भजन.
104.
जिं दुनुगलंनिसें परमप्रभुया प्रशंसा याये। हे परमप्रभु, जिमि परमेश्वर, छि तसकं तःधंम्‍ह खः, महिमा व गौरवं छि झःझः धयाच्‍वंगु दु। 
छिं थःत जलं त्‍वपुयादीगु दु। अले आकाशयात पाल थें चक्‍कंकादीगु दु। 
छिं आकाशय्‌ लःया द्यःने थःगु छेँ दय्‌कादीगु दु, छिं सुपाँय्‌यात थःगु रथ यानादीगु दु अले फय्‌यात पपू यानाः ब्‍वयादी। 
फय्‌यात छिं दूत यानादीगु दु, अले च्‍यानाच्‍वंगु मित्‍याःयात थः दास यानादीगु दु। 
छिं पृथ्‍वीयात बल्‍लाक जग स्‍वनाः नीस्‍वनादीगु दु, उकिं थ्‍व इकिधिकि हे सनी मखु। 
अले थुकिया च्‍वय्‌ छिं वसतं पुंके थें समुद्र दय्‌कादिल। अले पहाडया च्‍वय्‌ च्‍वय्‌ थ्‍यंक नं लखं त्‍वपुल। 
छिं हक्‍केवं लः बाःवन, अले छिं तस्‍सलं उजं बीवं इपिं हथासं चिलावन। 
अले पहाडं पहाडं व गालं गालं जुयाः इपिं छिं इमिगु निंतिं धकाः दय्‌कादीगु थासय्‌ बाःवन। 
लखं हाकनं पृथ्‍वीयात त्‍वपुइ मफयेमा धकाः छिं इमिसं पुलावने मफयेक लागा चिनादिल। 
छिं गुँच्‍वय्‌ व गालय्‌ गालय्‌ लःधाः हाय्‌कादिल। 
थुकिं जंगली गधा व फुक्‍क जनावरतय्‌सं थःगु प्‍याःचाः लंकी। 
लःधाःया लिक्‍क लिक्‍क झंगःतय्‌सं थःगु स्‍वँ दय्‌की, अले सिमाकचाय्‌ च्‍वनाः हाली। 
छिं आकाशं पहाडय्‌ वा गाय्‌कादी, अले छिगु सुवालं पृथ्‍वी बिलिबिलि जाइ। 
छिं सा-द्वहंया निंतिं घाँय्‌ व मनूतय्‌गु निंतिं स्‍वां-सिमा सय्‌कादी। अले इमिसं थःगु बालि सय्‌केफइ। 
मनूतय्‌त लय्‌ताय्‌केत दाखमद्य, ख्‍वाः चक्‍कंकेत जैतूनया चिकं व ताकत बीत मरि सय्‌के बियादीगु दु। 
परमप्रभुं पिनादीगु वय्‌कःया थःगु हे सिमा लेबनानया देवदारुया सिमातय्‌त गाक्‍क लः दइ। 
अन झंगःतय्‌सं थःगु स्‍वँ दय्‌की, थकुराःमाय्‌ सलांत्‍याः झंगतय्‌सं थःगु स्‍वँ दय्‌की। 
ततःजाःगु पहाडय्‌ गुँ दुगुचा च्‍वनी, अले नवःचा ल्‍वहंया कापिचाय्‌ सुलाच्‍वनी। 
छिं ऋतु क्‍वःछियेत तिमिला दय्‌कादिल, सूर्यं थः लुकुंबीगु ई स्यू। 
छिं चा दय्‌कादिल, अले खिउँबलय्‌ दक्‍व गुँ पशुत पिहां वइ। 
परमेश्वरं बियादीगु नसा मामां शिकार याइबलय्‌ सिंहत थ्‍वय्‌क हाली। 
निभाः त्‍वइबलय्‌ इपिं लिहां वनी व थः थःगु गुफाय्‌ द्यनी। 
अले सन्‍ध्‍या ई तक ज्‍या यायेत मनूत पिहां वइ। 
परमप्रभु, छिं फुक्‍क दय्‌कादीगु दु, गज्‍याःगु तःधंगु बुद्धिं छिं उपिं फुक्‍क दय्‌कादिल, छिगु सृष्‍टिं थ्‍व पृथ्‍वी जाःगु दु। 
तःधिकःपिं व चिधिकःपिं अल्‍याख जन्‍तुत च्‍वनेत तःधंगु व मिखां न्‍ह्याये मदुगु महासागर दु। 
उकी जहाजत न्‍ह्याइ छिं दय्‌कादीम्‍ह लः जन्‍तु लिव्‍यातन्‌ अन म्‍हिती। 
पाय्‌छिगु इलय्‌ छिं इमित नयेगु नसा बियादी धकाः इपिं सकसिनं छिगु हे लँ स्‍वयाच्‍वनी। 
छिं इमित नसा बियादी अले इमिसं नइ, छिं बियादीगु नसां इमिगु प्‍वाः जाइ। 
छिं थःगु ख्‍वाः फस्‍वय्‌कादीबलय्‌ इपिं ग्‍याइ, छिं इमिगु सासः कयादीबलय्‌ इपिं सी अले धुलय्‌ लिहां वनी। 
छिं इमित थःगु सासः बियादीबलय्‌ इमिगु सृष्‍टि जुइ, छिं पृथ्‍वीयात न्‍हूगु जीवन बियादी। 
परमप्रभुया महिमा न्‍ह्याबलें दयाच्‍वनेमा। परमप्रभु थःगु ज्‍याय्‌ लय्‌तायादीमा। 
छिं पृथ्‍वीयात स्‍वयादी अले व थुरथुर खाइ, छिं थीवं पहाडं कुँ पिहां वइ। 
म्‍वानाच्‍वँतले जिं परमप्रभुया म्‍ये हालाच्‍वने, जि दतले जिं जिमि परमेश्वरया भजन हालाच्‍वने। 
जिं ध्‍यान यानागु वय्‌कलं यय्‌कादीमा, छाय्‌धाःसा जिगु लसता वय्‌कःया पाखें वइ। 
पापी मनूत पृथ्‍वीं नाश जुयावनेमा। हे जिगु मन, परमप्रभुया प्रशंसा या! हल्‍लेलूया!