भजन.
135.
हल्‍लेलूया! परमप्रभुया नांया प्रशंसा या! हे परमप्रभुया सेवा याइपिं, वय्‌कःया प्रशंसा या! 
छिपिं परमप्रभुया देगलय्‌, झी परमेश्वरया देगःया चुकय्‌ सेवा याइपिं, 
परमप्रभुया प्रशंसा या, छाय्‌धाःसा परमप्रभु भिंम्‍ह खः। वय्‌कःया नांया भजन हा, छाय्‌धाःसा थ्‍व न्‍ह्यइपुसे च्‍वं। 
परमप्रभुं याकूबयात थःगु निंतिं, इस्राएलयात मू वंगु थः प्रजा जुइत ल्‍ययादीगु दु। 
जिं स्‍यू, परमप्रभु तःधंम्‍ह खः, झी परमप्रभु फुक्‍क द्यःत स्‍वयाः तःधंम्‍ह खः। 
परमप्रभुं छु छु याये मास्‍ति वय्‌कादिल, वय्‌कलं स्‍वर्ग, पृथ्वी अले समुद्रयागु फुक्‍क ततःजाःगु थासय्‌ यानादी। 
वय्‌कलं पृथ्‍वीया कुन्‍चां सुपाँय्‌ थकयादी, वा नापं हाबलासा छ्‌वयाहयादी, अले थःगु धुकुतिं फय्‌ पिकयादी। 
वय्‌कलं मिश्रय्‌ मनूतय्‌ तःधिकः काय्‌पिं व पशुतय्‌ न्‍हापां बूपिं नं स्‍यानादिल। 
हे मिश्र, छन्‍थाय्‌ वय्‌कलं फारो व वया फुक्‍क भारदारतय्‌ दथुइ चिं व अजूचायापुगु ज्‍या क्‍यनादिल। 
वय्‌कलं यक्‍व जातितय्‌त नाश यानादिल अले ततःधंपिं जुजुपिन्‍त स्‍यानादिल। 
वय्‌कलं एमोरीतय्‌ जुजु सीहोन, बाशानया जुजु ओग व कनानयापिं सकलें जुजुपिन्‍त स्‍यानादिल। 
अले इमिगु देश वय्‌कलं थः प्रजायात सर्बय्‌ कथं बियादिल। 
हे परमप्रभु, छिगु नां न्ह्याबलें दयाच्‍वनी। हे परमप्रभु, पुस्‍तां पुस्‍ता तक छिगु नां कयाच्‍वनी। 
परमप्रभुं थः प्रजाया न्‍याय यानादी, अले थः दासतय्‌त दया यानादी। 
जाति जातिया मूर्ति ला लुँ व वहः खः, उपिं फुक्‍क मनूतय्‌सं दय्‌कूगु खः। 
इमि म्‍हुतु दु, तर नवाये मफु, मिखा दु तर खंके मफु। 
इमि न्‍हाय्‌पं दु, तर न्‍यने मफु, इमिगु म्‍हुतुइ सासः हे मदु। 
इमित दय्‌कूपिं नं इपिं थें जुइ, अले इमिके भरोसा तइपिं नं सकलें अथे हे जुइ। 
हे इस्राएलया घराना, परमप्रभुया प्रशंसा या! हे हारूनया घराना, परमप्रभुया प्रशंसा या! 
हे लेवीया घराना, परमप्रभुया प्रशंसा या! हे परमप्रभुया भय काइपिं, परमप्रभुया प्रशंसा या! 
यरूशलेमय्‌ च्‍वनादीम्‍ह परमप्रभुयात सियोनय्‌ प्रशंसा या! हल्‍लेलूया!