भजन.
103.
दाऊदया भजन जिं दुनुगलंनिसें परमप्रभुया प्रशंसा याये। जिं दुनुगलंनिसें वय्‌कःया पवित्र नांया प्रशंसा याये। 
जिं दुनुगलंनिसें परमप्रभुया प्रशंसा याये। वय्‌कलं यानादीगु भिंगु ज्‍या जिं गुबलें ल्‍वःमंके मखु। 
वय्‌कलं जिगु फुक्‍क पाप क्षमा यानादी अले जिगु फुक्‍क ल्‍वय्‌ लंकादी 
वय्‌कलं जितः सीगालं त्‍वःतकादिल, अले जितः सदां दइगु दया माया व मायां घेरय्‌ यानादी। 
वय्‌कलं जितः फुक्‍क भिंगु खं पूवंकादी। अले जिगु ल्‍याय्‌म्‍हसू इमाया थें न्‍हूधाः जुइ। 
परमप्रभुं क्‍वत्‍यलातःपिन्‍त न्‍याय यानादी, अले इमिगु अधिकार इमित बियादी। 
वय्‌कलं थःगु लँ मोशायात क्‍यनादिल, अले इस्राएलीतय्‌त थःगु ज्‍या क्‍यनादिल। 
परमप्रभु दया दुम्‍ह व माया यानादीम्‍ह खः। वय्‌कः काचाक्‍क तं म्‍वयादी मखु, अले सदां दयाच्‍वनिगु दया मायां जाःम्‍ह खः। 
वय्‌कलं न्‍ह्याबलें दोष बियाच्‍वनादी मखु, वय्‌कः न्‍ह्याबलें तं चाया च्‍वनादी मखु। 
वय्‌कलं झीत झीगु फुक्‍क पापया सजाँय बियादी मखु। वय्‌कलं झीत माक्‍व सजाँय बियादी मखु। 
पृथ्‍वी स्‍वयां स्‍वर्ग गुलि तःजाः वय्‌कःया भय काइपिं प्रति वय्‌कःया सदां दयाच्‍वनिगु दया माया नं उलि हे तःजाः। 
पच्‍छिमं पुर्ब गुलि तापाः उलि हे तापाक वय्‌कलं झीगु पाप झीपाखें चीकाछ्‍वयादी। 
बौनं थः काय्‌ म्ह्याय्‌यात माया याःथें हे परमप्रभुं वय्‌कःया भय काइपिन्‍त माया यानादी। 
झी गुकथं दुगु खः धकाः वय्‌कलं स्‍यू। झी धू जक खः धकाः वय्‌कलं स्‍यू। 
झी घाँय्‌ थें जक खः, जंगली स्‍वां थें झी ह्वइ, अले झ्‍वाः जुइ। 
फय्‌ वयेवं झीतः ब्‍वय्‌कायनी, अले सुनानं खनी मखु। 
तर परमप्रभुयागु सदां दयाच्‍वनिगु दया माया न्‍ह्याबलें वय्‌कःया भय काइपिन्‍के दु। इमि मस्‍त व छय्‌पिनिगु लागिं नं वय्‌कः न्‍ह्याबलें दया दुम्‍ह जुइ। 
परमेश्वरं वय्‌कःया बाचा मानय्‌ याइपिन्‍त व वय्‌कःया उपदेश पालन याइपिन्‍त दया यानादी। 
परमप्रभुं थःगु सिंहासन स्‍वर्गय्‌ स्‍वनादीगु दु। अले वय्‌कलं सकसितं शासन यानादी। 
परमप्रभुया प्रशंसा या, वय्‌कःया आज्ञा मानय्‌ याइपिं व वय्‌कलं धाःथें याइपिं हे बल्‍लाःपिं स्‍वर्गदूतत! 
हे स्‍वर्गया सिपाइँ, अले वय्‌कलं धाःथे याइपिं वय्‌कःया दासत, परमप्रभुया प्रशंसा या! 
हे वय्‌कलं सृष्‍टि यानातःपिं व वय्‌कःया राज्‍यय्‌ च्‍वंपिं सकलें, परमप्रभुया प्रशंसा या! हे जिगु मन, परमप्रभुया प्रशंसा या!