भजन.
114.
इस्राएलीतय्‌सं मिश्र देश त्‍वःतूबलय्‌, याकूबया सन्‍तान मेगु भाय्‌ ल्‍हाइपिं मनूतय्‌गु दथुं पिहां वःबलय्‌ 
यहूदा परमप्रभुया पवित्र थाय्‌ व इस्राएल वय्‌कःया राज्‍य जुल। 
इमित खनाः लाल समुद्र बिस्‍युं वन, यर्दन खुसि लिखतं न्‍ह्यात। 
पर्वतत भ्‍याःचा थें व डाँडात फै थें तिंन्‍हुल। 
अय्‌ समुद्र, छन्‍त छु जुल, छाय्‌ छ बिस्‍युं वनागु? अय्‌ यर्दन खुसि, छाय्‌ छ लिखतं न्‍ह्यानागु? 
अय्‌ पर्वतत, छिपिं छाय्‌ भ्‍याःचात थें तिंन्‍हुयागु? अय्‌ डाँडात, छाय्‌ छिपिं फैचात थें तिंन्‍हुयागु? 
अय्‌ पृथ्‍वी, परमप्रभुया न्‍ह्यःने थरथर खा, याकूबया परमेश्वरया न्‍ह्यःने थरथर खा, 
वय्‌कलं ल्‍वहंयात लःया पुखुलिइ, अले च्‍वल्‍वहंयात लःया धालय्‌ हीकादी।