भजन.
122.
दाऊदया भजन यरूशलेमय्‌ थहां वनेत हाःगु म्‍ये इमिसं जितः “परमप्रभुया देगलय्‌ झीपिं वनेनु” धकाः धाःबलय्‌ जि लय्‌ताया। 
अय्‌ यरूशलेम, जिपिं छंगु ध्‍वाखा दुने दनाच्‍वनागु दु। 
यरूशलेम शहरयात बांलाक मिलय्‌ यानाः दय्‌कूगु दु। 
परमप्रभुया कुलत इस्राएलयात ब्‍यूगु व्‍यवस्‍थाकथं परमप्रभुया नांयागु प्रशंसा यायेत अन वनी। 
अन न्‍यायया सिंहासन दु, दाऊदया वंशया सिंहासन अन दु। 
यरूशलेमया शान्‍तिया निंतिं प्रार्थना या, “छन्‍त माया याइपिं याउँक च्‍वनेदयेमा। 
छंगु पःखाः दुने नं शान्‍ति दयेमा, अले छंगु लाय्‌कू दुने नं सुरक्षा दयेमा।” 
जिमि दाजुकिजा व जिमि पासापिनिगु निंतिं जिं धाये, “छन्‍त शान्‍ति जुइमा!” 
परमप्रभु झी परमेश्वरया देगःया निंतिं जिं छंगु भिंया लागि प्रार्थना याये।