भजन.
127.
सोलोमनया भजन, यरूशलेमय्‌ थहां वनेत हाःगु म्‍ये परमप्रभुं हे छेँ दय्‌कामदीसा, दय्‌कीपिन्‍सं याःगु ज्‍या सितिं वनी। परमप्रभुं हे शहरया रक्षा यानामदीसा, पालें पिवाच्‍वंगु सितिं वनी। 
नसाया निंतिं ज्‍या यायेत छ सुथ न्‍हापां दनेगु व चान्‍हय्‌ लिबाक्‍क द्यंवनेगु सितिं खः। छाय्‌धाःसा वय्‌कलं थःत यःपिन्‍त न्ह्यः बियादीगु दु। 
स्‍व, काय्‌पिं परमप्रभुं बियादीगु हकया सर्बय्‌ खः अले काय्‌ म्‍ह्याय्‌पिं वय्‌कःया आशिष खः। 
सिपाइँया ल्‍हातय्‌ दुगु बान थें ल्‍याय्‌म्‍हबलय्‌ बूपिं काय्‌पिं जुइ। 
धन्‍य खः व मनू, गुम्‍हसिया यक्‍व काय्‌पिं दइ। न्‍याय याइगु थासय्‌ थः शत्रुत नापं नापलाइबलय्‌ शत्रुतय्‌सं वयात गुबलें बुकी मखु।