भजन.
143.
दाऊदया भजन हे परमप्रभु, जिगु प्रार्थना न्‍यनादिसँ, दयाया लागि जिं यानागु इनाप न्‍यनादिसँ। छाय्‌धाःसा छि थः मनूतय्‌गु लागि धर्मीम्‍ह व विश्वास याये बहःम्‍ह खः। जिगु इनाप न्‍यनाः ग्‍वाहालि यानादिसँ। 
थः दासयात इन्‍साफय्‌ हयादी मते, छिगु न्‍ह्यःने सुं नं धर्मी मदु। 
शत्रुं जितः लितुली, वं जितः बँय्‌ न्‍हुत्तुमतु न्‍हुइ। यक्‍व न्‍हापा हे सी धुंकूपिं थें यानाः वं जितः खिउँगु थासय्‌ तःगु दु। 
उकिं जि निराश जुयागु दु, जिगु नुगः ख्‍वःगु दु। 
अले जिं वने धुंकूगु खँ लुमंके। जिं छिगु ज्‍याया बारे ध्‍यान याये। अले छिगु ल्‍हातं याःगु ज्‍याया बारे बिचाः याये। 
जिं थःगु ल्‍हाः ल्‍ह्वनाः छितः प्रार्थना याये, गंगु बँ थें जि छिगु लागि प्‍याःचाःगु दु। सेला 
हे परमप्रभु, याकनं लिसः बियादिसँ, जिगु नुगः हे क्‍वतुने धुंकल। थःगु ख्‍वाः जि पाखें फस्‍वय्‌कादी मते, मखुसा जि सीपिं थें जुइ। 
सुथया इलं छिगु सदां दयाच्‍वनिगु दया मायाया वचन हयेमा, छाय्‌धाःसा छिके हे जिं भलसा तयागु दु। जि वनेमाःगु लँ क्‍यनादिसँ, जिं थःगु मन छि पाखे हे ल्‍ह्वने। 
हे परमप्रभु, जितः जिमि शत्रुत पाखें बचय्‌ यानादिसँ, जि सुलेत छिगु हे शरणय्‌ वयागु दु। 
छिगु इच्छा गथे यानाः पूवंकेगु खः व जितः स्‍यनादिसँ। छाय्‌धाःसा छि जिमि परमेश्वर खः। छिगु आत्‍मां जितः भिंगु लँपुइ यंकेमा। 
हे परमप्रभु, छिगु नांया लागि जिगु जीवनयात रक्षा यानादिसँ। छिगु धार्मिकताया कारणं जितः थ्‍व दुःख पाखें पित हयादिसँ। 
छिगु सदां दयाच्‍वनिगु दया मायां यानाः जिमि शत्रुतय्‌त नाश यानादिसँ। अले जितः दुःख बीपिं सकसितं नाश यानादिसँ, जि छिकपिनि दास हे खः।