भजन.
144.
दाऊदया भजन जितः रक्षा याइम्‍ह परमप्रभुया प्रशंसा जुइमा, वय्‌कलं जिगु ल्‍हाः व पतिंयात ल्‍वायेगु सीप स्‍यनादी। 
वय्‌कः जिगु निंतिं दया माया दुम्‍ह परमेश्वर व किल्‍ला खः, वय्‌कः जिगु निंतिं ल्‍वहंधी व जितः उद्धार याइम्‍ह खः, वय्‌कः जिगु ढाल खः, शरण कायेगु थाय्‌ खः। वय्‌कलं मनूतय्‌त जिगु अधिनय्‌ तयादी। 
हे परमप्रभु, मनूत छु हे खः धकाः छिं बिचाः यानाच्‍वनेत? सिनावनीपिन्‍त छु हे खः धकाः छिं च्‍यूताः तयाच्‍वनेत? 
मनू ला छम्‍हू सासः जक थें खः, वयागु आयु मदयावनीगु किचः थें जक खः। 
हे परमप्रभु, थःगु आकाशयात चाय्‌काः क्‍वहां झासँ, पहाडतय्‌त थियादिसँ, अले उकिं कुँ पिहां वयेमा। 
हाबलासा त्‍वय्‌कादिसँ, अले शत्रुतय्‌त छ्यालब्‍याल यानादिसँ। वाण कय्‌काः इमित लिनाछ्वयादिसँ। 
स्‍वर्गं कुहां झासँ, तःजाःगु समुद्रं सालाः जितः थकयादिसँ अले बचय्‌ यानादिसँ। परदेशीतय्‌गु ल्‍हातं जितः त्‍वःतकादिसँ। 
इपिं मखुगु खँ ल्‍हाइपिं खः। खःगु खँ ल्‍हाये धकाः पाफयाः नं इमिसं मखुगु खँ ल्‍हाइ। 
हे परमेश्वर, जिं छितः छपु न्‍हूगु भजन हालाः न्‍यंके, जिं वीणा थानाः छितः भजन न्‍यंके। 
छिं जुजुपिन्‍त त्‍याकादी, छिं थः दास दाऊदयात तरवार पाखें बचय्‌ यानादी। 
जितः बचय्‌ यानादिसँ अले परदेशीतय्‌गु ल्‍हातं त्‍वःतकादिसँ। इपिं मखुगु खँ ल्‍हाइपिं खः, इमिसं खःगु खँ ल्‍हाये धकाः पाफयाः नं मखुगु खँ ल्‍हाइ। 
झी काय्‌पिं ल्‍याय्‌म्‍हबलय्‌ सिमा तःमा जूगु थें जुइ, अले झी म्‍ह्याय्‌पिं दरवारया निंतिं बुत्ता कियातःगु कुन्‍चाया थां थें जुइ। 
झीगु भकारी फुक्‍क कथंयागु अन्‍नं जाइ, झीम्‍ह फैच्‍वलय्‌ द्वलंद्वः दुगं अप्‍वयावनी। झीगु ख्‍यलय्‌ उपिं लखंलख दइ। 
झी साद्वहंया मचा छम्‍ह हे क्‍वहां मवय्‌क यक्‍व दयेमा। झीगु पखाः थुनी मखु, झीपिं ज्‍वंकाः वनेमालि मखु, अले झीगु लँय्‌ दुःखं जाःगु ख्‍वःसः ताये मदयेमा। 
धन्‍य खः थुकथं आशिष काइपिं मनूत, धन्‍य खः परमप्रभु परमेश्वरयात आराधना याइपिं मनूत।