क ज्‍याय्‌ दइ। 
हे परमप्रभु, फुक्‍क सृष्टिं छिगु प्रशंसा याइ, अले छिकपिनि विश्वास याये बहःपिं मनूतय्‌सं छितः सुभाय्‌ बी। 
इमिसं छिगु राज्‍यया महिमाया बारे खँ ल्‍हाइ, अले छिगु शक्तियागु बयान याइ। 
अले मेपिं मनूतय्‌सं छिं यानादीगु ततःधंगु ज्‍याया बारे सी। अले छिगु राज्‍यया महिमां जाःगु गौरव खनी। 
हे परमप्रभु, छिगु राज्‍य न्‍ह्याबलें दयाच्‍वनी। छिं पुस्तां पुस्‍तातक शासन यानादी। परमप्रभु थः मनूतय्‌गु लागि विश्वास याये बहःम्‍ह खः, अले वय्‌कलं थःगु बचं पूवंकादी। थःगु फुक्‍क ज्‍याय्‌ वय्‌कः दया दुम्ह खः। 
वय्‌कलं क्‍वत्‍यकाच्‍वने माःपिन्‍त ग्‍वाहालि बियादी, अले ग्‍वतूपिन्‍त थनादी। 
फुक्‍क प्राणीतय्‌सं छिगु लँ स्‍वयाच्‍वनी, अले छिं इमित पाय्‌छिगु इलय्‌ नयेगु नसा बियादी। 
छिं थःगु ल्‍हातं फुक्‍क प्राणीं मनंतुनाच्‍वंगु खँ पूवंकादी। 
परमप्रभु थःम्‍हं यानादीगु फुक्‍क ज्‍याय्‌ धर्मी खः, थःगु फुक्‍क ज्‍याय्‌ वय्‌कः दया दुम्‍ह खः। 
वय्‌कःयात आराधना याइपिं सकसिगुं न्‍ह्यःने परमप्रभु दी, वय्‌कःयात दुनुगलंनिसें आराधना याइपिं सकसिगुं न्‍ह्यःने वय्‌कः दी। 
वय्‌कःया ग्‍याःभय काःपिनिगु इच्‍छा वय्‌कलं पूवंकादी, अले इमिगु बिन्‍ति न्‍यनाः इमित उद्धार यानादी। 
परमप्रभुं थःत माया याइपिं सकसितं रक्षा यानादी, तर फुक्‍क मभिंपिन्‍त वय्‌कलं नाश यानादी। 
जिं परमप्रभुया सदां प्रशंसा याये, अले फुक्‍क प्राणीं न्‍ह्याबलें वय्‌कःया पवित्र नांया प्रशंसा यायेमा।