भजन.
98.
परमप्रभुया निंतिं छपु न्‍हूगु भजन हा, वय्‌कलं अजूचायापुगु ज्‍या यानादीगु दु, थःगु शक्ति व पवित्र बलं वय्‌कः त्‍याःगु दु। 
परमप्रभुं थःगु उद्धारया ज्या क्‍यनादीगु दु, वय्‌कलं थःगु धार्मिकता जाति जातितय्‌त क्‍यनादीगु दु। 
वय्‌कलं इस्राएलीतय्‌त सदां दयाच्‍वनिगु दया माया बी धकाः चिनादीगु बाचा व विश्वास याये बहःम्‍ह जुयेगु लुमंकादीगु दु। पृथ्‍वीया कुंकुलामय्‌ च्‍वंपिंसं झी परमेश्वरं यानादीगु उद्धार खंगु दु। 
हे पृथ्‍वीयापिं सकल मनूत, लय्‌तातां भजन हा, लय्‌लय्‌तातां भजन हालाः वय्‌कःयात प्रशंसा या। 
परमप्रभुया प्रशंसा या! वीणा थानाः परमप्रभुया प्रशंसा या! 
तुरही व नेकू पु, अले परमप्रभु झी जुजुयात लय्‌तातां जय जय या। 
समुद्र व उकी च्‍वंपिं फुक्‍क प्राणीतय्‌त वय्‌कःयात तःधंकाः ततःसलं हालेब्‍यु! अले पृथ्‍वी व पृथ्‍वीइ च्‍वंपिं सकसितं वय्‌कःयात तःधंकाः ततःसलं हालेब्‍यु! 
खुसितय्‌सं ल्‍हाःपा थायेमा, पहाडतय्‌सं छक्‍वलं लसतां म्‍ये हालेमा। 
थ्‍व परमप्रभुया न्‍ह्यःने जुइमा। छाय्‌धाःसा वय्‌कः पृथ्‍वीइ राज्‍य यायेत झायादीत्‍यंगु दु। वय्‌कलं धार्मिकतां सुयागु पँ मलिसें संसारयापिं मनूतय्‌गु न्‍याय यानादी।