भजन.
99.
परमप्रभु जुजु खः, मनूत ग्‍यायेमा। वय्‌कः करूबतय्‌ दथुइ थःगु सिंहासनय्‌ च्‍वनादीगु दु। पृथ्‍वी लिगिलिगि सनेमा। 
परमप्रभु सियोनय्‌ दकसिबय्‌ तःधंम्‍ह खः, वय्‌कः फुक्‍क जातितसिबय्‌ तःधंम्‍ह खः। 
इमिसं छिगु तःधंगु व तःजिगु नांया प्रशंसा यायेमा! वय्‌कः पवित्र खः। 
जुजु तःधंगु शक्ति दुम्‍ह खः, वय्‌कलं न्‍याययात यय्‌कादी, छिं इस्राएलय्‌ न्‍यायया पलिस्‍था यानादीगु दु, न्याय व धार्मिकतां ज्‍या यानादीगु दु। 
परमप्रभु झी परमेश्वरया प्रशंसा या वय्‌कःया सिंहासनया न्ह्यःने छ्यं क्वछुकि। वय्‌कः पवित्र खः। 
मोशा व हारून वय्‌कःया पुजाहारीत खः, अले वय्‌कःया नां कयाः प्रार्थना याइम्‍ह छम्‍ह शमूएल खः। इमिसं परमप्रभुयात ग्‍वाहालिया निंतिं इनाप यात, अले वय्‌कलं इमित लिसः बियादिल। 
वय्‌कलं सुपाँय्‌या थामं इपिंलिसे नवानादिल, वय्‌कलं बियादीगु नियम व आज्ञा इमिसं पालन यात। 
हे परमप्रभु जिमि परमेश्वर, छिं थः प्रजायात लिसः बियादिल। छिं इमित पापया सजाँय बियादीगु जूसां छि इमिगु लागि क्षमा बियादीम्‍ह परमेश्वर खः। 
परमप्रभु झी परमेश्वरया प्रशंसा या, अले वय्‌कःया पवित्र पहाडय्‌ आराधना या! परमप्रभु झी परमेश्वर पवित्र खः।