भजन.
138.
दाऊदया भजन हे परमप्रभु, जिं दुनुगलंनिसें छिगु प्रशंसा याये। द्यःतय्‌ न्‍ह्यःने जिं छिगु प्रशंसा याये। 
छिगु पवित्र देगः पाखे स्‍वयाः जिं पुलिं चुयाः भ्‍वपुले। अले छि सदां दया माया यानादीम्‍ह व विश्वास याये बहःम्‍ह जूगुलिं छिं थःगु नां व वचन फुक्‍क स्‍वयाः च्‍वय्‌ लाः धकाः क्‍यनादीगुलिं छिगु नांया प्रशंसा याये। 
जिं छितः ग्‍वाहालिया लागि इनाप यानाबलय्‌ छिं जितः लिसः बियादिल। छिं जितः बल बियाः आँट बियादिल। 
हे परमप्रभु, छिगु वचन न्‍यनाः पृथ्‍वीयापिं सकल जुजुपिन्‍सं छितः सुभाय्‌ बीमा, 
अले इमिसं परमप्रभुं यानादीगु ज्‍याया बारे म्‍ये हाली, छाय्‌धाःसा परमप्रभुया महिमा तःधं। 
परमप्रभु तःधंम्‍ह जूसां वय्‌कलं क्‍वत्‍यका च्‍वनेमाःपिन्‍त स्‍वयादी। तःधंछुया जुइपिन्‍त धाःसा वय्‌कलं तापाक्‍कं हे म्‍हस्‍यू। 
जितः समस्‍यां घेरय्‌ याःसां छिं जिगु जीवन रक्षा यानादी। छिं जिमि तम्‍वःपिं शत्रुतय्‌गु विरोध यानादी, अले थःगु जव ल्‍हातं जितः बचय्‌ यानादी। 
परमप्रभुं जिगु लागि थःगु उद्देश्‍य पूवंकादी, हे परमप्रभु, छिगु सदां दया माया न्‍ह्याबलेंया लागि दयाच्‍वनी। थःगु ल्‍हातं दय्‌कादीपिन्‍त त्‍वःतादी मते।