भजन.
88.
कोरहतय्‌गु भजन। लय्‌ तइम्‍हय्‌सिया निंतिं -- “महलत लिन्‍नोत” रागय्, एज्रा वंशयाम्‍ह हेमानया मश्‍किल हे परमप्रभु, जितः मुक्ति बियादीम्‍ह परमेश्वर! जिं चान्‍हि छितः ततःसलं बिन्‍ति याना च्‍वनागु दु। 
जिगु प्रार्थना न्‍यनादिसँ, ग्‍वाहालिया लागि जिं यानागु प्रार्थना न्‍यनादिसँ। 
जिगु जीवन दुःखं जाःगु दु। जिगु जीवन पातालया लिक्‍क थ्‍यंगु दु। 
सीत्‍यःम्‍ह मनू थें जि जूगु दु। बल हे मदुम्‍ह मनू थें जि जूगु दु। 
इमिसं जितः सीम्‍हतय्‌ दथुइ त्‍वःतूगु दु, अले जि सीम्‍ह थें क्‍वदलाः च्वनाच्‍वनागु दु। छिं जितः ल्‍वःमंकादी धुंकल जितः छिगु ग्‍वाहालि नं मदु। 
छिं जितः दकलय्‌ क्‍वय्‌यागु गालय्‌, तसकं खिउँगु तःज्‍जाःगु थासय्‌ तयादीगु दु। 
छिगु तमं जितः ल्‍हाकातःगु, अले छिगु फुक्‍क लबुं जितः त्‍वपू वःगु दु। सेला 
जिमि पासापिं पाखें छिं जितः तापाक तयादीगु दु, इमिगु मिखाय्‌ जितः तसकं घच्‍चाइपुम्‍ह मनू यानादीगु दु। जितः कुनातःगु दु, जि पिहां वये मफु। 
जितः जूगु दुःखया लागि ख्‍वःख्‍वं जिगु मिखा बुलुसे च्‍वने धुंकल। हे परमप्रभु, जिं छितः न्‍हियान्‍हिथं प्रार्थना यानागु दु, जिं थःगु ल्‍हाः छिपाखे ल्‍ह्वनागु दु। 
छु छिं सीम्‍हतय्‌त थःगु अजूचायापुगु ज्‍या क्यनादी ला? छु सी धुंकूपिं मनूत दनाः छिगु प्रशंसा याइ ला? सेला 
छु छिगु दया मायाया बयान मृत्युलोकय्‌ याइ ला? छि सदां दया माया दुम्‍ह खः धकाः नाश लोकय्‌ धाइ ला? 
छु छिगु अजूचायापुगु ज्‍या खिउँगु थासय्‌ व धार्मिकताया ज्‍या फुक्‍क ल्वःमनिगु थासय्‌ सी ला? 
हे परमप्रभु, ग्‍वाहालिया लागि जिं ला छितः बिन्‍ति याये, अले सुथ न्‍हापां जिं छितः प्रार्थना याये। 
हे परमप्रभु, छिं छाय्‌ जितः त्‍वःतादियागु? छिं छाय्‌ थःगु ख्‍वाः जिपाखें फस्‍वय्‌कादीयागु? 
ल्‍याय्‌म्‍हबलय्‌ निसें हे जि दुःख स्‍यूगु दु। जि सीत्‍यंगु दु छिं यानादीगु सजाँयलय्‌ जि ग्‍यानाः निराश जूगु दु। 
छिगु ग्‍यानापुगु तमं जितः त्‍वपूगु दु, छिगु सजाँयनं जितः नाश याये त्‍यंगु दु। 
इमिसं बा वःगु खुसिं थें न्‍हिच्‍छि हे जितः घेरय्‌ यानातःगु दु, इमिसं प्यखेरं जितः त्‍वपुइ धुंकल। 
छिं जिमि पासापिं व जिमि यःपिन्‍त जिपाखें तापाकादिगु दु, खिउँगु जिमि छम्‍ह पासा जूगु दु।