भजन.
115.
जिमिगु मखु, हे परमप्रभु, जिमिगु मखु, छिगु सदां दयाच्‍वनिगु दया माया व विश्वास याये बहःसूया निंतिं छिगु थःगु हे नांया महिमा जुइमा। 
जाति जातियापिं मनूतय्‌सं “छिमि परमेश्वर गन दु” धकाः छाय्‌ न्‍यनिगु? 
जिमि परमेश्वर ला स्‍वर्गय्‌ दी, वय्‌कःयात छु यः व हे यानादी। 
इमि द्यःत ला लुँ व वहलं दय्‌कूपिं खः, मनूतय्‌गु ल्‍हातं दय्‌कूपिं खः। 
इमि म्‍हुतु ला दु तर नवाये मफु। इमि मिखा ला दु तर खंके मफु। 
इमि न्‍हाय्‌पं ला दु तर न्‍यने मफु, इमि न्‍हाय्‌ ला दु तर बास काये मफु। 
इमि ल्‍हाः ला दु तर ल्‍हातं थी मफु, इमि तुति ला दु तर न्‍यासि वने मफु। इमिसं कथुं नं सः पिकाय्‌ मफु। 
उपिं मूर्तित दय्‌कूपिं व उमिके भरोसा तःपिं सकलें उपिं ज्‍यालगय्‌ मजूगु मूर्तित थें हे जुइ। 
अय्‌ इस्राएलयापिं मनूत, परमप्रभुयाके भरोसा ति, वय्‌कलं छिमित ग्‍वाहालि बियादी अले रक्षा यानादी। 
अय्‌ हारूनया घराना, छिमिसं परमप्रभुयाके भरोसा ति, वय्‌कलं छिमित ग्‍वाहालि बियादी अले रक्षा यानादी। 
परमप्रभुया भय काइपिं सकसिनं परमप्रभुयाके भरोसा ति, वय्‌कलं छिमित ग्‍वाहालि बियादी अले रक्षा यानादी। 
परमप्रभुं झीत लुमंकादी अले झीत आशिष बियादी। वय्‌कलं इस्राएलया मनूत व हारूनया घरानायात आशिष बियादी। 
परमप्रभुया भय काइपिं चिधंपिं व तःधंपिं सकसितं वय्‌कलं आशिष बियादी। 
परमप्रभुं मचाखाचात बियादीमा, छन्‍त व छिमि काय्‌ छय्‌पिन्‍त नं। 
स्‍वर्ग व पृथ्‍वी दय्‌कादीम्‍ह परमप्रभुं छिमित आशिष बियादीमा। 
स्‍वर्ग ला परमप्रभुयागु हे खः, पृथ्‍वी धाःसा वय्‌कलं मनूतय्‌त बियादीगु दु। 
सीधुंकूपिन्‍सं परमप्रभुया प्रशंसा याइ मखु, क्‍वय्‌ पातालय्‌ थ्‍यंपिन्‍सं वय्‌कःया प्रशंसा याइ मखु। 
तर झीसं ला आः व न्‍ह्याबलें परमप्रभुया प्रशंसा याये। हल्‍लेलूया!